Yakobo 4 - IBAYIBOLO 2024

Tutakabanje bamanyani aba chisu ichapasi

¹ Nkimba ubulwe nukudalinkana vivyo vili mumwinyu vikufuma kwiyi? Nkimba vitakufuma ku vinyonywa vyinyu ivibibi, vivyo vikulwana mumwinyu?

² Mukunyonywa ivintu, loli mutakuvyagha, cho chifukwa mukughogha abamwinyu. Mukunyonywa ivintu, loli mutakuvyagha cho chifukwa mukulwa nukudalinkana. Mutakuvyagha ivintu vilavila pachifukwa ichakuti mutakulaba kwa Chala.

³ Sona napapo bo mukulaba, mutakuvipokela pachifukwa ichakuti mukulaba akabibi. Ivintu vivyo mukulaba mukulonda pakuvibombezya ukuhobosya amabili ghinyu ghene.

⁴ Mwe bantu mwe mute mwe basubiliwa mwee! Nkimba mutazimenye ukuti pakuba bamanyani aba chisu ichapasi, mukwipela mwebene pakuba balwani aba Chala? Abantu babo bakulonda pakuba bamanyani aba muchisu ichapasi bakwipela bene pakuba balwani aba Chala.

⁵ Mutakinong'onaye ukuti butalimo ubwanaloli mu Masimbo ghagho ghakuti, “U Muzimu Umuzelu yuyo u Chala akabika mumwitu akutunyonywa aswe nu buzuba.”

⁶ Loli ichisa chicho u Chala akutulanjizya chamaka nkani. Ichi cho chifukwa Amasimbo ghakuti, “U Chala akubasusya abantu abakwitutumula, loli akubapelela ichisa abantu abakwiyisya.”

⁷ Polelo mwiyisyanje mwebene pamaso pa Chala. Mumukane u Satana, po akwiza pakubachimbila.

⁸ Palamila kwa Chala, po wepe akwiza pakupalamila kukwinyu. Ozya inyobe zyinyu mwe bantu bambibi mwee! Suka amoyo ghinyu, amwe mwe amoyo ghinyu ghali mumwanyamwanya bulo!

⁹ Mubanje ni chitima, mulilaye sona mukolomokaye pachifukwa icha vintu ivibibi vivyo mukabomba. Ukuseka kwinyu kubanje nkuto, sona ubuhobosu bwinyu bubanje chitima.

¹⁰ Mwiyisyanje mwebene pamaso pa Mwene, po akwiza pakubakwezya.

Tutakalonganaye

¹¹ Mwee bakamu bane, mutakayebanaye. Umuntu wesi yuyo akumunena uwamwabo ububibi pamo ukumususya, kokuti akuzinena ububibi nukuzisusya Indaghilo izya Chala. Nanti ukuzilonga Indaghilo izya Chala, kokuti utakuzikonka, loli waba we mulongi.

¹² U Chala mwene we mupandaghilo nu mulongi, sona weyuyo amenye pakupoka nukunangannya. Nkimba awe we ukumususya uwamwinyu, wewenu?

Mutakituvyanje nizya ndabi

¹³ Losi ulu ivwa kuno, mwe mukunena ukuti, “Ilelo pamo indabi tukwiza pakubuka mukaya kamo akakulu nkani, kuko tukwiza pakwikala umwaka ghoka. Tukwiza pakughula nukughulizya, po tukwiza pakuzyagha indalama inyinji nkani.”

¹⁴ Loli mutakuzimanya nukuzimanya ukuti ubumi bwinyu indabi bukwiza pakuba bulibuli! Muyanite bulo nu kabefu, yuyo akuboneka pakabalilo akapimpa bulo nukuzyebeluka.

¹⁵ Munenaye bulo mutinji, “Nanti u Mwene umwenecho angitikizya, tukwiza pakwikala nubumi, sona tukwiza pakubomba ichi pamo chila.”

¹⁶ Loli mumo zibeleye, mukwituvya nukwitutumula. Ukwituvya kosi kunuku kubibi.

¹⁷ Polelo umuntu wesi yuyo abumenye ubwiza bubo angabubomba, loli atakububomba, kokuti akunanga.