Ukukumbusya Amalamulo 3 - IBAYIBOLO 2024

Aba Izilayeli bakumupota u mwene u Ogi

¹ Pisinda pache bakanyokela, nukwendela kuzila iya ku Bashani. U Ogi u mwene uwamu Bashani, poka na basilikali bache akabuka pakulwa nabo ubwite muchisu icha Edileyi.

² Loli u Mwene akamubuzya akati, “Utakamunyilaye, pakuti namubika munyobe zyako poka na basilikali bache bosi, sona ni chisu chache. Ubombe nawe vivyo ukamubombela u mwene u Sihoni uwa ba Amoli, yuyo akalaghilagha mu Heshiboni.”

³ Po u Mwene u Chala witu akamubika munyobe zyitu nu Ogi wepe u mwene uwaku Bashani, poka na bantu bache bosi. Tukabaghogha abantu bosi ukusita ukumulekapo nayumoyumo umuntu uwakupona.

⁴ Pakabalilo kalakala tukatufyula utwaya twache tosi utukulu nkani 60 ukusita ukukalekapo nakamokamo akakupona. Tukachifyula sona ichigaba chosi icha Aligobi, kuko u mwene u Ogi uwaku Bashani akalaghilagha.

⁵ Utwaya tosi utukulu nkani tunutu tukaba nu lupaso ulutali nkani, sona tukaba ni milyango iyakwighaliliwa ni mpingwi. Tukabapo sona utwaya utwinji tuto tutakaba nu lupaso.

⁶ Tukatunangannya utwaya tosi utukulu nkani tunutu nukubaghogha abanavuli na bakolo, sona na bana bulo ukuyana namumo tukamubombela u mwene Sihoni uwaku Heshiboni.

⁷ Tukasenda ivitekwa vyabo vyosi nukufyula vyosi ivya mutwaya twabo utukulu nkani tulatula.

⁸ Pakabalilo kalakala tukabafyula abamwene babili aba ba Amoli banaba ichisu chabo, babo bakaba kwisila ukwa Yolodani, ukwandila kwikombe ilya Alinoni mupaka kwighamba ilya Helimoni.

⁹ (Aba Sidoni bakalyitizyanga ighamba ilya Helimoni ukuti Siliyoni, sona aba Amoli bakalyitizya ukuti Senili.)

¹⁰ Tukatufyula utwaya tosi utukulu utwa mumaghamba ni chigaba icha Giliyadi nicha Bashani mupaka ku Saleka naku Edileyi tuto tukaba twaya utukulu utwa mwene u Ogi uwamu Bashani.

¹¹ U Ogi u mwene uwamu Bashani umu Lefayimu, weyuyo akapona. Ichitala chache chikaba cha chela, ubutali bwache chikaba amamita folo, sona mububaba chikaba amamita mabili. Ichitala chilachila chichili chilipo nilelo mu Laba muchisu icha ba Amoni.

Ukugabiwa ukwa chisu icha kubufumilo bwizuba ubwa Yolodani

¹² Bo twachifyula ichisu chila nkabagabila aba Lubeni naba Gadi ichigaba icha kumitu icha Aloyeli mulubazu ulwa lusoko ulwa Alinoni, sona ni chigaba chimo icha chisu icha mumaghamba icha Giliyadi, poka nutwaya twache utukulu.

¹³ Uhafu uwaluko ulwa Manase nkulupa ichigaba ichinji icha Giliyadi, sona ni chisu icha Bashani chicho chikalaghiliwanga nu mwene Ogi, kokuti ichigaba chosi icha Aligobi mu Bashani, chicho chikamanyikwa ni tabwa ilyakuti ichisu icha ba Lefayimu.

¹⁴ U Yayili uwa luko ulwa manase nkamugabila ichigaba chosi icha Aligobi mupaka kumpaka iya chisu icha Geshuli, ni chisu icha Maaka. Akakita akaya kala ni tabwa lyache umwakuti nilelo ichisu icha Bashani chikwitiziwanga ukuti utwaya utwa Havoti Yayili.

¹⁵ Ichisu icha Giliyadi nkamugabila u Makili uwa luko ulwa manase.

¹⁶ Loli aba Lubeni naba Gadi nkabagabila ichigaba chosi ukwandila ku Giliyadi mupaka pakasi na pakasi pikombe ilya Alinoni, mupaka kuntende kulusoko ulwa Yaboki, kumpaka iya chisu icha ba Amoni.

¹⁷ Kubwinjililo bwizuba, impaka yabo yikaba lusoko ulwa Yolodani mu Alaba, ukwandila ku Nyanja iya Galileya mupaka ku Nyanja Imfwe, muntende mwighamba ilya Pisiga.

¹⁸ Pakabalilo kalakala nkabalamula ukuti, “U Mwene u Chala winyu abapa ichisu chinichi ukuti muchifyule umwakuti chibanje chinyu. Abanavuli bosi abamaka babo bangalwa ubwite balongolele pantazi pa bakamu binyu aba Izilayeli.

¹⁹ Loli abachi binyu, na bana binyu, sona ni vitekwa vyinyu visyale mutwaya utukulu tuto nabapa. (Inzimenye ukuti muli ni vitekwa ivyinji nkani.)

²⁰ Mubavwe aba Izilayeli abamwinyu ukuti bikalane mumutende muchisu chicho u Mwene, u Chala winyu akabapa kubwinjililo bwizuba ubwa Yolodani ukuyana namumo akabombela namwe. Pisinda pache munganyokela kuchisu chinyu chicho nkabagabila.”

²¹ Pakabalilo kalakala nkamubuzya u Yoshwa nkati, “Mwavyennya vyosi vivyo u Mwene, u Chala winyu ababombela abamwene babili banaba. Po u Mwene akwiza pakuvibombela bulo bulabula ivyisu vyosi vivyo mukubukako.

²² Mutakabanyilaye pakuti u Mwene u Chala winyu akwiza pakubalwila ubwite.”

U Mozesi atakwitikiziwa pakwinjila mu Kenani

²³ Pakabalilo kalakala nkamulambilizya nkani u Mwene nkati,

²⁴ “Wee Mwene Uwamaka Ghosi, inzimenye ukuti wanditeko kale pakumulanjizya umubombi wako amaka ghako amakulu. Nkimba alipo u Chala uyunji manyi kumwanya pamo pachisu ichapasi, yuyo angabomba ivintu ivyamaka ni vyakuswighisya vivyo awe ukuvibomba?

²⁵ Unyitikizye ukuti indoboke bulo ulusoko ulwa Yolodani nukuchennya ichisu icha mboto chicho chili kwisila, ichisu ichiza icha mumaghamba, sona na maghamba agha Lebanoni.”

²⁶ Loli u Mwene akankalalila pachifukwa icha mwemwe, po atakanyivwa. Loli akati, “Utakanenaye sona bunubu!

²⁷ Kwela pighamba ilya Pisiga, ughalabukile kumitu na kuntende, sona ughalabukile kubufumilo bwizuba, na kubwinjililo bwizuba. Uchitalankannye akiza ichisu chinichi pakuti awe utakwiza pakulobokapo nalumolumo ulusoko ulwa Yolodani.

²⁸ Loli umulingannye akiza u Yoshwa nukumukazya umoyo, pakuti weyuyo akwiza pakubalongolela abantu ukulobokela kwisila nukwikala muchisu chicho ukwiza pakuchennya.”

²⁹ Po aswe tukasyalikila mwikombe umwakwenannya nakaya aka Beti Pewoli.