Umulumbilili 11 - IBAYIBOLO 2024

Imbombo izya muntu uwamahala

¹ Sumbila ichibama chako pamizi, pakuti bo pachilapo amasiku aminji ukwiza pakuchagha sona.

² Sunga indalama zyako mubuzilo ubwinji bulo, pakuti utachimenye ichintu ichibibi chicho chikwiza pakuwa pachisu ichapasi.

³ Nanti amabingu ghizuye na mizi, kokuti ghakutimizya ivula pachisu ichapasi. Napapo ikwi liwiliye kumitu pamo kuntende, likwiza pakulambalala kuko liwiliye.

⁴ Umuntu wesi yuyo akuyennya impepo atakubyala, umuntu wesi yuyo akughennya amabingu atakwinula.

⁵ Ngati mumo umuntu atayimanyiye izila iya mpepo pamo mumo umukolo akumelela ulwanda, po nawe bulo utazimanye imbombo izya Chala, yuyo Mupeli uwa vintu vyosi.

⁶ Pesa imbeyu zyako pandabindabi, sona pachamabwila utakalepekaye inyobe. Pakuti utayimenye yiyo yingakula akiza, pamo yo iyi pamo yo yila, pamo zyosi zikwiza pakukula akiza bulo.

Ubumanyisi pa balumendo na balindu

⁷ Ukulama kwiza, sona amaso ghakuhoboka nanti ghalyennya izuba.

⁸ Umuntu angikala nubumi amaka aminji, po ahobokaye. Loli akumbukaye ukuti amaka agha bufwe bwache ghakwiza pakuba minji nkani, Vyope vinivi vite ni mbombo nayimoyimo.

⁹ Wee mulumendo, uhobokaye bo uchili we mulumendo. Bombagha zizyo umoyo wako ghukulonda sona vivyo amaso ghako ghakuvyennya. Loli ukumbukaye ukuti u Chala akwiza pakukulonga pa zyosi zizyo ukubomba.

¹⁰ Po utakapasyanje ni chintu chimo, sona uvileghukaye vivyo vikughutamya umubili wako. Pakuti ubulumendo nubwana vyosi vinivi vite ni mbombo nayimoyimo.