Umulumbilili 4 - IBAYIBOLO 2024

¹ Nkaghennya sona amayimba ghagho ghakaba pachisu ichapasi. Nkaghennya amasozi agha bantu abakuyiviwa, po bate nu wakubasangalusya. Abakubayivya bakaba na maka nkani, sona bate nu wakubasangalusya.

² Nkadumula ukuti abantu abafwe, babo bafuye kale, bakuhoboka ukubachila abantu babo bachili bumi,

³ Loli yuyo achilite bosi banaba weyuyo achili atapapiwe, yuyo atazyenizyepo imbibi zizyo zikubombiwa pachisu ichapasi.

⁴ Po nkazyaghannya ukuti imbombo zyosi inkafu sona ni mbombo izya bwafundi zikubombiwanga pachifukwa icha kabini kako umupalamani ali nako pa wamwabo. Vyope vinivi vite ni mbombo, sona ko kuyimba bulo.

⁵ Umupunganu akulepeka inyobe zyache nukwinangannya mwene.

⁶ Chizapo pakuba ni vintu vivyo vizule muchikufi choka nukuba mumutende ukuchila ukwizula muvikufi vyosi vibili vinivi vite ni mbombo.

⁷ Nkachennya sona ichintu chimo chicho chite ni mbombo nayimoyimo pachisu ichapasi:

⁸ Pakabapo umuntu yumo yuyo akaba bulo mwene atakaba nu mwana pamo uwamwabo. Atakalekagha pakwiyula, loli atakikutagha nu bukabi bwache. Akilalusya akati, “Nkimba nkumuyimbila uwenu, sona nkimba choni chicho nkwiyima nemwene ukwilagha?” Vyope vinivi vite ni mbombo nayimoyimo, ko kuyimba bulo.

⁹ Chizapo pakuba babili ukuchila pakuba wemwene, pachifukwa ichakuti imbombo yiyo bakubomba abantu babili yikuchila iya muntu weka.

¹⁰ Nanti weka awa, umumanyani wache angamunyamusya. Loli chachitima nkani nanti umuntu yuyo ali weka awa, loli ate nu wakumunyamusya!

¹¹ Nanti abantu bakughona babili, bakutukizannya. Nkimba umuntu weka angatukila bulibuli?

¹² Umuntu weka bangamupota, abantu babili bangimilana. Ulupote ulwa nkusa zitatu lutakudumuka lubilolubilo.

¹³ Chizapo pakuba mulumendo umupina loli uwamahala ukuchila pakuba we mwene umughosi umupunganu, yuyo atakulonda pakumanyisiwa amahala.

¹⁴ Chingabombiwa ukuti umulumendo asatuliwe mujele nukuba we mwene, pamo ukuti akapapiliwa mubupina nukuba we mwene.

¹⁵ Nkennya ukuti abantu bosi babo bakwikala pachisu ichapasi, bakamukonka umulumendo yuyo akwiza pakupyana ubumwene bula.

¹⁶ U mwene angabalaghila abantu babo batangabelengiwa, loli nanti epapo, atalipo umuntu nayumoyumo uwakumupala pazizyo akabomba. Vyope vinivi vite ni mbombo nayimoyimo, ko kuyimba bulo.