Umulumbilili 2 - IBAYIBOLO 2024

Ukwilagha kute ni mbombo

¹ Nkinong'ona nkati, “Nilaghayepo nukwihobosya ne mwene.” Loli vyope vite ni mbombo nayimoyimo.

² Nkati, “Ukuseka kope bo bupunganu. Nkimba ukwilagha ubumi kukumukabila ichoni umuntu?”

³ Nayezyanga pakwihobosya nemwene nu vinyo, pope bulo nkabomba ivyabupunganu. Nkinong'ona ukuti lumo yiniyi yingaba zila iyapamwanya, yiyo abantu bakuyikonka umwakuti bangahoboka pakabalilo akapimpa aka bumi bwabo.

⁴ Nkabomba imbombo inyinji nkani. Nkizengela inyumba nukulima amaghunda agha mampesya.

⁵ Nkalima amaghunda, nukubyala amakwi, nkabyalamo ivikomwa ivyakulekanalekana.

⁶ Nkakumba ichiziba ichikulu nkani umwakuti insembelelaye amaghunda agha makwi ghagho nkabyala.

⁷ Nkaghula abazya abanavuli na bakolo, sona nkaba na bazya abanji, babo bakapapiliwa munyumba yane. Nkaba sona ni midimo imyinji iya ng'ombe ni ng'ozi ukubachila abantu bosi babo bakabapo kale mu Yelusalemu.

⁸ Nkibunganikila usiliva nu golide nu bukabi ubwa bamwene babo bakaba pasi papane. Nkaba na bimbi abanavuli na bakolo babo bakanyimbilagha, sona na balindu babo bakaghasangalusyanga amoyo agha banavuli.

⁹ Naloli nkaba ne muntu umumanyikwe nkani ukubachila abantu bosi babo bakabamo kale mu Yelusalemu. Pamwanya pavintu vyosi vinivi amahala ghane ghatakanchimbila.

¹⁰ Ichintu chosi chicho nkachinyonywanga nkaba nacho, intakaghukanizyapo umoyo wane chosi chicho ghukalondagha. Pakuti umoyo wane ghukahoboka ni mbombo zyane, po bunubu ghukaba muvwalo uwa mbombo zyane izyakulisya.

¹¹ Loli bo ninong'ona umwakufikapo zizyo nkabomba, sona ni mbombo zizyo nkiyula pakubomba, nkagha ukuti vyosi vite ni mbombo. Intakukabapo nachimochimo pachisu ichapasi.

¹² Po nkanda pakwinong'ona nizya mahala, nizya bwachipena nu bupunganu. Nkimba u mwene uwakwiza pisinda papane angabomba choni ukuchila vivyo vitabombiwepo?

¹³ Po nkennya ukuti amahala mizapo ukuchila ubupunganu, ngati mumo ulukozyo lwiza ukuchila ichisi.

¹⁴ Umuntu uwamahala akwennya kuntazi, loli umupunganu akwenda muchisi. Pope bulo nkagha ukuti intamyo zikubawila bosi babili banaba.

¹⁵ Po nkinong'ona nkati, “Intamyo zizyo zikumuwila umupunganu, intamyo zilazila zyo zizyo zikwiza pakungwila nane bulo. Panapa nkukabapo choni pakuba ne muntu uwamahala?” Po nkinong'ona ukuti, “Vinivi vite ni mbombo nayimoyimo.”

¹⁶ Pakuti umupunganu nu wamahala bosi banaba batakukumbukiwa ukwa kabalilo akatali, sona abantu bakubaluvya bosi babili banaba. Ngati mumo akufwila umupunganu, momumo nu muntu uwamahala akufwila.

Ukubomba imbombo umwakwiyula kute ni mbombo

¹⁷ Po nkanda pakububenga ubumi, pachifukwa icha zizyo zikubombiwanga pachisu ichapasi vikumpelela bulo ichitima. Vyosi vite ni mbombo nayimoyimo, ko kuyimba bulo.

¹⁸ Nkazibenga imbombo zyosi zizyo nkabomba umwakwiyula pachisu ichapasi, pachifukwa ichakuti nkumulekela umuntu yuyo akwiza pisinda papane.

¹⁹ Po nkimba wewenu yuyo azimenye nanti umuntu yunuyu akwiza pakuba wamahala pamo mupunganu? Pope bulo ivintu vyosi vivyo nkavyagha umwakwiyula, sona na mahala ghane pachisu ichapasi vikwiza pakuba munyobe zyache. Vyope vinivi vite ni mbombo nayimoyimo.

²⁰ Po umoyo wane ghukanda pakupasya pachifukwa icha mbombo zyosi zizyo nabomba umwakuyimba pachisu ichapasi.

²¹ Pakuti umuntu angabomba imbombo na mahala nu bumanyi, sona nu bwafundi bwache, po vyosi akumulekela umuntu yuyo atakayimbilapo. Vyope vinivi vite ni mbombo nayimoyimo, sona vibibi nkani.

²² Nkimba umuntu akukabapo choni pambombo inkafu, sona nukupasya kwache kosi pachisu ichapasi?

²³ Amasiku ghache ghosi gha mayimba ni chitima bulo. Napo pabusiku inyinong'ono zyache zitakutuzyanga. Vyope vinivi vite ni mbombo nayimoyimo, awe.

²⁴ Ichintu ichiza nkani chicho umuntu angachibomba mubumi bwache ko kulya nukung'wela sona nukwilagha imbombo zyache. Nkwennya ukuti vyope vinivi vikufuma kwa Chala.

²⁵ Pakuti nanti u Chala atakabangako, nkimba wewenu yuyo angalya pamo ukwilagha?

²⁶ Umuntu yuyo u Chala ahobokite nawe, akumupa amahala nu bumanyi sona nu buhobosu. Loli umuntu uwa mbibi akumupa imbombo iyakubungannya ubukabi nukumusungila umuntu yuyo u Chala ahobokite nawe. Vyope vinivi vite ni mbombo nayimoyimo, ko kuyimba bulo.