Ukukumbusya Amalamulo 31 - IBAYIBOLO 2024

U Yoshwa akupyana pa Mozesi

¹ U Mozesi akababuzya aba Izilayeli amazyu ghosi ukuti,

² Ilelo indi na maka 120, sona ntangendelela pakuba mulongozi winyu. U Mwene ambuzya ati, Ntakwiza pakuloboka nalumo ulusoko ulwa Yolodani.

³ U Mwene u Chala winyu umwenecho akwiza pakubalongolela, bo mukuloboka ulusoko. Akwiza pakuzinangannya inko izinji zyosi umwakuti amwe muchifyule ichisu chabo. Po u Yoshwa akwiza pakuba mulongozi winyu ukuyana namumo u Mwene akanenela.

⁴ U Mwene akwiza pakubanangannya abantu bala, ukuyana namumo akamubombela u Sihoni nu Ogi, abamwene aba Amoli, babo akabanangannya poka ni chisu chabo.

⁵ U Mwene akwiza pakubabika munyobe zyinyu, po amwe mubabombele vivyo nabalamula.

⁶ Mubanje nu lweke, sona mujimbaye nkani. Mutakabanyilaye pamo ukutetema, pakuti u Mwene u Chala winyu akubuka namwe. Atakwiza pakubitikizya ukuti mupotwe, sona atakwiza pakubaleka mwebene.

⁷ Po u Mozesi akamwitizya u Yoshwa nukumubuzya pamaso paba Izilayeli bosi ukuti, “Ubanje nu lweke, sona ujimbaye nkani, pakuti wewe ukwiza pakubalongozya abantu banaba kuchisu chicho u Mwene akabalayizya abanyenya babo. Ubagabile abantu banaba ichisu chinichi ukuti chibanje mpyana yabo.

⁸ U Mwene umwenecho akwiza pakukulongolela, sona akwiza pakuba nawe. Atakwiza pakwitikizya ukuti upotwe, sona atakwiza pakukuleka wemwene. Po utakanyilaye pamo ukuwa amaka.”

Ukubelenga Amalamulo

⁹ Po u Mozesi akaghasimba amalamulo agha Chala nukubapa abaputi, abana aba Levi, babo bakanyamulagha Ibokosi ilya Lufingo ulwa Mwene, sona na ku balongozi bosi aba ba Izilayeli.

¹⁰ Akabalamula akati, “Kubumalilo ubwa mwaka ghosi uwaseveni, umwaka uwakuzimya inkongole, mubelengaye amalamulo ghanagha pa Lusekelo ulwa Visakasa,

¹¹ bo aba Izilayeli bakwiza pamaso pa Mwene u Chala winyu pabuzilo ubwakwiputilapo bubo akwiza pakubusala. Ukwiza pakubabelengela ululaghilo lunulu bo bakuteghelezya.

¹² Ubitizye abanavuli bosi na bakolo bosi na bana bos, sona na bayeni bosi babo bakwikala mutwaya twinyu, umwakuti umuntu wesi angiyivwila mwene nukumunyila u Mwene u Chala winyu, sona nukughakonka amalamulo ghosi ghanagha.

¹³ Bunubu abanyenya binyu babo bativuyepo nalumo amalamulo agha Mwene u Chala winyu, bivwe nukumunyila, bo muli nubumi muchisu chicho mukubuka pakwikalamo kwisila ilya Yolodani.”

U Mwene akumubuzya u Mozesi izyakubomba pabumalilo

¹⁴ Po u Mwene akamubuzya u Mozesi akati, “Akabalilo kako akakufwila kali papipi. Umwitizye u Yoshwa, nukwiza nawe ku Chisakasa icha Mwene, umwakuti imubuzye izyakubomba.” U Mozesi poka nu Yoshwa bakabuka ku Chisakasa icha Mwene.

¹⁵ Po u Mwene akababonekela mumpanda iya libingu, lilyo likimilila pamulyango uwa chisakasa.

¹⁶ U Mwene akamubuzya u Mozesi akati, “Uli papipi pakufwa, loli bo wafwa abantu banaba bakwiza pakulunangannya ulufingo lulo nkafingana nabo. Bakwiza pakubadepukila abachala abanji nukubiputa muchisu chicho bakubuka pakwikalamo.

¹⁷ Po bunubu ane nkwiza pakubakalalila nukubaleka, sona nkwiza pakubanangannya. Nkwiza pakubawisizya intamyo na mayimba aminji nkani umwakuti pisiku lilalila bakwiza pakulalusya ukuti, ‘Nkimba intamyo zitakutuwila pachifukwa ichakuti u Chala witu, ate poka naswe?’

¹⁸ Naloli pisiku lilalila nkwiza pakubaleka pachifukwa icha mbibi zyabo pakubiputa abachala abanji.

¹⁹ “Losi ulu simba ulwimbo ulu. Ubamanyisye aba Izilayeli ukuti lubanje we kaboni wane uwakubasusya.

²⁰ Bo nabinjizya muchisu icha mboto, ukuyana namumo nkalapila nabanyenya babo, bakwiza pakuchagha ichakulya chosi chicho bangachilonda, sona bakwiza pakufwasa nkani. Abantu banaba bakwiza pakunkana, bakwiza pakubiputa abachala abanji, nukulunangannya ulufingo lwane.

²¹ Bo intamyo na mayimba aminji nkani ghabawila, ulwimbo lunulu lukwiza pakuba we kaboni wane uwakubasusya, pakuti abaluko lwabo bakwiza pakulukumbuka ulwimbo lunulu. Nilelo bulo, bo inchili na pakubinjizya muchisu chicho nkabalayizya, inzimenye inyinong'ono zyabo.”

²² Pisiku lilalila u Mozesi akasimba ulwimbo nukubamanyisya aba Izilayeli.

²³ Po u Mwene akamubuzya u Yoshwa umwana uwa Nuni akati, “Ubanje nu lweke, sona ujimbaye nkani, pakuti wewe ukwiza pakubalongolela aba Izilayeli pakubinjizya muchisu chicho nkabalayizya, sona ane ne mwenecho nkwiza pakuba nawe.”

²⁴ Bo u Mozesi amala pakusimba amalamulo ghosi agha Chala mwibuku,

²⁵ akabalamula aba Levi, babo bakanyamulagha Ibokosi ilya Lufingo ulwa Mwene akati,

²⁶ “Senda Ibuku ilya Malamulo ili nukulibika palubazu pi Bokosi ilya Lufingo ilya Mwene u Chala winyu, ukuti libanje palapala pakuba we kaboni uwakubasusya.

²⁷ Pakuti inzimenye ukuti amoyo ghinyu makafu nkani, sona mukunsambukila. Nanti mukumusambukila u Mwene, bo inchili ne mumi, po zingaba bulibuli nanti infuye!

²⁸ Ubabungannye poka abalongozi bosi aba inko na makambala ghosi umwakuti bivwe bo nkunena amazyu ghanagha, po kumwanya ni chisu ichapasi vibanje bo bakaboni bane abakubasusya.

²⁹ Pakuti inzimenye ukuti bo nafwa, mwebosi mukwiza pakuba mwe bantu ababibi nkani, sona mukwiza pakuyileka izila yiyo nabamanyisya. Loli muntazi intamyo zikwiza pakubawila pachifukwa icha kubomba imbibi pamaso pa Mwene nukumukalalizya pachifukwa ichakubomba ivintu ivyamwiko.”

Ulwimbo ulwa Mozesi

³⁰ Po u Mozesi akimba ulwimbo losi lunulu, bo ichilundilo chosi icha ba Izilayeli chikumuteghelezya: