Ukukumbusya Amalamulo 30 - IBAYIBOLO 2024

Ulusayo pachifukwa icha kunyokela kwa Mwene

¹ Nanti ulusayo ni vighune vyosi vinivi vyabawila, nukuvikumbuka bo muli pakasi pa inko zyosi zizyo u Mwene u Chala winyu abanyampanizizyako,

² sona nanti amwe na bana binyu mukunyokela kwa Mwene u Chala winyu, nukumwivwila na moyo ghinyu ghosi, sona nu muzimu winyu ghosi ukuyana na malamulo ghagho nkubapa ilelo,

³ u Mwene u Chala winyu akwiza pakubanyosya nukubapepela ichisa. Akwiza pakubabungannya mwebosi muvyisu vyosi vivyo akabanyampanikizizyako.

⁴ Napapo akabanyampanikizizya kumpaka iya chisu ichapasi, pope bulo u Mwene u Chala winyu akwiza pakubabungannya nukubanyosyako.

⁵ Akwiza pakubanyosezya kuchisu icha banyenya binyu, sona mukwiza pakwikala mulamula. Akwiza pakubapela pakuba mwe binji nkani, sona vyosi vikwiza pakubendelagha akiza nkani ukubachila abanyenya binyu.

⁶ U Mwene u Chala winyu akwiza pakubapa amwe na baluko lwinyu amoyo aghakwivwila, umwakuti mukwiza pakumughana na moyo ghinyu ghosi, sona nu muzimu winyu ghosi, ukuti mubanje nubumi.

⁷ U Mwene u Chala winyu akwiza pakubawisizya ivighune vyosi vinivi abalwani binyu babo bababengite nukubavwima.

⁸ Amwe mukwiza pakumwivwila sona u Mwene nukughakonka amalamulo ghache ghosi ghagho nkubapa ilelo.

⁹ U Mwene u Chala winyu akwiza pakubapela ukuti vyosi vibendelaye akiza. Mukwiza pakuba na bana abinji nkani ni vitekwa ivyinji sona ni nyinulo inyinji nkani muchisu chinyu. Chikwiza pakumuhobosya nkani u Mwene pakubapela amwe pakuba mwe bakabi ukuyana namumo akabombela na banyenya binyu

¹⁰ nanti mukumwivwila u Mwene u Chala winyu nukughakonka amalamulo ghache na moyo ghinyu ghosi sona nu muzimu winyu ghosi ghagho ghasimbiwe Mwibuku ilya Malamulo ili.

¹¹ Amalamulo ghagho nkubapa ghate mapala, sona ghate pabutali awe.

¹² Amalamulo ghanagha ghate kumwanya awe, ukuti mulalusyanje ukuti, “Nkimba wewenu yuyo angakwela kumwanya pakutusendela, umwakuti tughivwe nukughakonka?”

¹³ Pamo ghate kwisila ilya nyanja, awe ukuti mulalusyanje ukuti, “Nkimba wewenu yuyo angaloboka inyanja pakutusendela umwakuti tughivwe nukughakonka?”

¹⁴ Awe, amalamulo ghanagha muli nagho panapa. Amwe mughamenye, ghali mumoyo ghinyu, sona mungaghakonka akiza bulo.

¹⁵ Ivwa kuno! Ilelo nkubapa ulusako ulwa kusalapo ubwiza pamo ububibi, ubumi pamo ubufwe.

¹⁶ Nanti mukughakonka amalamulo agha Mwene u Chala winyu, ghagho nkubapa ilelo, nanti mukumughana nukumwivwila, sona nanti mukuzikonka indaghilo zyache, amwe mukwiza pakuba nubumi, sona mukwiza pakuba mwe binji nkani. U Mwene u Chala winyu akwiza pakubasaya muchisu chicho mukubuka pakwikalamo.

¹⁷ Loli nanti mutakupaghukako kwa Mwene, sona nanti mutakumwivwila, nukudepukila abachala abanji nukubiputa,

¹⁸ po losi ulu nkubasoka ukuti mukwiza pakuzimila naloli. Mutakwiza pakwikala nubumi ubutali muchisu, chicho mukubuka pakwikalamo kwisila ilya lusoko ulwa Yolodani.

¹⁹ Ilelo kumwanya ni chisu ichapasi vibanje bakaboni bane ukuti nkubapa ulusako ulwa kusalapo, ubumi pamo ubufwe, ulusayo pamo ichighune. Salapo ubumi, umwakuti amwe na baluko lwinyu mube nubumi.

²⁰ Mumughanaye u Mwene u Chala winyu, mumwivwilaye nukumukakatila. Pakuti u Mwene bo bumi bwinyu. Po akwiza pakubitikizya amwe na baluko lwinyu ukuti mwikalaye nubumi ubutali muchisu, chicho akamulayizya umunyenya winyu u Abulahamu nu Yisaki, sona nu Yakobo.