Yelemiya 10 - IBAYIBOLO 2024

U Chala uwanaloli nu chala uwabumyasi

¹ Mwee ba Izilayeli, ivwa amazyu ghagho u Mwene akubabuzya.

² U Mwene akuti, “Mutakazikonkaye izila izya inko izinji, pamo pakutetema ni viswigho ivya mumwanya, napapo inko izinji zikutetema navyo.

³ Mutakazikonkaye inyiho izya bulo izya bantu aba inko izinji, bakudumula ikwi mumusitu, sona ufundi akulibiza ni mbiso.

⁴ Bakulipaka nu siliva sona nu golide, bakulikomela ni mizumali, umwakuti litakaneng'enaye.

⁵ Ivifwani vyabo viyanite bulo ni vyakoghofekezya ivinyamana mumughunda uwa ving'wela amizi, ivifwani vyabo vitanganena, vikunyamuliwa bulo pakuti vitangenda. Mutakavinyilaye, pakuti vitangabavulazya. Vite namaka naghamoghamo aghakubombela inyiza.”

⁶ Wee Mwene, atalipo nayumoyumo uwakuyana nawe, awe we mukulu nkani, sona itabwa lyako lyamaka nkani.

⁷ Wee Mwene uwa inko zyosi, nkimba wewenu yuyo atangakunyila? Pakuti zikubaghiye ukuti abantu bakunyilaye. Pakasi pa balongozi abamahala bosi aba inko sona mubumwene bwabo bosi, atalipo nayumoyumo yuyo ayanite nawe.

⁸ Bosi bate namahala naghamoghamo sona bapunganu, bakumanyisiwa ni vifwani ivya makwi vivyo vite ni mbombo nayimoyimo.

⁹ U siliva yuyo asyaniwe afumite ku Talishishi, sona u golide afumite ku Ufazi. Chicho u fundi nu musyani babomba, chivwinkiwe nu bulu sona nu buchesamile, vyosi vinivi yo mbombo iya bafundi.

¹⁰ Loli u Mwene we Chala uwanaloli, we Chala umumi, u Mwene uwa bwila na bwila. Bo akalala, ichisu ichapasi chikutetema, inko zitangajimba nu bukali bwache.

¹¹ Mubabuzye ukuti, “Abachala aba batakapela ichisu icha kumwanya ni ichapasi, bakwiza pakuzimila pachisu chosi sona na kusi kuchisu.”

U lwimbo ulwa kumupala u Chala

¹² U Chala akapela ichisu ichapasi na maka ghache, na mahala ghache akapela ichisu chosi ichapasi mubumanyi bwache akachikuzula ichisu icha kumwanya.

¹³ Bo akujilimisya, amizi kumwanya ghakupongomoka. Weyuyo akukwezya amabingu ukwanda kubumalilo ubwa chisu chosi ichapasi. Weyuyo akulamizya utumesya ni vula sona akuyifumya impepo muchipinda ichakusungilamo.

¹⁴ Umuntu wesi mupunganu, sona ate na mahala naghamoghamo, umusyani wesi uwa golide akukoziwa isoni ni vifwani vyache vivyo apanga. Ivifwani vyache vyabumyasi, vite nubumi nabumobumo.

¹⁵ Vite nimbombo nayimoyimo, pakuti imbombo yabo yabuzimbuli mpela, sona pakabalilo aka lufundo lwabo bakwiza pakuzimila.

¹⁶ U Chala uwa Yakobo atayanite nabo, pakuti we mupeli uwa vintu vyosi, Aba Izilayeli bantu bache babo akabasala, itabwa lyache we Mwene Uwamaka Ghosi.

Ichisu icha Yuda chaba chisami

¹⁷ Nyamula u katundu winyu, nukwepamo muchisu, pakuti abalwani binyu babazyunguliye.

¹⁸ U Mwene akuti, “Nkwiza pakubataghila abantu aba kubutali ni chisu, nkwiza pakubizila nintamyo umwakuti bivwisye.”

¹⁹ Chighune nkani kukwane pachifukwa chakuvulala kwane ichilonda chane chitakupola! Loli nkanena ne mwene nkati, “Ubu bo bubine bwane, imbaghiye pakujimba.”

²⁰ Ivisakasa vyitu vyananganika, inkusa zizyo zikavilema zyadumuka. Abana bitu bosi bepitemo, atalipo nayumoyumo uwakuti angatuzengela sona ivisakasa, sona atalipo nayumoyumo, uwakubikapo ivyakwighalila pa vipinda.

²¹ Abalongozi bitu bapunganu sona batakubuzikizya kwa Mwene, pachifukwa chinichi ivintu vitakubendela akiza, sona imidimo yabo yinyampanite bulo.

²² Teghelezya! Ipangwi lilyo likwiza. Ichongo ichikulu icha kumitu chikwiza. Chikwiza pakutupela utwaya utukulu utwa Yuda pakuba chisami, mumo mukwikalamo abakambwe.

Ulwiputo ulwa Yelemiya

²³ Wee Mwene, zizyo inzimenye zyakuti, ubumi bubo umuntu ali nabo te bwache napo panandi, umuntu atakwilongozyapo mwene.

²⁴ Wee Mwene, unchemele, loli unchemele mubugholosu. Utakankalalile umwakuti intakipele pakuba chintu ichabulo.

²⁵ Pungulila ubukali bwako pa inko zizyo zitakumenye, pabantu babo batakukwiputa. Pakuti bamulya u Yakobo, bamulya nukumumalizya, sona bakanangannya akaya kache nukukapela pakuba nkolongo.