Ukukumbusya Amalamulo 6 - IBAYIBOLO 2024

Ilamulo ikulu nkani

¹ Agha gho malamulo ni ndaghilo, sona na zyosi zizyo u Mwene u Chala winyu akandamulila ukuti imbamanyisye umwakuti muvikonkaye muchisu chicho mukwiza pakwikalamo,

² umwakuti amwe poka na bana binyu, sona na bizukulu binyu mumuchindikaye u Mwene u Chala winyu nukukonka indaghilo zyache zyosi zizyo nkubapa amwe umwakuti mwikalaye akabalilo akatali muchisu chilachila.

³ Mwee ba Izilayeli, ivwa kuno, sona mwenelezye ukuti mukuvikonka, umwakuti vyosi vibendelelaye akiza, sona nukuti munyamane nkani muchisu icha mboto ukuyana namumo u Mwene u Chala uwa banyenya binyu akabalayizizya.

⁴ Mwee ba Izilayeli, ivwa kuno! U Mwene u Chala witu we Mwene weka mpela.

⁵ Mumughanaye u Mwene u Chala winyu nu moyo winyu ghosi nu muzimu winyu ghosi, sona na maka ghinyu ghosi.

⁶ Mutakaghaluvyanje nalumolumo amalamulo ghanagha nkubapa ilelo.

⁷ Mubamanyisyanje abana binyu. Mughanenaye bo mukwikala pasi munyumba zyinyu, pamo bo mukwenda mumusebo, pamo bo mukughona pabusiku, sona bo mukulamusya pandabindabi.

⁸ Mughapinyililaye panyobe zyinyu, sona mughavwalaye pavyeni vyinyu pakuba chimanyilo.

⁹ Mughasimbaye pamilyango iya nyumba zyinyu, na pamilyango iya impaso zyinyu.

Akubasoka pachifukwa chakusita ukwivwila

¹⁰ Losi ulu u Mwene u Chala winyu akubinjizya muchisu chicho akabalayizya abanyenya binyu, u Abulahamu nu Yisaki nu Yakobo. Ichisu chinichi chili nutwaya utukulu nkani, sona tukabi tuto amwe mutakatuzengapo nalumo.

¹¹ Inyumba zyache zikwiza pakwizula ni vintu ivyiza ivyakulekanalekana, vivyo mutakavibikamo nalumo ni viziba vivyo mutakavikumbapo nalumo na maghunda agha mampesya nagha misyunguti ghagho mutakabyalapo nalumo. Bo mwalya nukwikuta,

¹² muchebaye nkani ukuti mutakamuluvyanje u Mwene yuyo akabefyamo mu Ijiputi mumo mukaba mwe bazya.

¹³ Mumuchindikaye u Mwene u Chala winyu, mumubombelaye yuyo mwene. Bo mukulapa ichilapo mulapilaye mwitabwa lyache lyene.

¹⁴ Mutakabiputaye abachala abanji, babo abapalamani binyu bakubiputa.

¹⁵ Nanti mukubiputa abachala abanji, ubukali ubwa Mwene bukwiza pakubanangannya, sona bukwiza pakubazimizya muchisu ichapasi, pakuti u Mwene u Chala winyu, yuyo ali pakasi papinyu we Chala uwa buzuba.

¹⁶ Mutakamuyelaye u Mwene u Chala winyu ukuyana namumo mukabombelagha ku Masa.

¹⁷ Mwenelezye ukuti mukughakonka amalamulo ghosi ghagho abapiye.

¹⁸ Bombagha bulo chicho chigholosu, sona chiza pamaso pa Mwene umwakuti ivintu vibendelaye akiza. Po mukwiza pakuchifyula ichisu icha mboto, chicho u Mwene akabalayizya abanyenya binyu pakulapa ichilapo.

¹⁹ Amwe mukwiza pakubachimbizya abalwani binyu ukuyana namumo u Mwene akalayizizya.

²⁰ Muntazi, abana binyu bakwiza pakubalalusya ukuti, “Nkimba choni chicho u Mwene u Chala witu akatulamula ukuti tuzikonkaye indaghilo na malamulo ghache ghanagha?”

²¹ Po mubamulaye ukuti, “Aswe tukaba twe bazya aba Falabo mu Ijiputi, loli u Mwene akatwefyamo na maka ghache amakulu.

²² Na maso ghitu tukamwennya u Mwene akupela ivyika ni viswigho, nukubomba ivintu ivyakoghofya pakubafunda aba Ijiputi nu Falabo, sona na bamunyumba yache bosi.

²³ Akatwefyamo mu Ijiputi nukutufisya kuno, sona akatupa ichisu ukuyana namumo akabalayizizya abanyenya bitu pakulapa ichilapo.

²⁴ U Mwene u Chala witu akatulamula ukuti tughakonkaye amalamulo ghache ghosi ghanagha, nukuti tumuchindikaye u Mwene u Chala witu umwakuti tubanje twe bakabi, sona nukuti tubanje nubumi ukuyana namumo zibeleye ilelo.

²⁵ Nanti twe basubiliwa pakukonka indaghilo zyache zyosi pamaso pa Mwene ukuyana namumo akatulamulila, akwiza pakuhoboka naswe.”