Umulumbilili 9 - IBAYIBOLO 2024

¹ Po nkinong'onapo akiza nukudumula ukuti umuntu umugholosu nu muntu uwamahala sona na vivyo bakubomba vyosi vili munyobe izya Chala. Loli nayumoyumo umuntu yumo angavimanya ivya muntazi napapo vingaba vyalughano pamo vyalubengo.

² Ichintu chicho chikumuwila umuntu umugholosu cho chicho chikumuwila umuntu umubibi nu mwiza sona nu mubomba mbibi, umuntu umuzelu nu munyazu, yuyo akubika ivyakwiyipa, sona na yuyo atakubikagha. Umuntu umwiza ayanite bulo nu muntu umubibi. Ngati mumo zibeleye nu muntu yuyo akulapa ichilapo, ziyanite bulo nu muntu yuyo atakulapa ichilapo.

³ Ichi cho chintu ichibibi chicho chikubombiwanga pachisu ichapasi. Ichighune chikubawila abantu bosi umwakuyana bulo. Pakonjelezyapo, inyinong'ono izya bantu zyizuye nu bubibi nu bwachipena bo bachili bumi, po pisinda pache bakufwa umwakuchenusya bulo.

⁴ Loli umuntu wesi yuyo ali nubumi akuba nu lusubilo. Pakuti imbwa inyumi, nyizapo ukuyichila inkalamu ifwe.

⁵ Pakuti abantu abumi bazimenya ukuti bakwiza pakufwa, loli abafwe batazimanye napo panandi. Batakwiza pakupokela umuvwalo naghumoghumo sona atalipo nayumoyumo yuyo akubakumbuka.

⁶ Ulughano nu lubengo lwabo, sona na kabini kabo vyosi vikamala. Batakusendapo sona ichigaba nachimochimo pavintu vivyo vikubombiwanga pachisu ichapasi.

⁷ Lyanga ichakulya chako nukusekela, sona ng'welagha uvinyo wako nu buhobosu, pakuti u Chala ahobokite ni mbombo zyako.

⁸ Akabalilo kosi uvwalaye amenda amaswepu, sona wipakazyanje na mafuta kumutu wako.

⁹ Wilaghaye ubumi bwako poka nu muchi wako yuyo umughanite mumasiku ghosi agha bumi bwako bubo bute ni mbombo nayimoyimo, bubo u Chala akupiye pachisu ichapasi ichi. Pakuti ughu gho muvwalo wako bo uchili we mumi, sona bo uli pakubomba imbombo zyako izyakulisya pachisu ichapasi.

¹⁰ Chosi chicho winong'ona pakuchibomba wiyulaye nkani pakuchibomba, pakuti nanti wasyiliwa mwipumpa kutaliko ukubomba imbombo pamo ukubatika, pamo ubumanyi pamo amahala.

¹¹ Nachennya sona ichintu chimo pachisu ichapasi ichakuti: Te muntu uwalwengo akupota pakuchimbila, pamo umuntu umujivu akupota pabwite. Pamo abantu abamahala bene bo babo bakuchagha ichakulya pamo abantu abamahala bene bo babo bakuba nu bukabi. Te bamanyi bene babo abantu bakubapelela ichisa, loli ulusako ni chighune vikubawila bosi banaba.

¹² Naloli nayumoyumo yuyo akamenye akabalilo kache. Iswi zikulemeliwanga muchilepa, sona iviyuni vikulemiwanga muchipingo. Umwakuyana bulo abantu bope bakulemiwa mutubalilo utubibi tuto tukubawila umwakuchenusya.

Amahala ghabuchilite ubupunganu

¹³ Chilipo ichifwanikizyo chimo icha mahala chicho nkachennya pachisu ichapasi, sona nkachennya ukuti ichintu chikulu nkani:

¹⁴ Kale kukabako akaya kamo akanandi nkani, kako mukabamo abantu abanandi bulo. U mwene uwamaka nkani akalwa nako ubwite, po akiyannya pakumongola ulupaso ulwa kaya kala.

¹⁵ Po mulamula mukabamo umupina nkani, loli akaba muntu uwamahala. Na mahala ghache umupina yula akakapoka akaya kalakala. Loli patakabapo nayumoyumo yuyo akumukumbuka umupina yula.

¹⁶ Po nkati, “Amahala mizapo ukuchila amaka.” Loli abantu bakughasulannya amahala na mazyu agha mupina.

¹⁷ Amazyu agha muntu uwamahala ghagho akughanena mubololo, mizapo ukuchila ukukolomoka ukwa mulongozi pamaso pa bapunganu.

¹⁸ Amahala mizapo ukuchila ivilwilo ivya bwite, loli umuntu umubibi weka angavinangannya ivyiza ivyinji.