Umulumbilili 12 - IBAYIBOLO 2024

¹ Umukumbukaye Umupeli mumasiku ghako agha bulumendo bwako, bo amasiku agha ntamyo ghatafikite, sona bo ghatapalamiye amaka ghagho ukwiza pakunena ukuti, “Intakwilagha ubumi.”

² Bo izuba, nulukozyo nu mwezi, ni ntondwa vichili pakulama, amabingu ghanyokela bo ivula yatima.

³ Bo abasungilili abanyumba bakutetema, sona bo abantu abamaka bakudedebala, bo abakusya palwala baba banandi nkani, sona babo bakunanamizya pibwindo bakwenennya akafobela,

⁴ bo imilyango iya kaya akakulu nkani yighaliliwe amakutu ghabo ghakwiza pakuba na mapuli batakwiza pakwivwa ichongo icha kusya, pamo ichongo icha tuyuni chikubalamusya, loli ichongo chache chikwivwika panandipanandi.

⁵ Ukwiza pakunyila pakukwela pighamba, pamo pakwenda pamusebo, sona bo ikwi ilya muposya lyanda pakubazya. Zikwiza pakubombiwa bo impazi yikwenda mulamula, sona bo umuntu ate sona ni vinyonywa. Bo umuntu abuka kukaya kache aka bwila na bwila, sona bo abantu abakulila bakwenda mumisebo.

⁶ Imbale iya siliva yikwiza pakusatuka, pamo bo imbale iya siliva yitafwantikite, pamo bo isonta iya golide yikufwantikila pachiziba.

⁷ Bo ulufumbi lukunyokela kwitope, sona umuzimu ghukunyokela kwa Chala yuyo akapela.

⁸ Umulumbilili akuti, “Vite ni mbombo nayimoyimo. Vyosi vite ni mbombo nayimoyimo.”

Amazyu aghabumalilo

⁹ Pamwanya apakuba na mahala, umulumbilili yula, akabamanyisya abantu. Akinong'onagha nukubuzikizya akiza nkani, po akavibika ivyili mulubatiko lwache.

¹⁰ Umulumbilili yula akabuzikizya nkani nizya mazyu aghenecho, po akaghasimba nu moyo umugholosu, sona nu wanaloli.

¹¹ Amazyu agha muntu uwamahala ghali ngati ndisa iya mudimi, sona vyope ivyili vyache vivyo bavibunganizye poka vili ngati mizumali imikomele nkani.

¹² Wee mwana wane, uchebaye nkani ni chintu chosi chicho chichilite panapa. Ukusimba amabuku kute nu bumalilo, sona ukumanyila nkani kukulisya umubili.

¹³ Losi ulu vyosi vyivwika. Po ifundo iyenecho yo iyi: Umuchindikaye u Chala nukughakonka amalamulo ghache pakuti iyi yo mbombo inkulu iya muntu.

¹⁴ Pakuti u Chala akwiza pakutulonga pambombo zyosi zizyo tukubomba sona ni zyakubusyefu bulo, manyi nyiza, manyi mbibi.