Ukukumbusya Amalamulo 34 - IBAYIBOLO 2024

Ubufwe ubwa Mozesi

¹ Po u Mozesi akakwela pighamba ilya Nebo ukufuma mwikombe ilya Mowabu. Akakwela pamwanya nkani pighamba ilya Pisiga kubufumilo bwizuba ubwa Yeliko. Kulakula u Mwene akamulanjizya ichisu chosi, ukwandila ku Giliyadi mupaka ku Dani

² ni chigaba chosi icha Nafutali ni icha Efulayimu nicha Manase nicha Yuda mupaka kubwinjililo bwizuba ku Nyanja iya Medeteleniya

³ ni chigaba icha Negebu sona ni chigaba chosi ukwandila mwikombe ilya Yeliko nakaya akakulu nkani aka makwi agha mabale mupaka ku Zowala.

⁴ Po u Mwene akamubuzya u Mozesi akati, “Ichi cho chisu chicho nkamulayizya u Abulahamu nu Yisaki, sona nu Yakobo ukuti nkwiza pakubapa abaluko lwako. Nakwitikizya ukuti uchennye bulo na maso ghako, loli utakwiza pakwinjilamo.”

⁵ Po u Mozesi umubombi uwa Mwene, akafwila kulakula muchisu icha Mowabu, ukuyana namumo u Mwene akanenela.

⁶ U Mwene akamusyila mu Mowabu mulamula, mwikombe umwakwenannya nakaya akakulu aka Beti Pewoli, loli mupaka nilelo bulo atalipo nayumoyumo yuyo abumenye ubuzilo bubo ipumpa lyache lili.

⁷ U Mozesi akafwa bo ali na maka 120, loli pope bulo akaba na maka, sona amaso ghache ghakaba ghachili ghakwennya akiza bulo.

⁸ Aba Izilayeli bakamulila u Mozesi amasiku 30 mwikombe ilya Mowabu mupaka ukumala ukwa kabalilo aka chililo.

⁹ U Yoshwa umwana uwa Nuni akizula na mahala, pachifukwa ichakuti u Mozesi akamubika inyobe ukuti apyane ubuzilo bwache. Aba Izilayeli bakamwivwila u Yoshwa nukukonka amalamulo ghagho u Mwene akabapa ukwendela mwa Mozesi.

¹⁰ Ukwandila pakabalilo kalakala, atalipo nayumoyumo umulaghuzi uyunji mu Izilayeli uwakuyana nu Mozesi, yuyo u Mwene akanenagha nawe pamaso na pamaso.

¹¹ Atalipo nayumoyumo umulaghuzi uyunji, yuyo apelitepo iviswigho ni vyika ivyakuyana na vivyo u Mwene akamutuma u Mozesi pakuvipela mu Ijiputi pamaso pa Falabo, na makambala ghache, sona na kuchisu chache chosi.

¹² Atalipo nayumoyumo umulaghuzi uyunji, yuyo akabomba ivintu ivikulu ni vyakoghofya ivyakuyana na vivyo u Mozesi akabomba pamaso paba Izilayeli bosi.