Umulumbilili 5 - IBAYIBOLO 2024

Umuchindikaye u Chala

¹ Uchebaye nkani bo ukwinjila mu Nyumba iya Chala. Palamila ukuti uteghelezye ukuchila pakubika ichakwiyipa ichakuyana na chicho abapunganu bakubika, babo batakumanya ukuti bakunanga.

² Utakachimbililaye pakunena, utakafingaye mwalwemwalwe pamaso pa Chala. U Chala ali kumwanya, awe uli pachisu ichapasi, po utakanenaye amazyu aminji.

³ Nanti intamyo nyinji, kokuti vyope ivilota vikuba vyinji, po momumo kabeleye akanenele aka mupunganu.

⁴ Nanti ukulapa pamaso pa Chala, utakakabaye pakukwanilisya ichilapo chako. Pakuti abapunganu batakumuhobosya u Chala. Po kwanilisya ichilapo chako.

⁵ Chizapo ukuti utakalapaye ukuchila ukuti ulape loli upotwe pakukwanilisya ichilapo chako.

⁶ Umulomo wako ghutakakwinjizyanje mumbibi umwakuti pisinda pache umubuzye umuputi ukuti, “Yame sunga bulo.” Nkimba choni chicho u Chala akukalalilaye pazizyo wanena nukuzinangannya imbombo zizyo wabomba?

⁷ Ivilota ivyinji sona na mazyu aminji vite ni mbombo nayimoyimo. Polelo umuchindikaye u Chala.

Ubukabi bute ni mbombo nayimoyimo

⁸ Utakaswighaye nanti ukubennya abapina bakuyiviwa muchisu, nanti abantu bakubunyongannya ubwanaloli. Pamwanya pavyosi umuntu yuyo ali pasi pa balongozi akubomba vyosi vivyo abasongo bache bamulamula ukuti abombaye.

⁹ Pakuti abantu bosi aba mukaya bakusenda inyinulo, nkaninkani u mwene weyuyo akukaba nkani ni nyinulo yilayila.

¹⁰ Umuntu yuyo azighanite indalama, atakwikuta nazyo, sona yuyo abughanite ubukabi, atakwikuta na vivyo akuvyagha. Vyope vinivi vite ni mbombo nayimoyimo.

¹¹ Nanti ubukabi bwabala, imilomo yope yikuba yinji. Po nkimba umwenecho akukabapo ichoni? Nkimba te ko kuvyennya bulo?

¹² Utulo utwa waganyu tukunona, napapo angalya panadi pamo nkani, loli umukabi atakughona utulo.

¹³ Chilipo ichintu chachitima nkani chicho nachennya pachisu ichapasi. Ubukabi bubo bukamuvulazya umwenecho,

¹⁴ pamo ubukabi bubo bukumala pachifukwa icha chighune, umwakuti nanti ali na bana, umuntu yulayula atakuba nacho nachimochimo ichakubalekela abana bache.

¹⁵ Umuntu akapapiwa nkule muchisu ichapasi, po akwiza pakwepamo ngati mumo akizila. Atakwiza pakusendapo nachimochimo pavintu vyosi vivyo akabomba umwakwiyula.

¹⁶ Chope chinichi chintu chachitima nkani ichakuti umuntu akubuka ngati mumo akizila. Po nkimba akukabapo ichoni, akiyula pabulo?

¹⁷ Amasiku ghache ghosi agha bumi bwache gha chisi, gha chitima, gha ntamyo, gha mayimba, sona nu bubine.

¹⁸ Po nkazyaghannya ukuti chintu ichiza ukuti umuntu alyanje, ang'welaye, sona ilaghaye imbombo zizyo akubomba umwakwiyula pachisu ichapasi mumasiku amanandi ghagho u Chala amupiye, pakuti ughu gho muvwalo wache.

¹⁹ Lumo u Chala akumupa umuntu ubukabi pamo ukatundu, nukumwitikizya ukuti ilaghaye navyo, nukupokela umuvwalo wache ukuti ilaghaye, sona nukuhoboka ni mbombo zyache zyosi. Ichi cho chabupi icha Chala

²⁰ Umuntu yunuyu atakwinong'ona nizya masiku agha bumi bwache, pachifukwa ichakuti u Chala akumwizuzya nu buhobosu mumoyo wache.