Ukukumbusya Amalamulo 9 - IBAYIBOLO 2024

Ukusita ukwivwila ukwa bantu

¹ Mwee ba Izilayeli, ivwa kuno! Ilelo muli papipi pakuloboka ulusoko ulwa Yolodani pakubachimbizya abantu abamaka nabakulu ukubachila. Utwaya twabo utukulu nkani tuli ni mpaso izyakufika kumwanya.

² Abantu aba mulamula bo baluko ulwa Anaki, babo bantu bamaka, sona batalibatali bene. Amwe mubamenye sona mwivuyepo nizya babo, “Nkimba wewenu yuyo angalwana na baluko ulwa Anaki?”

³ Loli ilelo muzimanye ukuti u Mwene u Chala winyu akwiza pakubalongolela ngati gho moto uwakulungulizya. Akwiza pakubapota nukubanangannya, umwakuti amwe mukwiza pakubachimbizya nukubanangannya ukuyana namumo u Mwene akabalayizizya.

⁴ Bo u Mwene u Chala winyu abachimbizya, mutakanenaye ukuti, u Mwene u Chala atupiye ukuti tuchifyule ichisu chinichi umwakuti twikalayemo pachifukwa ichakuti twe bagholosu. Awe, te momumo, loli pachifukwa ichakuti abantu balabala babibi nkani.

⁵ U Mwene u Chala winyu abitikizya pakubachimbizyamo nukwikalamo muchisu chabo, te pachifukwa ichakuti mwe bagholosu, pamo mwe biza awe, loli pachifukwa ichakuti abantu balabala babibi nkani, sona pachifukwa ichakuti akulonda pakukwanilisya ilayizyo lilyo akamulayizya umunyenya winyu u Abulahamu nu Yisaki, sona nu Yakobo.

⁶ Po muzimanye ukuti u Mwene u Chala winyu atakubapa ichisu icha mboto ichi, te pachifukwa ichakuti mwe bagholosu awe. Amwe mwe bantu aba moyo amakafu nkani.

⁷ Mukumbukaye namumo mukamukalalizizya u Mwene u Chala winyu munkolongo. Ukwandila pisiku lilyo mukepelaghamo mu Ijiputi mupaka pisiku lilyo mukafikila kuno, amwe mwamusambukila u Mwene.

⁸ Pighamba ilya Sinayi amwe mukamukalalizya nkani u Mwene umwakuti ngali akabanangannya.

⁹ Bo nakwela pighamba pakupokela amabwe amapapate mabili, ghagho pakasimbiwapo ulufingo lulo u Mwene akafingana namwe, ane nkikala palapala amasiku 40, umusanya nu busiku. Ntakalyapo pamo ukung'welapo ichintu nachimochimo.

¹⁰ Po u Mwene akampa amabwe amapapate mabili ghala, papo u Chala umwenecho akasimbapo ni nyobe iyache ni yache amalamulo ghosi ghagho akababuzya amwe bo ali mumoto, pisiku lilyo mukabungana pighamba.

¹¹ Pabumalilo ubwa masiku 40 ghalaghala, umusanya nu busiku, u Mwene akampa amabwe amapapate mabili ghala, papo akasimbapo ulufingo.

¹² Po u Mwene akambuzya akati, “Nyamuka, ika lubilolubilo, pachifukwa ichakuti abantu bako babo ukabefya mu Ijiputi binyazya bene. Bakayileka lubilolubilo izila iya Mwene umwakuti bipangila bene ichifwani.”

¹³ U Mwene akambuzya sona akati, “Imbamenye abantu banaba, naloli amoyo ghabo makafu nkani.

¹⁴ Mutakankanizye, nkulonda pakubanangannya nukughazimya amatabwa ghabo muchisu ichi. Po nkwiza pakukupela awe pakuba luko ulukulu nu lwamaka, sona mukwiza pakuba mwe binji nkani ukubachila abene.”

¹⁵ Po nkaghalabuka nukwika pighamba pala, bo ighamba likwaka umoto, sona bo inyamuye munyobe zyane amabwe amapapate mabili papo pakasimbiwapo ulufingo.

¹⁶ Po nkennya ukuti amwe mukamunangila kale u Mwene u Chala winyu pakwipangila mwebene ichifwani icha ngwata. Mukayileka lubilolubilo izila iya Mwene u Chala winyu.

¹⁷ Palapala nkaghasumbila pasi amabwe amapapate mabili, ghagho ghakaba munyobe zyane, po ghakamenyunkana, bo amwe mukwennya na maso ghinyu.

¹⁸ Nkafughama sona pamaso pa Mwene nukwiputa amasiku 40, umusanya nu busiku. Ntakalyapo pamo ukung'welapo ichintu nachimochimo, pachifukwa ichakuti amwe mukamunangila u Mwene nukumukalalizya.

¹⁹ Ane nkanyilagha ubukali ubwakoghofya ubwa Mwene pakuti akabakalalila nkani umwakuti ngali akabanangannya. Loli pope bulo u Mwene akivwa inyiputo zyane.

²⁰ U Mwene akamukalalila u Aloni umwakuti ngali akamughogha. Loli ane nkamwiputila nu Aloni bulo pakabalilo kalakala.

²¹ Ane nkachisenda ichintu icha mbibi zyinyu, ingwata yiyo mukipangila mwebene nukuyocha. Nkachisya nukulisumbila itoyi lyache mulusoko, lulo lukendagha muntende mwighamba.

²² Amwe mukamukalalizya sona u Mwene u Chala winyu bo muli pa Tabela napa Masa, sona napa Kibuloti Hatava.

²³ Bo u Mwene abatuma, bo muli pa Kadeshi Balineya, akababuzya akati, “Bukagha mwikalaye muchisu chicho nabapa.” Loli amwe mukakana pakwivwila zizyo Mwene u Chala winyu akabalamula. Amwe mutakamusubila pamo ukumwivwila.

²⁴ Amwe mwamusambukila u Mwene ukwandila pakabalilo kako nkabamanyilagha.

²⁵ Ichi cho chifukwa nkafughama pamaso pa Mwene nukwiputa amasiku 40, umusanya nu busiku, pakuti u Mwene akalondagha pakubanangannya.

²⁶ Po nkiputa nkati, “Wee Mwene Uwamaka Ghosi, utakabanangannye abantu bako, babo yo mpyana iyako ni yako, abantu babo ukabapoka mu Ijiputi na maka ghako amakulu.

²⁷ Umukumbukaye umubombi bako u Abulahamu nu Yisaki, sona nu Yakobo. Utakabikilayeko nu moyo kubukafu ubwa moyo agha bantu banaba nu bubibi, sona ni mbibi zyabo,

²⁸ lumo aba Ijiputi bala bangati, ‘U Mwene akapotwa pakubinjizya abantu bache muchisu chicho akabalayizya, sona nukuti ababengite, cho chifukwa akabefyamo muchisu chila ukuti abaghoghele munkolongo.’

²⁹ Loli pope bulo abantu banaba bantu bako na bako, yo mpyana yako, sona babo ukabefya mu Ijiputi na maka ghako amakulu.”