Yakobo 3 - IBAYIBOLO 2024

Nizya lulimi

¹ Mwee bakamu bane, mwebosi mutakabanje bamanyisi, pakuti muzimenye ukuti aswe twe bamanyisi twe tukwiza pakulongiwapo ukuchila abantu abanji.

² Pakuti twebosi tukupuvya muvintu ivyinji. Loli nanti umuntu yumo atakupuvya pazizyo akunena, kokuti umuntu yunuyu wakufikapo, sona amenye pakulaghila umubili wache ghosi.

³ Tukubika akela mumulomo uwa falasi ukuti yitwivwilaye, sona tungayipetulila kosi kuko tukulonda pakubuka.

⁴ Pamo mwinong'one nizya bwato ubukulu nkani pamizi mumo bubeleye, bukusunkiliwa ni mpepo iyamaka, bungapetuliwa nakannyengelo akanandi, nukubuka kosi kuko umwendezyi akulonda ukuti bubukaye.

⁵ Umwakuyana bulo, ululimi ko kachigaba akanandi nkani aka mubili, loli lungitutumula nizya vintu ivikulu nkani. Mwinong'one nizya kukula ukwa musitu, loli ghukochiwa na kampesese aka moto!

⁶ Ululimi lope luli ngati gho moto, chicho chizuye nu bubibi pakasi pa vigaba ivya mubili. Lukunyazya inkalo yosi iya muntu, sona lukochannya ubumi bwache bosi numoto uwamu Gehena.

⁷ Umuntu angateka ivinyamana ivyakulekanalekana, ni viyuni, na vyosi ivyakwavula, sona nivya munyanja, po naloli avitekite.

⁸ Loli nayumo umuntu yuyo alutekitepo lumo ululimi. Ululimi lubibi, lutamenye ukutuzya, sona lwizuye ni vintu ivyakughogha ngati gho mwavi.

⁹ Nu lulimi lunulu tukumupalizikizyapo u Mwene witu nu Tata, sona nu lulimi lulalula tukughunilapo abantu abanji, babo bapeliwe muchifwani icha Chala.

¹⁰ Amazyu aghamapalo na mazyu aghanguno ghosi ghakufuma pa mulomo ghoka ghulaghula. Mwee bakamu bane, ichi chitakabombiwanje!

¹¹ Nkimba imbwibwi yingafumya amizi amiza na ghambeya pa mbwibwi yoka?

¹² Mwee bakamu bane, nkimba ikwi ilya ikuyu lingela isyunguti, pamo ulutabo ulwa mampesya lungela ivikomwa ivya makuyu? Nkimba imbwibwi iya mizi aghambeya yingafumya amizi amiza?

Amahala agha kumwanya

¹³ Nkimba wewenu wamahala nu wakwivwisya mumwinyu? Muleke aghalanjizye ni nkalo yache inyiza, sona ni mbombo zyache izyakwiyisya zizyo zikufuma mumahala.

¹⁴ Loli nanti mumoyo ghinyu muli na kabini nu bukali, sona nukwiyighana, mutakitutumulaye pachifukwa icha mahala ghinyu. Pakubomba bunubu kokuti mukubusula ubwanaloli.

¹⁵ Amahala ghanagha ghatakufuma kumwanya, loli gha pachisu ichapasi. Amahala ghanagha gha buntu bulo, sona ghate gha muzimu uwa Chala, loli gha mizimu imibibi.

¹⁶ Pakuti kuko kuli akabini nukwiyighana, ko kuko kuli sona ukuvulungana nu bubibi ubwakulekanalekana.

¹⁷ Loli amahala agha kumwanya, ichakwanda mazelu, na ghamutende, na mololo, sona na ghabumanyani. Ghizuye nu lupazikizyo, sona imbombo zyache nyiza, ghatakwennya icheni, sona ghate mazimbuli, awe.

¹⁸ Abantu abamutende babo bakapesa umutende, bakwiza pakwinula ivikomwa ivya bugholosu.