Ukukumbusya Amalamulo 5 - IBAYIBOLO 2024

Amalamulo Teni

¹ U Mozesi akababungannya aba Izilayeli bosi nukubabuzya ukuti, “Mwe ba Izilayeli, ivwa indaghilo na malamulo ghosi ghagho nkubabuzya ilelo. Mughamanyilaye, sona mwenelezye ukuti mukughakonka.

² U Mwene u Chala witu akafingana naswe ulufingo pighamba ilya Sinayi.

³ U Mwene atakafingana na banyenya bitu ulufingo lunulu awe, loli akafingana naswe, twebosi twe tuli nubumi ilelo.

⁴ U Mwene akanena namwe pamaso na pamaso pighamba pala, bo ali mumoto.

⁵ Pakabalilo kalakala nkimilila pakasi papinyu nu Mwene nukubabuzya amazyu agha Mwene pachifukwa ichakuti amwe mukaghunyilagha umoto, sona mutakakwela pighamba pala. U Mwene akati:

⁶ “Ane ne Mwene u Chala winyu, ne nkabefyamo mu Ijiputi mumo mukaba mwe bazya.

⁷ “Utakabiputaye abachala abanji, loli ane nemwene.

⁸ “Utakipangilaye wemwene ivifwani ivya kantu kamo aka kumwanya, pamo aka pachisu pamo aka mumizi.

⁹ “Utakavifughamililaye pamo ukuvyiputa, pakuti ane ne Mwene u Chala winyu, ne muzuba. Nkubafunda abana aba nkulilo iyabutatu mupaka ni yafolo pachifukwa icha mbibi izya bawise.

¹⁰ Loli imbaghanite abantu amasabuzani agha nkulilo izya bantu, babo banganite nukughakonka amalamulo ghane.

¹¹ “Utakalitambulaye pabulo itabwa ilya Mwene u Chala wako, pakuti ane ne Mwene nkwiza pakumufunda umuntu wesi yuyo akulitambula pabulo itabwa lyane.

¹² “Ulikumbukaye Isiku Ilyakutuzya pakuba lizelu ukuyana namumo u Mwene u Chala wako akakulamulila.

¹³ Mubombaye imbombo zyinyu zyosi mumasiku sikisi,

¹⁴ loli isiku ilyaseveni lisiku Ilyakutuzya ilya Mwene u Chala winyu. Pisiku linilyo utakabombaye nayimoyimo imbombo manyi wewe manyi bana bako abalumendo manyi bana bako abalindu manyi bambombo bako abanavuli manyi bambombo bako abakolo manyi nkambaku zyako manyi mpunda zyako manyi vitekwa vyako vyosi manyi bayeni babo bakwikala mukaya kako, umwakuti abambombo bako bope batuzyanje ukuyana namumo ukutuzizya.

¹⁵ Mukumbukaye ukuti namwe bulo mukaba mwe bazya mu Ijiputi. Mukumbukaye sona ukuti Ane ne Mwene u Chala winyu nkabefyamo mu Ijiputi na maka ghane amakulu, sona ni nyobe ingolosu. Ichi cho chifukwa u Mwene akabalamula ukuti mulikumbukaye Isiku Ilyakutuzya.

¹⁶ “Umuchindikaye ughuso nu nyoko, ukuyana namumo u Mwene u Chala wako akakulamulila, umwakuti ubanje nubumi ubutali muchisu chicho u Mwene u Chala wako akukupa.

¹⁷ “Utakaghoghaye.

¹⁸ “Utakalowaye.

¹⁹ “Utakibaye.

²⁰ “Utakabanje we kaboni umumyasi kumupalamani wako.

²¹ “Utakayinyonywanje inyumba iya mupalamani wako pamo umughunda wache. Utakamunyonywanje umuchi uwa mupalamani wako pamo uwambombo wache umwanavuli pamo umukolo pamo ing'ombe zyache pamo impunda zyache pamo ichintu chosi chicho ali nacho.”

²² Agha gho malamulo ghagho u Mwene akaghanena umwakukolomoka bo ali mumoto na mwibingu sona na muchisi bo ichilundilo chosi chibunganite pighamba. Ghanagha ghakaba mazyu ghene ghagho u Mwene akaghanena. Akaghasimba pamabwe amapapate mabili nukumpa.

Abantu bali nubogha

²³ Bo mwivwa amazyu muchisi, sona bo ighamba likwaka umoto, abalongozi binyu bosi na bamwene binyu abaluko lwinyu bakiza kukwane,

²⁴ nukuti, “U Mwene u Chala witu akatulanjizya ubuchindamu nu bukulu bwache, sona tukivwa izyu lyache bo ali mumoto! Ilelo twennya ukuti umuntu angaba nubumi napapo u Chala anena nawe.

²⁵ Nkimba choni chicho tubike ubumi bwitu pachulu? Umoto uwakoghofya ghunughu ghukwiza pakutulungulizya, sona tukwiza pakufwa nanti tukwivwa sona izyu ilya Mwene u Chala witu.

²⁶ Nkimba alipo umuntu yuyo akendelela pakuba nubumi, bo amwivwa u Chala umumi akunena mumoto?

²⁷ Upalamile ukuti wivwe zyosi zizyo u Mwene u Chala witu akunena. Tukwiza pakuteghelezya nukwivwila.”

²⁸ U Mwene akabivwa bo mukunena nane, po u Mwene akambuzya akati, “Nivwa zizyo abantu banaba bakunena, zyosi nyiza bulo.

²⁹ Ane nalondagha nkani ukuti inyinong'ono zyabo ngali zili bunubu amasiku ghosi, sona nukuti ngali bakunchindika nukuzikonka indaghilo zyane zyosi, umwakuti ivintu vyosi vibendelaye akiza, poka na baluko lwabo bwila na bwila.

³⁰ “Ubabuzye ukuti banyokele kuvisakasa vyabo.

³¹ Loli awe Mozesi, usyalikile poka nane umwakuti nkupe amalamulo ghosi, ni vimanyisyo vyane, sona ni ndaghilo zyane ukuti ubamanyisyanje abantu umwakuti bazikonkaye muchisu chicho nkubapa.”

³² Mwee ba Izilayeli, mwenelezye ukuti mukukonka zizyo u Mwene u Chala winyu abalamuliye. Mutakapaghukilaye kundilo pamo kumongo.

³³ Mukonkaye bulo zyosi zizyo u Mwene u Chala winyu abalamuliye, umwakuti ivintu vyosi vibendelaye akiza, sona nukuti mwendelele pakuba nubumi ubutali muchisu chicho mukwiza pakwikalamo.