Umulumbilili 7 - IBAYIBOLO 2024

Nizya mahala nu bupunganu

¹ Inkalo inyiza nyizapo nkani ukuchila amafuta aghakununkila, sona isiku ilyakufwila lyizapo nkani ukuchila isiku ilyakupapiwa.

² Chizapo nkani pakubuka kunyumba kuko kuli ichililo ukuchila pakubuka kunyumba kuko kuli ulusekelo, pakuti ubumalilo ubwa muntu wesi bo bufwe.

³ Ichitima chizapo ukuchila ukuseka, pakuti ichitima chikupa ubwiza mumoyo uwa muntu.

⁴ Umoyo uwa muntu uwamahala ghukwinong'onagha nizya bufwe, loli umoyo uwa mupunganu ghukwinong'onagha nizya kwilagha.

⁵ Chizapo nkani pakwivwila nanti umuntu uwamahala akukuchemela, ukuchila pakuteghelezya inyimbo izya bapunganu.

⁶ Ngati kupunta ukwa mivwa pamoto, kuyanite bulo nukuseka ukwa mupunganu. Vyope vinivi vite ni mbombo.

⁷ Ukubayivya abanji kukumupela umuntu uwamahala pakuba mupunganu, sona amabeko ghakughunanga umoyo uwa muntu.

⁸ Ubumalilo ubwa chintu chimo bwizapo ukuchila ubwandilo bwache, ubufisalyoyo bwizapo ukuchila amituvyo.

⁹ Utakakalalaye lubilolubilo, pakuti ukukalala kwa bapunganu.

¹⁰ Utakalalusyanje ukuti, “Nkimba choni chicho amasiku aghakale mizapo ukuchila amasiku agha ilelo?” Pakuti te chamahala pakulalusya amalalusyo ghanagha.

¹¹ Amahala miza ngati mpyana bulo, sona miza ku bantu babo bakwikala pachisu ichapasi.

¹² Indalama zili ngati ko kazundila, umwakuyana bulo amahala ghali ngati ko kazundila. Loli ubwiza ubwa mahala bwakuti ghakubusungilila ubumi uwa muntu yuyo ali nagho.

¹³ Inong'ona zizyo u Chala abomba. Nkimba wewenu yuyo angachigholosya chicho chinyonganite?

¹⁴ Uhobokaye nanti ivintu vikukwendela akiza, loli nanti ivintu vikukwendela akabibi, winong'onayepo zimo. Umanyaye ukuti we Chala akumupa umuntu ulusako ni chighune, po umuntu atangazyaghannya izya muntazi yache.

¹⁵ Mubumi bwane ubu bubo bute ni mbombo nayimoyimo navyennya ivintu vibili ivi: Umuntu umugholosu akuzimila pachifukwa icha bugholosu bwache, sona umuntu umubibi akwikala nubumi ubutali nkani mumbibi zyache.

¹⁶ Utakabanje we mugholosu nkani pamo we wamahala nkani. Nkimba choni chicho winangaye wemwene?

¹⁷ Utakabanje we mubibi nkani pamo we mupunganu. Nkimba choni chicho ufwanje bo akabalilo kako katakwanite?

¹⁸ Chizapo pakulemezya ichintu choka, nukuchilekelezya ichinji. Umuntu yuyo akumuchindika u Chala akwiza pakuba navyo vyosi vibili vinivi.

¹⁹ Amahala ghakumupela umuntu pakuba na maka nkani ukuchila abamwene 10 aba mukaya akakulu nkani.

²⁰ Atalipo nayumoyumo umuntu umugholosu pachisu ichapasi, yuyo akubomba ingolosu zyene, sona atakunangapo nalumo.

²¹ Utakateghelezyanje zyosi zizyo abantu bakunena, lumo ungivwa ukuti uwambombo wako akusamula.

²² Pakuti nawe bulo uzimenye namumo ukabaghunilagha abanji.

²³ Nkaviyezya vyosi vinivi na mahala ghane, Po nkati, “Indi imbanje ne wamahala.” Loli ghakaba kubutali nane.

²⁴ Nkimba wewenu yuyo angaghagha amahala, pakuti amahala mibibizu nkani, sona mapalapala pakughaghannya?

²⁵ Po nkiyula nkani pakughivwisya, nukubuzikizya, sona nukughalondelezya amahala. Nkalondagha ukuti imanye ubibi ubwa bupunganu sona nu bwachipena.

²⁶ Nkachagha ichintu chimo chakubaba nkani ukubuchila ubufwe, umukolo yuyo umoyo wache ghuli ngati cho chipingo, sona inyobe zyache zili ngati bo bunyololo. Umuntu yuyo akumuhobosya u Chala akumuleghuka umukolo yunuyu, loli umuntu umubibi akulemiwa ni chipingo chache.

²⁷ Umulumbilili akuti, “Ennya izi zyo zizyo nkazyagha umwakuti imanye mumo ivintu vibeleye.

²⁸ Bo inchili nkulondelezya, nkamwagha umwanavuli umugholosu weka bulo pakasi pa banavuli 1,000 loli intakamwaghapo nayumoyumo umukolo umugholosu pakasi pa bakolo bosi bala.

²⁹ Ichintu choka chinichi chicho nachagha chakuti: U Chala akamupela umuntu pakuba mugholosu, loli umuntu ipelite mwene pakuba mubibi.”