Umulumbilili 3 - IBAYIBOLO 2024

Akantu kosi kali na kabalilo kache

¹ Pakuti kosi kako kakuboneka pachisu ichapasi kakuboneka pakabalilo kako u Chala akasala.

² Pali akabalilo kupapiwa na kabalilo akakufwila. Pali akabalilo akakubyalila na kabalilo akakunyunkulila.

³ Pali akabalilo akakughoghela na kabalilo akakupozezya. Pali akabalilo akakumongolannya na kabalilo akakuzengela.

⁴ Pali akabalilo akakulilila, na kabalilo akakusekela. Pali akabalilo aka chitima, na kabalilo akakwimbila.

⁵ Pali akabalilo akakusumbila amabwe, na kabalilo akakubunganizizya amabwe. Pali akabalilo akakubila poka, na kabalilo akakusatila.

⁶ Pali akabalilo akakulondela, na kabalilo akakutaghila. Pali akabalilo akakusungila na kabalilo akakusumbila.

⁷ Pali akabalilo akakusonela, na kabalilo akakuzepulila. Pali akabalilo akakupuma bulo, na kabalilo akakunenela.

⁸ Pali akabalilo akakughanila, na kabalilo akakubengela. Pali akabalilo aka bwite, na kabalilo akamutende.

⁹ Nkimba umuntu akukabapo ichoni pambombo zyosi zizyo akwiyula pakubomba?

¹⁰ Nazyennya imbombo inkafu zizyo u Chala amupiye umuntu ukuti ikolezannyanje nazyo.

¹¹ Avipela ivintu vyosi ukuti vibonekaye akiza nkani pakabalilo kache. Abikamo mumoyo uwa muntu ivyabumi ubwa bwila na bwila, loli umuntu atakuvimanya umwakufikapo vivyo u Chala abomba ukwanda po pabwandilo mupaka po pabumalilo.

¹² Inzimenye ukuti chitalipo nachimochimo ichintu ichiza pabumi ubwa muntu chicho chingachila ukusekela nukwilagha.

¹³ Pamwanya pavyosi, u Chala amupiye umuntu ichabupi ichakuti alyanje, nukung'wela sona nukuti ahobokaye ni mbombo zyosi zizyo akubomba.

¹⁴ Inzimenye ukuti chosi chicho u Chala akubomba chikubanga cha bwila na bwila. U Chala akubomba bunubu umwakuti umuntu amuchindikaye.

¹⁵ Ichintu chosi chicho chiliko, chikabako kale, sona chicho chikwiza pakubangako chikabako kale. Po u Chala akupyanizya ivintu vinivi ukuti vibanjeko sona.

Pachisu ichapasi pate umutende

¹⁶ Ichintu choka chicho nachennya pachisu ichapasi chakuti, papo pali ubulongi ubwanaloli pali ububibi sona papo pali ubugholosu, ububibi bope buli palapala.

¹⁷ Po nkinong'ona ukuti, “U Chala akwiza pakumulonga umuntu wesi umugholosu nu mubibi, pakuti ali na kabalilo akakubombela imbombo yosi sona ni mbombo izyakulekanalekana.”

¹⁸ Nkinong'ona sona ukuti, “U Chala akubayela abantu umwakuti bamanye ukuti bayanite bulo ni vinyamana.

¹⁹ Ivintu vivyo vikumuwila umuntu vyo vivyo vikuwila ivinyamana. Ngati mumo ichinyamana chimo chikufwila, momumo ichinji chikufwila, vyosi vikufuta umuyi uwakuyana bulo, umuntu atachichilite ichinyamana. Vyosi vite ni mbombo nayimoyimo.

²⁰ Vyosi vibibi vikubuka kubuzilo boka. Vyosi vikafuma kwitope, po vikwiza pakunyokela kwitope kulakula.

²¹ Nkimba wewenu yuyo azimenye nanti umuzimu uwa muntu ghukukwela kumwanya, sona nanti umuzimu uwa chinyamana ghukwika pasi pachisu?”

²² Po nkennya ukuti chitalipo ichintu ichizapo ku muntu ukuchila ukwilagha imbombo zyache, pakuti gho muvwalo wache. Atalipo nayumoyumo yuyo angachimanya chicho chikubombiwa nanti afwa.