Ukukumbusya Amalamulo 8 - IBAYIBOLO 2024

Ichisu icha mboto

¹ Mwenelezye ukuti mukughakonka amalamulo ghosi ghagho nkubapa, umwakuti mubanje nubumi ubutali nukupapana nkani, sona nukuti mwinjile nukwikala muchisu chicho u Mwene u Chala winyu akabalayizya abanyenya binyu.

² Mukumbukaye namumo u Mwene u Chala winyu akabalongolela munkolongo amaka 40 pakubawisizya amayimba ukuti abayelaye umwakuti aghamanye amoyo ghinyu nanti mungaghakonka amalamulo ghache.

³ Akabaleka nizala, po pisinda pache akabapa umana ukuti balyanje, ichakulya ichakuti amwe, pamo abanyenya binyu mutakachilyapo nalumolumo. Akabomba bunubu pakubamanyisya ukuti umuntu atangikala nubumi ni chakulya chene, loli na mazyu ghosi ghagho u Mwene akunena.

⁴ Amaka ghosi 40 ghanagha amenda ghinyu ghatakazepunkanapo, sona zyope ni nyayo zyinyu zitakizulapo.

⁵ Po mukumbukaye ukuti u Mwene u Chala winyu akabafunda ukuyana namumo uwise akumufundila umwana wache.

⁶ Polelo mubombaye vivyo u Mwene u Chala winyu akubalamula, mukonkaye amalamulo ghache, sona mumunyilaye.

⁷ U Mwene u Chala winyu akubinjizya muchisu icha mboto, chicho chili ni soko ni viziba ivya mizi sona ni mbwibwi mumakombe na mumaghamba bulo.

⁸ Ichi cho chisu icha ingano nicha mapemba nicha mampesya nicha makuyu nicha manyele nicha misyunguti sona nicha buchi.

⁹ Muchisu chinichi ivibama vikwiza pakwaghiwa mwalwe, sona mutakwiza pakusobelwapo nakamokamo. Muchisu chinichi mukwaghiwamo ivyela na mabwe sona mukwiza pakukumbamo umukuba mumaghamba.

¹⁰ Bo mwalya nukwikuta, mumupalizyanje u Mwene u Chala winyu pachifukwa icha chisu icha mboto chicho abapiye.

Akubasoka ukuti bakatamuluvyanje u Mwene

¹¹ Mwenelezye nkani ukuti mutakamuluvyanje u Mwene u Chala winyu. Mutakapotwe pakughakonka amalamulo ghache ni ndaghilo zyache zizyo nkubapa ilelo.

¹² Bo mwalya nukwikuta, sona bo mwazenga inyumba inyiza izyakuti mwikalayemo,

¹³ sona bo ing'ombe, ni ng'ozi zyanyamana, sona bo usiliva nu golide winyu aba mwinji, sona bo vyosi vivyo muli navyo vyaba vyinji,

¹⁴ mwenelezye nkani ukuti mutakwituvya nukumuluvya u Mwene u Chala winyu, yuyo akabefyamo mu Ijiputi mumo mukaba mwe bazya.

¹⁵ U Mwene akabalongolela munkolongo inkulu nkani ni yakoghofya yila, mumo mutakaba amizi, sona mukaba injoka izya bwanga na bankonya. Akabapa amizi aghakufuma mwilyalabwe.

¹⁶ Akabapa umana ukuti mulyanje, ichakulya chicho bope na banyenya binyu batakachighonjapo nalumolumo. Akabatumila intamyo pakubayela amwe, umwakuti pabumalilo bwache abasaye nukubabombela ivintu ivyiza.

¹⁷ Polelo muchebaye nkani, mutakatinji, “Na mahala ghitu, sona maka aghitu na ghitu twabwagha ubukabi bosi bunubu.”

¹⁸ Loli mukumbukaye ukuti we Mwene u Chala winyu yuyo akubapa amaka aghakuti mubanje nu bukabi. Akabomba bunubu pachifukwa ichakuti atakalondagha pakulunangannya ulufingo lwache, lulo akalapa kubanyenya binyu ukuyana namumo vibeleye nilelo.

¹⁹ Mutakamuluvyanje u Mwene u Chala winyu nukubakonka abachala abanji ukuti mubiputaye. Ane ne kaboni winyu ukuti nabasoka ilelo, po mukwiza pakunanganika.

²⁰ Nanti mutakumwivwila u Mwene u Chala winyu, akwiza pakubanangannya ukuyana namumo akabananganizizya abantu aba inko izinji, bo mukwennya na maso.