Yakobo 5 - IBAYIBOLO 2024

Ukubasoka abakabi

¹ Ilelo teghelezya, mwe bantu abakabi. Lilagha nukukolomoka pachifukwa icha ntamyo zizyo zikwiza pakubawila.

² Ubukabi bwinyu bwabola, sona impezu zyadobolannyadobolannya amenda ghinyu.

³ Ugolide winyu nu siliva vyawa uluzima. Uluzima lunulu lo lulo lukwiza pakuba we kaboni uwakubasusya, sona lukwiza pakunangannya umubili winyu ghosi ngati gho moto. Mwilundikila ubukabi mumasiku aghabumalilo agha.

⁴ Abambombo babo bakinulagha mumaghunda ghinyu mutabalipiye. Teghelezya amilumbusyo ghabo. Inkuta iya binuli bala yivwika mumakutu agha Chala u Mwene Uwamaka Ghosi.

⁵ Mwizuzya ubumi bwinyu pachisu ichapasi ni vyakubahobosya. Mwiyinisya mwebene ngati yo ng'ombe yiyo bakabuka nayo pakuyibola.

⁶ Mwabasusya nukubaghogha abantu abasita inongwa, babo batakaba nu lusako ulwakwiyimila bene.

Ubufisalyoyo nu lwiputo

⁷ Mwee bakamu bane, mubanje bafisalyoyo mupaka u Mwene ize. Ennya mumo umulimi akulindilila ukuti umughunda wache wele ivikomwa ivyiza nukulindilila mubufisalyoyo mupaka apokela ivula iyakwanda ni yabumalilo.

⁸ Namwe bulo mubanje bafisalyoyo. Mwimaye nkani pakuti u Mwene ali papipi pakwiza.

⁹ Mwee bakamu bane, mutakalumbuzannyanje mwebenebene, umwakuti u Chala atakabalonge. Umulongi imiliye pamulyango.

¹⁰ Mwee bakamu bane, mubakumbuke abalaghuzi babo bakanenela mwitabwa ilya Mwene pakuba chifwanikizyo icha bufisalyoyo mutubalilo utwa mayimba.

¹¹ Abantu banaba tukubitizya ukuti bahobosu pachifukwa ichakuti bakajimba mumayimba. Kumbuka namumo u Yobu akajimbila mumayimba, sona namumo u Mwene akamwamulila pabumalilo. Pakuti u Mwene wachisa, sona walupazikizyo.

¹² Bakamu bane, pamwanya pavyosi, mutakalapaye ichilapo. Mutakalapilaye na kumwanya, pamo na pachisu ichapasi, pamo ni chintu chosi. Nena bulo ukuti, “Eee” nanti we ee, sona “Awe” nanti we awe. Po mutakwiza pakwaghiwa ninongwa pamaso pa Chala.

¹³ Nkimba alipo umuntu yumo mumwinyu yuyo ali mumayimba? Iputaye. Fwandi, alipo yumo yuyo ahobokite? Imbaye inyimbo izyakumupala u Chala.

¹⁴ Nkimba alipo umuntu yumo mumwinyu yuyo mubine? Abitizye abasongo aba chipanga ukuti bamwiputile nukumupakazya amafuta gha syunguti mwitabwa ilya Mwene.

¹⁵ Nanti bakwiputa nu lwitiko, ulwiputo lulalula lukwiza pakumupozya umuntu umubine. U Mwene akwiza pakumunyamusya. Po nanti akananga, imbibi zyache zikwiza pakuhobokeliwa.

¹⁶ Polelo mwilatilanaye imbibi zyinyu sona nukwiputilana, umwakuti mupole. Ulwiputo ulwa mugholosu lwamaka, sona lukubomba ivintu ivikulu nkani.

¹⁷ U Eliya akaba muntu ngati sweswe. Akiputagha nkani ukuti kutakatime ivula, naloli ivula yitakatima pachisu chila amaka matatu na mezi sikisi.

¹⁸ Bo iputa sona, ivula yikatima, po ichisu chikanda pakumezya imbeyu.

¹⁹ Mwee bakamu bane, nanti umuntu yumo mumwinyu apaghukako kubwanaloli, po nanti yumo amunyosekezya kuko,

²⁰ mukumbuke ichi: Umuntu wesi yuyo akumunyosya umuntu kumbibi zyache, akwiza pakubupoka ubumi ubwa mubibi yula kubufwe, sona akumwavwa ukuti imbibi zyache inyinji zihobokeliwe.