Ukukumbusya Amalamulo 32 - IBAYIBOLO 2024

¹ Wee kumwanya, ivwa zizyo nkunena, teghelezya amazyu ghane, wee chisu ichapasi!

² Ivimanyisyo vyane vitimaye ngati yo vula, sona amazyu ghane ghabanje ngati yo nganda. Ngati ko kavula akakusalasata, amazyu ghane ghawanje pisote ghatimaye pisote iteta ngati yo vula inyinji nkani.

³ Itabwa ilya Mwene nkwiza pakulifumusya, sona mubupalaye ubukulu ubwa Chala witu.

⁴ U Mwene we Lyalabwe, sona imbombo zyache zyakufikapo, izila zyache zyosi ngolosu. U Chala we musubiliwa, yuyo atakubombapo nayimoyimo imbibi, sona we Chala umugholosu nu wanaloli.

⁵ Loli abene, bate basubiliwa, pakuti lo luko ulubibi nu luzimbuli.

⁶ Nkimba momumo mukubombela nu Mwene, mwe bapunganu na basita mahala mwee? Nkimba u Mwene ate we ghuso, yuyo akabapela? Nkimba ate weyuyo akabamata nukubapela pakuba mwe luko?

⁷ Mughakumbuke amasiku aghakale nkani, mwinong'one nizya nkulilo izyakale nkani. Mubalalusye abapapi binyu, bakwiza pakubabuzya. Mubalalusye abaghosi, bakwiza pakubalingannya.

⁸ Bo Uwakumwanya Nkani azigabila inko ichisu, bo abagabannya abantu bosi, bo akubalesannya abantu bosi, akabapangila abantu impaka ukuyana nu bwinji ubwa bana aba Izilayeli.

⁹ Pakuti ubuzilo ubwa Mwene bo bantu bache akabasala abanyumba iya Yakobo pakuba mpyana yache.

¹⁰ Akabagha munkolongo muchisu mumo mutakabamo nakamokamo. Akabavighilila nukubasungilila ngati mumo angalisungilila ilyiso lyache.

¹¹ Ngati lizwanga lilyo likumanyisya abana bache ukubuluka, lilyo likubuluka pamwanya pa bana bache nukukuzula ivipapande vyache, ukuti libaleme abana bala, nukubanyamula abana bala pavipapande vyache.

¹² U Mwene weyuyo akabalongolela abantu bache, abachala abayeni batakamwavwa napo panandi.

¹³ Akabavwa ukuti balaghilaye ivyisu ivya mumaghamba, sona bakalyanga ivimelwa ivya mumaghunda. Akabalyesya ubuchi ubwa mumpako izya mabwe, na mafuta ghagho ghakafumagha mumabwe.

¹⁴ Akabang'wesya ulukama lwang'ombe nulwa ng'ozi, akabalyesya inyama iya ng'ozi niya mbuzi inyine. Akabalyesya inyama inyiza nkani iya badubi aba ku Bashani, ni ngano inyiza nkani nu vinyo umunoni.

¹⁵ Aba Izilayeli bakaba bakabi nkani, loli bakunsambukila. Bakina nkani, sona bakalya nukuvimbilwa. Pisinda pache bakamuleka u Chala wabo yuyo akabapela, nukulikana Ilyalabwe, yuyo Mupoki wabo.

¹⁶ U Mwene akaba nu buzuba, pachifukwa ichakuti bakabiputa abachala abanji. Bakamukalalizya nkani, pachifukwa ichakwiputa ivifwani vyabo ivyamwiko.

¹⁷ Bakabika ivyakwiyipa ku mizimu imibibi, yiyo atakaba we Chala umwenecho. Bakaba bachala babo, abanyenya babo batabamenyepo nalumo, abachala babo aba Izilayeli batabiputitepo nalumo.

¹⁸ Bakalitoloka Ilyalabwe, yuyo akaba we wise wabo, Bakamuluvya u Chala, yuyo akabapela.

¹⁹ Bo u Mwene azyennya zinizi, akabakana abantu bache. Akabakana abana bache abalumendo na balindu, pachifukwa ichakuti bakamukalalizya.

²⁰ Akababuzya akati, “Ntakwiza pakubakana, sona nkwiza pakubwennya ubumalilo bwabo, pachifukwa icha moyo ghagho makafu, nu busita busubiliwa bwabo.

²¹ Bampelela ubuzuba pachifukwa icha bachala babo abamyasi sona bankalalizya pachifukwa icha vifwani vyabo ivyabupunganu. Po nkwiza pakubombezya uluko, lulo lute luko pakubakalalizya. Nkwiza pakubapela pakuba na kabini, pachifukwa icha luko lulo lupunganu.

²² Ubukali bwane bukwiza pakwaka ngati moto, ghugho ghukwaka mupaka kuchisu icha bantu abafwe. Bukwiza pakuchilungulizya ichisu ichapasi ni vimelwa vyache vyosi, sona na maghamba ghache ghosi.

²³ Nkwiza pakubalundikila amayimba sona nkwiza pakubalasa nu tulasilo twane tosi.

²⁴ Nkwiza pakubawisizya izala inkulu nkani, sona nintamyo ni viwaya ivipalapala nkani. Nkwiza pakubatumila ivinyamana ivyakoghofya, sona ni njoka izya bwanga ukuti zibalume.

²⁵ Abantu bakwiza pakufwa nubwite mumisebo, sona bakwiza pakufwa nubogha munyumba zyabo. Abalumendo na balindu bakwiza pakufwa, bope ababonda na baghosi bakwiza pakufwa.

²⁶ Nkati, ‘Nalondagha nkani nanti nabanangannyanga, sona nanti naghazimyanga amatabwa ghabo muchisu ichapasi, umwakuti atakabepo nayumoyumo umuntu uwakubakumbuka sona.’

²⁷ Loli ntakalonda ukuti abalwani babo bituvyanje, ntakalonda ukuti abalwani babo banenaye ukuti, ‘Aswe twabapota abantu bache,’ Pakuti ane ne Mwene ne nabomba zyosi zinizi.”

²⁸ Aba Izilayeli lo luko lulo lute na mahala naghamoghamo, lo luko lulo lutakwivwisya ivintu napo panandi.

²⁹ Nanti bakabanga na mahala ngali bakivwisya ivintu vinivi, sona ngali bakuzyaghannya intamyo zizyo zingabawila.

³⁰ Nkimba choni chicho umuntu weka akabachimbizya abantu 1,000 pamo abantu babili ukubachimbizya abantu 1,000? Ichi cho chifukwa Ilyalabwe lyabo lyabaleka bene, sona u Mwene wabo uwamaka abaghulizya.

³¹ Abalwani babo bazimenye ukuti ilyalabwe lyabo litayanite ni Lyalabwe lyitu.

³² Abalwani babo babibi nkani, bayanite bulo nu Sodomu nu Gomola, sona bayanite bulo na mampesya amababe, ghagho ghali nubwanga.

³³ Uvinyo wabo ayanite bulo nu bwanga ubwa njoka, sona ayanite bulo nu bwanga ubwa chipili.

³⁴ U Mwene wabo akuzikumbuka zizyo abalwani babo babombite, akulindilila bulo akabalilo akiza ukuti abafunde.

³⁵ Ukutanizya ko kwane, ane nkwiza pakubatanizya babo kubabaghiye. Pakabalilo kache inyayo zyabo zikwiza pakutyelemuka, isiku lyabo ilya ntamyo lili papipi, sona ukunanganika kwabo kukwiza lubilolubilo.

³⁶ U Mwene akwiza pakubalonga abantu bache. Akwiza pakubapelela ichisa ababombi bache bo ennya ukuti amaka ghabo ghamala, sona nukuti atalipo nayumoyumo umuntu uwakusyala, manyi muzya, pamo musatuke.

³⁷ Po akwiza pakulalusya ukuti, Nkimba bali ko kwiyi abachala babo, babo bakuponelamo?

³⁸ Abachala babo bali ko kwiyi, babo bakalyanga amafuta agha ivyakwiyipa vyabo sona babo bakang'welagha uvinyo uwa vyakwiyipa vyabo ivya kung'wela? Baleke bize ukuti babavwe, sona bizaghe pakubapoka.

³⁹ Ilelo ennya, ane nemwene ne Chala, sona atalipo u chala uyunji. Nkumughogha umuntu nukumupa ubumi, Nkumuvulazya sona nkumupozya. Atalipo nayumoyumo umuntu uwakumupoka munyobe zyane.

⁴⁰ Losi ulu nkulapa nukukwezya inyobe yane nukuti, Naloli ane ne Chala umumi uwa bwila na bwila.

⁴¹ Bo napyasya upanga wane, sona bo namulema munyobe zyane ukuti imbafunde, nkwiza pakubatanizya abalwani bane, sona na bantu babo bambengite.

⁴² Utulasilo twane tukwiza pakuba chee ni banda lyabo, sona upanga wane akwiza pakubabolannya. Upanga wane akwiza pakung'wela ibanda ilya babo baghoghiwe, sona akwiza pakudumula imitu iya balongozi aba balwani bane.

⁴³ Sekela, mwee inko zyache zyosi. U Mwene akwiza pakubatanizya abantu, babo bakubaghogha ababombi bache. Akwiza pakubatanizya abalwani bache, nukubahobokela imbibi abantu bache.

⁴⁴ U Mozesi nu Yoshwa umwana uwa Nuni bakimba ulwimbo lunulu umwakuti abantu bosi bivwe.

Amazyu aghabumalilo agha Mozesi

⁴⁵ Bo u Mozesi amala pakubamanyisya aba Izilayeli ulwimbo lunulu,

⁴⁶ akababuzya akati, “Mwenelezye nkani ukuti mukukumbuka amalamulo ghosi ghagho nabapa ilelo. Mubabuzye abana binyu ukuti baghakonkaye amalamulo ghosi ghanagha.

⁴⁷ Amalamulo ghanagha ghate ghakughangalila awe, loli bo bumi bwinyu. Mughakonkaye umwakuti mubanje nubumi ubutali muchisu chicho mukubuka pakwikalamo kwisila ilya Yolodani.”

⁴⁸ Pisiku lilalila u Mwene akamubuzya u Mozesi akati,

⁴⁹ “Kwela pamaghamba agha Abalimu muchisu icha Mowabu umwakwenannya nakaya akakulu nkani aka Yeliko. Kwela pighamba ilya Nebo nukuchennya ichisu icha Kenani, chicho nkubapa aba Izilayeli ukuti chibanje mpyana iyabo ni yabo.

⁵⁰ Awe ukwiza pakufwila pighamba palapala, ukuyana namumo uwamwinyu u Aloni akafwila pighamba ilya Holi,

⁵¹ pachifukwa ichakuti mwebosi mwe babili mutakaba mwe basubiliwa kukwane pamaso paba Izilayeli, bo muli pamizi agha Meliba mu Kadeshi, munkolongo iya Zini, sona nukuti mukansamula pamaso paba Izilayeli.

⁵² Po awe ukwiza pakuchenezya bulo pabutali ichisu chilachila, loli utakwiza pakwinjilamo muchisu chicho nkubapa aba Izilayeli.”