Umulumbilili 1 - IBAYIBOLO 2024

Ubumi bute ni mbombo

¹ Agha gho mazyu agha mulumbilili, umwana uwa Devedi, u mwene uwa kaya akakulu nkani aka Yelusalemu.

² Umulumbilili akati, “Vite ni mbombo. Vyosi vite ni mbombo! Naloli vyosi vite ni mbombo nayimoyimo.”

³ Nkimba umuntu akukabapo ichoni pambombo inkafu, zizyo akubomba pachisu ichapasi?

⁴ Inkulilo zikwiza, inkulilo zikubuka, loli ichisu chili bulabula bwila na bwila.

⁵ Izuba likufuma, izuba likwinjila, nukunyokela sona kuko likufumila.

⁶ Impepo yikukukila kuntende, yikunyokela sona kumitu, yikuzyungulilazyungulila, po yikunyokela kuko yikafumila.

⁷ Isoko zyosi zikupungulila amizi munyanja, loli inyanja yitakwizula nalumolumo. Kuko amizi ghakufumila, ghakunyokela sona kulakula.

⁸ Ivintu vyosi vikulisya ukuchila namumo umuntu anganenela. Amaso ghatakwikuta pakwennya, pamo amakutu ukwikuta pakwivwa.

⁹ Vivyo vikabako kale vikwiza pakubako sona, vivyo vyabombiwa kale vikwiza pakubombiwa sona. Chitalipo nachimochimo ichintu ichipya pachisu ichapasi.

¹⁰ Nkimba chilipo chimo chicho umuntu anganena ukuti, “Ennya, ichintu ichi chipya”? Ichintu chinichi chikabako kale, bo tutaliko, chikabako kale bo aswe tuchili.

¹¹ Ivyakale tutangavikumbuka, pamo ukuvikumbuka ivya muntazi. Inkulilo izya muntazi zitangavikumbuka.

Amahala ghate ni mbombo

¹² Ane ne mulumbilili nkabalaghilagha aba Izilayeli bo indi mu Yelusalemu.

¹³ Nkiyipa nkani pakuvimanyila nukwivwisya vyosi vivyo vikubombiwa pachisu ichapasi. Iyi yo mbombo inkafu nkani yiyo u Chala amunyamulisya umuntu.

¹⁴ Navyennya ivintu vyosi vivyo vikubombiwa pachisu ichapasi ukuti vyosi vite ni mbombo, sona ko kwitamya bulo.

¹⁵ Ichintu chicho chanyongana, chitangagholoka sona, ichintu chicho chitaliko chitangabelengiwa sona.

¹⁶ Nkinong'ona nkati, “Naba na mahala nkani ukumuchila umuntu wesi yuyo akalaghilapo mu Yelusalemu. Namanyila ivyinji nkani nukuba na mahala.”

¹⁷ Nkaba nu lweke pakwivwisya ukuti amahala cho choni, ubwachipena cho choni, sona ubupunganu cho choni. Loli nkazyaghannya ukuti vyope vite ni mbombo.

¹⁸ Pakuti pakuba na mahala aminji nkani kukupela ichitima nkani, amahala aminji ghakupela intamyo inyinji.