Yelemiya 1 - IBAYIBOLO 2024

¹ Agha gho mazyu agha Yelemiya, u mwana uwa Hilikiya, uwa bamo abaputi aba ku Anatoti, muchigaba icha Benjamini.

² U Mwene akamubuzya u Yelemiya mumwaka uwa 13, bo u Yosiya u mwana uwa Amoni akulaghila mu Yuda,

³ akamubuzya sona u Yehoyakimu, umwana uwa Yosiya u mwene uwa Yuda, mupaka mumwezi uwafayivi mumwaka uwa 11 uwa bulaghili ubwa Zedekiya, umwana uwa Yosiya u mwene uwa Yuda, mumwaka ghugho abantu aba mu Yelusalemu bakasendiwa pakuba bazya.

Ukwitiziwa ukwa Yelemiya pakuba mulaghuzi

⁴ U Mwene akambuzya akati,

⁵ “Bo inchili napakukupela mulwanda ulwa nyoko, nkaba nkumenye kale. Bo uchili pakupapiwa, nkakusala kale, nkakupaghula ukuti ubanje we mulaghuzi uwa inko.”

⁶ Ane nkati, “Wee, Mwene Uwamaka Ghosi, ane ne mwana munandi nukunena kope intamenye.”

⁷ Loli u Mwene akanyamula akati, “Utakanenaye ukuti, ‘Ne mwana munandi.’ Loli buka ku bantu babo nkukutumako, sona ubabuzye chosi chicho nkukulamula.

⁸ Utakabanyilaye, pakuti indi nawe sona nkwiza pakukupoka. Ane ne Mwene nanena!”

⁹ Po u Mwene akagholosezya inyobe yache pa mulomo nukughupalamasya. Po akati, “Ivwa, nkubika amazyu ghane mumulomo wako.

¹⁰ Ilelo nkukusala ukuti ubanje nu bulaghili panko izya bantu nu bumwene, pakunyunkula nukumongola, pakunangannya nukutagha sona nukuzenga nukubyala.”

U Yelemiya akuvyennya ivintu muvisetuka

¹¹ U Mwene akandalusya akati, “Wee Yelemiya, nkimba ukwennya ichoni?” Nkamwamula nkati, “Nkukennya akasamba aka muposya.”

¹² U Mwene akambuzya akati, “Wennya akiza nkani, pakuti nkwenelezya ukuti nennye nanti amazyu ghane ghakwanilisiwa.”

¹³ U Mwene akandalusya sona akati, “Nkimba ukwennya ichoni?” Nkamula nkati, “Nkuyennya isonta yili na mizi aghakusebukila, yisendamiye kumitu.”

¹⁴ U Mwene akambuzya akati, “Ichintu ichibibi nkani icha kumitu chikwiza pakubawila abantu bosi aba muchisu ichi.

¹⁵ Indi papipi pakuzyitizya inko zyosi izya bumwene ubwa kumitu. Ane ne Mwene nanena. Abamwene babo bakwiza pakuvyikazya ivitengo vyabo ivya bumwene pamilyango iya kaya akakulu nkani aka Yelusalemu, sona bakwiza pakughazyungulila amalinga ghache nutwaya tosi utukulu nkani utwa Yuda.

¹⁶ Nkwiza pakubapa inongwa iyakubasusya abantu bane pachifukwa icha mbibi zyabo nukundeka. Bakafukizya utwakununkila ku bachala abanji, nukwiputa ku vifwani vivyo bakapanga ni nyobe zyabo.

¹⁷ “Loli awe Yelemiya, wiyannye. Nyamuka, ubabuzye zyosi zizyo nkukulamula. Utakabanyilaye pamo ukuti ningakoghofya pamaso papabo.

¹⁸ Ilelo nakupela pakuba we kaya akakulu nkani akakuzyunguliliwa ni linga, ni mpanda iya chela, sona nulubumba ulwa mukuba, umwakuti utakachinyilaye ichisu chosi, abamwene bosi aba mu Yuda pamo amakambala ghache pamo abaputi bache sona na bantu aba muchisu chilachila.

¹⁹ Bakwiza pakulwa nawe, loli batakwiza pa kukupota, pakuti ane indi nawe, sona nkwiza pakukupoka. Ane ne Mwene nanena.”