Ukukumbusya Amalamulo 33 - IBAYIBOLO 2024

U Mozesi akuzisaya inko izya ba Izilayeli

¹ Bo u Mozesi, umuntu uwa Chala achili pakufwa akabasaya aba Izilayeli.

² Bo ali pakubasaya akanena akati, “U Mwene akika pighamba ilya Sinayi, sona akazubuka ukufuma ku Seyili. Akabalamila abantu bache, bo ali pighamba ilya Palani. Akiza poka ni chilundilo icha bantumi 1,000 bo alemite umoto uwakwaka munyobe yache.

³ Naloli u Mwene abaghanite abantu bache, sona abantu bako bosi bali munyobe zyache. Po bakufughama munyayo zyache, sona bakupokela ivimanyisyo vyache.

⁴ Aswe tukughakonka amalamulo ghagho u Mozesi akatupa, ghanagha mpyana iya luko ulwa Yakobo.

⁵ U Mwene akaba we mwene uwa bantu bache aba Izilayeli, bo abalongozi aba bantu babunganite, poka ninko izya ba Izilayeli.”

⁶ Nizya luko ulwa Lubeni, u Mozesi akati, “U Lubeni abanje nubumi, atakafwanje awe, napapo abantu bache banandi.”

⁷ Nizya uluko ulwa Yuda akati, “Wee Mwene teghelezya inkuta iya Yuda, umwavwe nukumumamatizya sona ninko izinji. Wee Mwene, umulwile ubwite, sona umwavwe pakulwa na balwani bache.”

⁸ Nizya uluko ulwa Levi akati, “Wee Mwene vumbula ubwighane bwako ukwendela mwa Tumimu nu Ulimu, ukwendela mu mubombi wako umusubiliwa u Levi. Ukamuyela pa Masa nukudalinkana nawe pamizi agha Meliba.

⁹ U Levi akaghivwila amazyu ghako, nukulusunga ulufingo lwako. Akaba musubiliwa nkani kukwako, ukumuchila uwise nu nyina, na bawamwabo, sona na bana bache.

¹⁰ U Levi weyuyo akwiza pakubamanyisya abana aba Yakobo, pakughakonka amalamulo ghako. Akwiza pakubika ivyakufukizya ivyakununkila pamaso papako, nukukocha ivyakwiyipa pachighemo chako.

¹¹ Wee Mwene, umusaye u Levi, sona uhobokaye ni mbombo izya nyobe zyache. Ubanangannye abalwani bache bosi, umwakuti batakanyamuke sona.”

¹² Nizya luko ulwa Benjamini akati, “U Mwene amusungilile u Benjamini, pakuti weyuyo u Mwene amughanite nkani. Akumuzighilila isiku ni siku nukumupakata munyobe zyache.”

¹³ Nizya luko ulwa Yosefu akati, “Wee Mwene, uchisaye ichisu chache pakuchipa inganda iyakufuma kumwanya, sona na mizi aghakufuma pasi pachisu.

¹⁴ Ichisu chache chisayiwanje pakuba ni vikomwa zizyo zikutona pachifukwa icha kasanya. Chibanje ni vikomwa ivyinji pakabalilo kache.

¹⁵ Amaghamba ghache aghakale ghizule ni nyinulo inyiza nkani, sona ghizule ni nyinulo inyinji nkani.

¹⁶ Ichisu chache chizule ni vintu ivyiza nkani, u Chala yuyo akanena bo ali muchivwati, achisaye. Ulusayo losi lunulu lubanje ulwa luko lwa Yosefu, pachifukwa ichakuti akaba mulongozi pakasi pa bawamwabo.

¹⁷ U Yosefu ali na maka ngati nkambaku, impembe zyache ziyanite bulo ni mpembe izya mpogho, Ni mpembe zinizi akwiza pakuzipula inko izinji, sona ninko zizyo zili kumpaka iya chisu ichapasi. Impembe zinizi bo bantu 1,000 aba Efulayimu, sona bo bantu amasabuzani agha luko ulwa Manase.”

¹⁸ Nizya luko ulwa Zebuloni nulwa Isakala akati, “Wee Zebuloni, sekelagha, bo ukughula nukughulizya panyanja. Wee Isakala, hoboka, bo uli muvisakasa vyako.

¹⁹ Kumaghamba ghache akwitizizyako inko izya bantu, kulakula bakubika ivyakwiyipa ivyenecho pachifukwa ichakuti ubukabi bwache bakubwagha panyanja, sona na mu musesenga uwa mulubazu ulwa nyanja.”

²⁰ Nizya luko ulwa Gati akati, “Apaliwanje u Chala yuyo akuzikuzya impaka izya Gadi. U Gadi akuvwamilila ngati nkalamu inkolo, ukukavula ichinyamana chicho yalema.

²¹ Akisalila mwene ichisu ichiza nkani ukuti chibanje chache, ichigaba icha mulongozi chikapeghiwa kukwache. Bo abalongozi aba Izilayeli babungana poka, u Gadi akabomba zizyo u Mwene akalondagha.”

²² Nizya luko ulwa Dani akati, “U Dani ayanite bulo ni nyana iya nkalamu, yiyo yikuvwimpuka ukufuma mu Bashani.”

²³ Nizya luko ulwa Nafutali akati, “U Mwene amupelela ichisa u Nafutali sona amusaya nkani. Impaka izya chisu chache zikwiza pakufika mupaka kuntende ukwandila ku Nyanja iya Galileya.”

²⁴ Nizya luko ulwa Asheli akati, “U Asheli we musayiwa nkani ukubachila abawamwabo. Abawamwabo bamupelele ichisa, sona ichisu chache chizule na makwi agha misyunguti.

²⁵ Utwaya twache utukulu nkani tuli ni milyango iya chela, sona amaka ghache ghayane bulo nubumi bwache.

²⁶ “Atalipo nayumo u chala uyunji uwakuyana nu Chala uwa Izilayeli, yuyo akwenda mubuchindamu mumwanya, sona yuyo akukwela pamabingu nukwiza pakukwavwa.

²⁷ U Chala uwa bwila na bwila bo buponelo bwinyu sona pasi pachisu ko akubasungilila bwila na bwila. Akabachimbizya abalwani binyu pamaso papinyu, nukubabuzya ukuti, ‘Mubanangannye bosi.’

²⁸ Po aba Izilayeli bakwiza pakwikala umwakufwasa. Abaluko ulwa Yakobo bakwikala mumutende, muchisu icha ngano nu vinyo umupya, mumo inganda yikuwa ukufuma kumwanya.

²⁹ Mwee ba Izilayeli, mwe basayiwa nkani! Nkimba wewenu yuyo ayanite namwe, mwe bantu babo bapokiwe nu Mwene? U Mwene umwenecho we ngulu yinyu, sona wepanga winyu uwakupotela. Abalwani binyu bakwiza pakukupama, po amwe mukwiza pakubakanyankila pasi.”