Ukukumbusya Amalamulo 7 - IBAYIBOLO 2024

Abantu abache na bache aba Mwene

¹ Bo u Mwene u Chala winyu akubafisya muchisu chicho mukwiza pakwikalamo, sona nanti abachimbizyamo aba Hiti naba Giligashi naba Amoli naba Kenani naba Pelezi naba Hivi sona naba Yebusi, inko zizyo zyamaka akaseveni ukubachila amwe,

² sona nanti u Mwene u Chala winyu ababika munyobe zyinyu sona mwabapota, po mubazimizyanje bosi. Mutakafingane nabo ulufingo, sona mutakabapelelaye ichisa.

³ Mutakasendanaye nabo, sona mutakabitikizyanje abana binyu ukuti basendane na bana babo,

⁴ pachifukwa ichakuti bangabapuvya abana binyu ukuti bamuleke u Mwene nukubiputa abachala abanji. Po u Mwene akwiza pakubakalalila nukubanangannya panapo na panapo.

⁵ Loli muvinangannye ivighemo vyabo, nukumongolannya amabwe ghabo amapaghuliwa, sona nukughadumulannya amakwi ghabo aghakwiputilapo u Ashela nukuvyocha ivifwani vyabo vyosi.

⁶ Pakuti amwe mwe bantu abache na bache aba Mwene u Chala winyu. U Mwene akabasala amwe pakasi pabantu bosi aba muchisu ichapasi ukuti mubanje bantu bache.

⁷ U Mwene atakabaghana sona atakabasala pachifukwa ichakuti mukaba binji ukubachila abantu abanji bosi, awe. Amwe mukaba luko ulunandi nkani pakasi pabantu bosi aba muchisu ichapasi.

⁸ Loli chikaba chifukwa ichakuti u Mwene akabaghana, sona nukuti akalondagha ukuti ilayizyo lilyo akabalayizya abanyenya binyu ilyakuti akwiza pakubapoka amwe kubuzya na maka ghache amakulu nkani munyobe izya Falabo uwaku Ijiputi.

⁹ Polelo mumanye ukuti u Mwene u Chala winyu we Chala, sona we musubiliwa umwakuti akwiza pakulusunga ulufingo ulwakulanjizya ulughano lwache pa nkulilo amasabuzani izya bantu babo bamughanite nukukonka amalamulo ghache.

¹⁰ Loli atakuzyela pakubafunda nukubanangannya abantu babo bamubengite.

¹¹ Polelo mukonkaye amalamulo ni ndaghilo zyosi zizyo nkubapa ilelo.

Ulusayo pachifukwa ichakwivwila

¹² Nanti mukughakonka amalamulo ghosi ghanagha na moyo ghinyu ghosi, u Mwene u Chala winyu akwiza pakulusunga ulufingo ulwakulanjizya ulughano lwache lulo akafingana namwe, ukuyana namumo akalapila na banyenya binyu.

¹³ U Mwene akwiza pakubaghana nukubasaya amwe umwakuti munyamane nkani nukuba na bana abinji nkani. Amaghunda ghinyu ghakwiza pakusayiwa, umwakuti mukwiza pakuba ni ngano nu vinyo, sona na mafuta agha misyunguti, sona akwiza pakubasaya pakubapa ning'ombe inyinji nkani, ni ng'ozi inyinji nkani muchisu chicho akabalayizya abanyenya binyu.

¹⁴ Amwe mukwiza pakuba mwe basayiwa nkani ukuchila abantu bosi aba muchisu chosi ichapasi. Atakwiza pakubapo nayumoyumo umwanavuli pamo umukolo yuyo akwiza pakuba mughumba pakasi papinyu, sona na pakasi pa vitekwa vyinyu.

¹⁵ U Mwene akwiza pakwefyapo ububine bosi pakasi papinyu, sona atakwiza pakubawisizya nalumo nu bubine ubupalapala bubo mukabumanya mu Ijiputi, loli akwiza pakubawisizya ububine bunubu abalwani binyu.

¹⁶ Muzinangannye inko zyosi zizyo u Mwene u Chala winyu azibika munyobe zyinyu. Mutakabapelelaye ichisa, sona mutakabiputaye abachala babo, pakuti chinichi chikwiza pakuba chipingo.

¹⁷ Mutakinong'onaye ukuti, “Abantu banaba bamaka nkani ukutuchila. Nkimba tungabachimbizya bulibuli?”

¹⁸ Loli mutakabanyilaye. Mukumbuke zizyo u Mwene u Chala winyu akamubombela u Falabo, poka na bantu bache bosi.

¹⁹ Na maso ghinyu mukennya ivyika ni viswigho, sona na maka amakulu ghagho u Mwene u Chala winyu akabombezya pakubefyamo mu Ijiputi. U Mwene u Chala winyu akwiza pakubabombela bunubu abantu babo mukubanyila.

²⁰ Ukonjelezyapo u Mwene u Chala winyu akwiza pakubavulungannya, mupaka abantu bosi babo bakuvwama, bazimile bosi.

²¹ Mutakabanyilaye abantu banaba, pakuti u Mwene u Chala winyu ali namwe. U Chala mukulu, sona weyuyo mumunyilaye.

²² U Mwene u Chala winyu akwiza pakuzichimbizyamo inko zyosi panandipanandi. Amwe mutangabazimizyamo bosi pakabalilo koka, lumo ivinyamana vinganyamana nkani nukuboghofya.

²³ U Mwene u Chala winyu akwiza pakubabika abalwani binyu munyobe zyinyu, sona akwiza pakubavulungannya mupaka bosi mubanangannye.

²⁴ Akwiza pakubabika abamwene babo munyobe zyinyu, po amwe mukwiza pakughazimya amatabwa ghabo muchisu ichapasi. Atalipo nayumoyumo yuyo akwiza pakubakanizya, mupaka mubanangannye bosi.

²⁵ Muvyoche ivifwani vyabo vyosi, sona mutakamunyonywanje usiliva, pamo u golide wabo. Mutakavisendaye, lumo vingaba chipingo, pakuti vyo vyamwiko pamaso pa Mwene u Chala winyu.

²⁶ Mutakinjizyanje ivintu ivyamwiko vinivi munyumba zyinyu, ichighune chicho chili papabo chingabawila namwe. Muvibenge nukuvisula ivifwani vinivi pakuti u Mwene avighunite.