Umulumbilili 6 - IBAYIBOLO 2024

¹ Chilipo sona ichintu ichibibi chicho nachennya pachisu ichapasi chicho chikubatamya nkani abantu.

² U Chala akumupa umuntu ubukabi nu katundu nu muchizi umwakuti atakusobelwapo ichintu nachimochimo chicho akuchinyonywa, loli u Chala atakumwitikizya ukuti ilaghaye ivintu vinivi, sona umuntu umuyeni bulo weyuyo akwilagha. Chinichi chite ni mbombo sona chikupelela bulo ichitima.

³ Umuntu angaba na bana 100 nukwikala nubumi amaka aminji nkani, pope bulo chite ni mbombo nanti akwikala nubumi ubutali, nanti atakwilagha ubukabi bwache, sona nanti atakusyiliwa akiza. Po nkuti umwana yuyo atapapiwe mwizapo ukumuchila umuntu yulayula.

⁴ Butalimo ubwiza nabumobumo mu kabonda kako kafuye, po itabwa ilya kabonda kala we kwinjila muchisi nukusyilwa mulamula.

⁵ Napapo akabonda kala katakalyennya izuba, pamo ukuchimanya ichintu nachimochimo, loli kakutuzyapo ukumuchila umuntu yulayula,

⁶ nanti angikala nubumi amaka 2,000 loli nukupotwa pakwilagha ubukabi bwache. Nkimba bosi babili banaba batakubuka kubuzilo boka?

⁷ Umuntu akubomba imbombo inkafu ukuti alyesye umulomo wache, loli atakwikuta umwakufikapo.

⁸ Nkimba umuntu uwamahala amuchilite bulibuli umupunganu, sona umupina akukabapo ichoni pakuba ni nkalo inyiza pamaso pabantu abanji?

⁹ Chiza nkani pakuvyennyanga bulo ivintu na maso, ukuchila pakuba ni chinyonywa. Chope chinichi chite ni mbombo nayimoyimo, ko kuyimba bulo.

¹⁰ Ichintu chosi chicho chiliko akachita kale itabwa, sona mumo muntu abeleye chimanyikitwe kale. Atalipo nayumoyumo yuyo angadalinkana nu muntu yuyo amupotite amaka.

¹¹ Nanti ivyakunena vyaba vyinji nkani, kokuti vyope ivyamwalwemwalwe vikuba vyinji. Po nkimba umuntu akukabapo ichoni?

¹² Nkimba wewenu yuyo achimenye ichintu ichiza mubumi ubwa muntu bo ali mumasiku amapimpa na masita mbombo agha bumi bwache, bo akuzyebeluka bulo ngati muzyezye? Nkimba wewenu yuyo angamubuzya zizyo zikwiza pakubombiwa pachisu ichapasi bo afuye?