Umulumbilili 10 - IBAYIBOLO 20241 Imbwele imfwe zikughapela amafuta aghakununkila pakuba nu munusi umubibi, umwakuyana bulo ubupunganu ubunandi bulo bungaghanangannya amahala nu muchizi. 2 Umoyo uwa muntu uwamahala ghukumulongozezya kuvintu ivyiza, loli umoyo uwa mupunganu ghukumulongozezya kuvintu ivibibi. 3 Nanti umupunganu akwenda mumusebo akwilanjizya mwene mumo abeleye sona muntu wesi azimenye ukuti we mupunganu. 4 Nanti umulongozi akukalaliye, utakepayepo pabuzilo bwako ubwa mbombo. Pakuti ubololo bukumazya ukupuvya ukukulu nkani. 5 Bulipo ububibi bumo bubo nabwennya pachisu ichapasi, bubo umulongozi akubomba. 6 Abapunganu bakupeghiwa ichitengo ichapamwanya, bo abakabi bakupeghiwa ichitengo ichapasi. 7 Nabennya abazya bakwenda pafalasi, bo abamwene bakwenda pasi ngati po bazya. 8 Umuntu wesi yuyo ukukumba ichiliba, akwiza pakuwilamo mwene. Umuntu wesi yuyo akupankula ulubumba, injoka yikwiza pakumuluma yuyo. 9 Umuntu wesi yuyo akusya amabwe, amabwe ghalaghala ghakwiza pakumuvulazya. Umuntu wesi yuyo akubandula ivizinka, ivizinka vilavila vikwiza pakumuvulazya. 10 Nanti intemo yibumpite sona nanti batayipyasizye, kokuti pakulondiwa amaka nkani pakuyibombezya, loli amahala ghakumwavwa umuntu pakuyibombezya akiza nkani. 11 Chite ni mbombo nayimoyimo pakuyangalila injoka, nanti injoka yila yamulumite kale umuntu yulayula. 12 Amazyu agha muntu uwamahala machindamu, loli umulomo uwa mupunganu ghakumunanga bulo umwenecho. 13 Umupunganu akwanda na mazyu amapunganu, pabumalilo bukuba bwachipena. 14 Umupunganu akunenagha bulo gho mazyu aminjiminji bulo. Atalipo nayumoyumo yuyo akumanya chicho chikwiza muntazi. Nkimba wewenu angamulingannya umuntu, chicho chikwiza pakubombiwa muntazi, bo afuye? 15 Ukwiyula ukwa mupunganu kukumulisya bulo, sona atayimenye izila iyakubukila kukaya akakulu. 16 Ughuniwanje awe we chisu chicho u mwene wako akaba muzya, sona chicho amakambala ghako ghakulyanga ulusekelo pandabindabi posi. 17 Wee musayiwa we ichisu chicho u mwene wache we mwana uwa muntu umumanyikwe, sona nanti amakambala ghache ghakulyanga pakabalilo kache umwakuti ghabanje na maka, te ukuti ghatakakolwanje, awe. 18 Ichisonje icha nyumba chikumongonkana nanti umwenecho mukata, sona inyumba yila yikutonyagha, nanti umwenecho mudedebazu. 19 Ulusekelo lukubahobosyanga bulo abantu, sona uvinyo akubasangalusyanga, Loli indalama lyo lyamulo ilya vintu vyosi. 20 Utakamusamulaye u mwene namo munyinong'ono zyako, pamo ukumughuna umukabi bo uli kuchipinda chako. Pakuti utuyuni tungaghasenda amazyu ghako, pamo ichakubuluka chimo chingabuka pakumubuzya amazyu ghagho wanena. |
Lambya Bible © Bible Society of Malawi, 2024.
Bible Society of Malawi