Yelemiya 11 - IBAYIBOLO 2024

U Yelemiya nu lufingo

¹ U Mwene akamubuzya u Yelemiya akati,

² “Teghelezya ku mazyu agha lufingo nukubabuzya aba Yuda na babo bakwikala mu Yelusalemu.

³ Ubabuzye ukuti umu momumo u Mwene, u Chala uwa Izilayeli akunenela: Mughuniwa umuntu yuyo atakwivwila amazyu agha lufingo ulu,

⁴ ulufingo lulo nkafingana na banyenya binyu bo nkubefyamo mu Ijiputi, muchiliba ichakwaka umoto. Nkati, ‘Munyivwile nukubomba chosi chicho nkubalamula, po mukwiza pakuba bantu bane, sona nkwiza pakuba ne Chala winyu.

⁵ Po nkwiza pakukwanilisya ichilapo chicho nkafingana na banyenya binyu, ichisu icha mboto chicho mwachikaba ilelo.’ ” Po nkamula nkati, “Ameni, we Mwene.”

⁶ U Mwene akanena nane akati, “Lumbilila amazyu ghosi ghanagha mutwaya utukulu utwa Yuda na mumisebo iya Yelusalemu: Teghelezya ku amazyu agha lufingo nukughakonka.

⁷ Pakuti nkabasoka abanyenya binyu kabilikabili nu moyo wane ghosi pakabalilo kako nkabefya muchisu icha Ijiputi mupaka ilelo nu moyo wane ghosi nukunena ukuti, ‘Munyivwilaye.’

⁸ Loli bakighalila amakutu ghabo, mubuzilo bwache, umuntu wesi akenda muzila iyache ni yache iya moyo wache umubibi. Po nkabatumila ivighune vyosi ivya lufingo lulo nkabalamula ukuti balukonkaye loli batakalukonka.”

⁹ Po u Mwene akambuzya akati, “Abantu aba mu Yuda naba mu Yelusalemu bakubatika pakumbombela ububibi.

¹⁰ Banyokeye kumbibi izya banyenya babo, babo bakaghakana amazyu ghane. Babakonkite abachala abanji nukubabombela. Bosi poka aba Izilayeli naba Yuda balunanganizye ulufingo lulo nkafingana na banyenya babo.

¹¹ Polelo u Mwene akuti, ‘Nkubizila nintamyo yiyo batabaghiye pakuyichimbila. Napapo bangandilila, pope bulo ntakwiza pakubivwa napo panandi.

¹² Utwaya utukulu utwa Yuda sona na bantu aba mu Yelusalemu bakwiza pakubuka pakubalilila abachala abanji babo bakababikilagha ivyakwiyipa ivyakufukizya, loli batakwiza pakubapoka napo panandi pa kabalilo akantamyo.

¹³ Wee Yuda, abachala bako binji nkani babo bayanite bulo nutwaya twinyu utukulu sona vyope ivighemo vivyo muzengite ivya kumochelapo utwakununkila u chala winyu u Baala, vyinji nkani ngati misebo iya mu Yelusalemu.’

¹⁴ “Yelemiya, utakabiputilaye abantu banaba pamo ukubalabila, pachifukwa ichakuti ntakwiza pakubivwa bo bakunyitizya pakabalilo akantamyo.

¹⁵ Nkimba abantu bane abaghaniwa biza pakubomba choni munyumba yane? Nkimba te mwemwe mwabomba ivintu ivibibi nkani? Fwandi inyama yinyu impaghuliwa yingefyapo ulufundo lwinyu? Bo mukubomba imbibi, po mukusekela.”

¹⁶ Akabalilo kamo u Mwene akakufwanikizya ni kwi ibisi ilya musyunguti ni vikomwa vyache ivyiza nkani. Loli nukupoma ukwa mpepo iya maka akwiza pakulyocha numoto, sona isamba zyache zyosi zikwiza pakochiwa numoto.

¹⁷ U Mwene Uwamaka Ghosi yuyo akababika muchisu, alamula ukuti, intamyo yikwiza pakubawila pachifukwa icha mbibi zizyo mwabomba mweba Izilayeli naba Yuda. Mwamukalalizya pakubika ichakwiyipa icha kocha kwa Baala.

Bakwivwana pakumubombela u Yelemiya ububibi

¹⁸ U Mwene akamvumbulila sona nkazimanya zizyo bakalonda pakumubombela. Akanyighula amaso ghane ukuti izyennye imbombo zyabo imbibi zizyo bakabombagha.

¹⁹ Nkaba ngati ne mwana uwa ng'ozi yuyo akubuka pakughoghiwa. Intakazimanya ukuti amaso ghosi ghali papane, bo bakunena ukuti, “Zagha tulidumule ikwi ili bo lichili libisi. Zagha tumughoghe ukuti itabwa lyache lizimile.”

²⁰ Loli wee Mwene Uwamaka Ghosi, wewe ukulongela mubugholosu uzimenye izya mumoyo na munyinong'ono, leka nennye ukutanizya kwako pabantu aba, pakuti nayibika inongwa yane kukwako.

²¹ Polelo umu momumo u Mwene akunenela nizya bantu aba ku Anatoti babo bakalondagha pakungogha nukunena ukuti, “Utakalaghulilaye sona mwitabwa ilya Mwene pakuti tukwiza pakukughogha.”

²² Pakuti u Mwene Uwamaka Ghosi akuti, “Nkwiza pakubafunda abalumendo aba ku Anatoti bakwiza pakughoghiwa nupanga, sona abana babo abalumendo na balindu bakwiza pakughoghiwa nizala.

²³ Atakwiza pakuponapo nayumoyumo pachifukwa ichakuti nkwiza pakubawisizya intamyo abantu aba ku Anatoti, mumwaka wabo uwa lufundo.”