Ukukumbusya Amalamulo 29 - IBAYIBOLO 2024

Ukufinga ichipyachipya mu Mowabu

¹ Ulu lo lufingo lulo u Mwene akamulamula u Mozesi ukuti afingane naba Izilayeli mu Mowabu, ukonjelezyapo pa lufingo lulo u Mwene akafingana nabo, bo bali pighamba ilya Sinayi.

² U Mozesi akabitizya aba Izilayeli bosi ku lukomano, nukubabuzya ukuti: Amwe mukiyenezya mwebene na maso ghinyu zizyo u Mwene akamubombela u Falabo uwaku Ijiputi, poka na makambala ghache ghosi, sona ni chisu chache chosi.

³ Mukiyenezya sona mwebene na maso ghinyu, iviwaya ivyakoghofya, ni viswigho, sona ni vyika ivikulu vivyo u Mwene akavipela.

⁴ Loli mupaka nilelo bulo, u Mwene atabapiye amoyo aghakwivwisya, pamo amaso aghakwenezya, pamo amakutu aghakwivwisya.

⁵ Amaka 40 ghagho u Mwene akabalongolela munkolongo mula, amenda ghinyu ghatakazepukapo nalumo, sona inkwato zyinyu zitakamalapo nalumolumo.

⁶ Mutakaba ni vibama ivyakulya, pamo uvinyo nu bwalwa ukuti mung'welaye. Loli u Mwene akabapa vyosi vivyo mukasobelwa ukuti mumumanye ukuti we Mwene u Chala winyu.

⁷ Bo twafika kuno, u mwene u Sihoni uwaku Heshiboni, poka nu mwene u Ogi uwaku Bashani, bakiza pakulwa naswe ubwite, loli tukabapota.

⁸ Tukachifyula ichisu chabo, nukubagabila aba Lubeni naba Gadi, sona nuhafu uwaluko ulwa Manase ukuti chibanje mpyana yabo.

⁹ Mulusungaye ulufingo lunulu na moyo ghinyu ghosi, umwakuti ivintu vyosi vibendelaye akiza.

¹⁰ Ilelo mwebosi mwe mukwimilila pamaso pa Mwene, u Chala winyu na balongozi binyu na balongi binyu na basongo binyu na bamwene binyu na banavuli bosi aba ba Izilayel

¹¹ poka na bana binyu na bachi binyu, na bayeni babo bakwikala muvisakasa vyinyu, babo bakubapantulila inkwi nukubasembela amizi.

¹² Ilelo muli pano ukuti mufingane ulufingo nu Mwene u Chala winyu lulo akufingana namwe,

¹³ ukusimikizya ukuti ilelo mwaba mwe bantu aba Mwene sona nukuti wepe aba we Chala winyu, ukuyana namumo akalapila kumunyenya winyu, u Abulahamu nu Yisaki sona nu Yakobo.

¹⁴ Te mwemwe mwebene babo u Mwene akufingana namwe ulufingo lunulu,

¹⁵ mwe mukwimilila pano ilelo pamaso pa Mwene u Chala witu, awe, loli akufingana sona na baluko binyu bosi babo bate naswe pano ilelo.

¹⁶ Amwe mwebene muzimenye bulo namumo tukikalilagha mu Ijiputi, sona namumo ubulendo bwitu bukabela, bo tukudumusannya muvyisu ivya bantu aba inko izinji.

¹⁷ Amwe mukennya ivifwani vyabo ivyakukozya isoni vivyo vipangiwe na makwi na mabwe nu siliva sona nu golide.

¹⁸ Mwenelezye ukuti atakabepo nayumoyumo umwanavuli pamo umukolo pamo inyumba pamo uluko kokuti amwe mwebosi mwe mwimiliye pano ilelo mwapaghukako kwa Mwene u Chala witu nukubiputa abachala aba inko izinji. Mwenelezye nkani ukuti katakabepo nakamokamo akagululuzi pakasi papinyu kako kangela ivikomwa ivyakubaba nivimelwa ivyakughogha.

¹⁹ Mwenelezye nkani ukuti atakabepo nayumoyumo umuntu pakasi papinyu ilelo, yuyo akwivwa amazyu ghanagha loli akunena mumoyo wache akuti, “Ivintu vyosi vikunyendela akiza bulo, napapo nkubomba ubwighane bwane.” Panapa akwiza pakwipalaghulila mwene ukunanganika manyi muntu umubibi manyi muntu umwiza bulo.

²⁰ U Mwene atakwiza pakumuhobokela nalumo umuntu yunuyu. Naloli ubukali nulweke ulwa Mwene vikwiza pakumocha umuntu yunuyu. Ivighune vyosi vivyo visimbiwe mwibuku linili vikwiza pakumuwila, sona u Mwene akwiza pakulizimya itabwa lyache muchisu ichapasi.

²¹ U Mwene akwiza pakumwefyapo pakasi panko izya Izilayeli ukuti amufunde, ukuyana ni vighune ivya lufingo vivyo visimbiwe Mwibuku ilya Malamulo.

²² Inkulilo zyinyu zyosi izya muntazi, sona na bayeni abakufuma muvyisu ivya kubutali nkani, bakwiza pakuvyennya ivighune nintamyo zizyo u Mwene abawisizizye.

²³ Umuvundo ghukwiza pakumalamo mumaghunda ghinyu, sona ulufumbi lwene ni mbeya nu sulufule vikwiza pakuba posi na posi muchisu chinyu. Mumaghunda ghinyu mutakwiza pakumelamo nachimochimo ichimelwa manyi lisote manyi amakwi. Ichisu chinyu chikwiza pakuyana bulo nakaya aka Sodomu naka Gomola naka Adima naka Zeboyimu tuto u Mwene akatunangannya pachifukwa icha bukali bwache.

²⁴ Po ichisu chosi ichapasi chikwiza pakulalusya ukuti, “Nkimba choni chicho u Mwene akachibombela bunubu ichisu chinichi? Nkimba choni chicho akulanjizya ubukali bunubu?”

²⁵ Ilyamulo lyache likwiza pakuba lyakuti, “Pachifukwa ichakuti abantu banaba bakalusulannya ulufingo, lulo bakafingana nu Mwene u Chala uwa banyenya babo, bo akubefyamo mu Ijiputi.

²⁶ Abantu banaba bakabiputa nukubabombela abachala abanji, babo batabamenyepo nalumolumo, sona babo u Mwene akabakanizya pakubiputa.

²⁷ Ichi cho chifukwa u Mwene akachikalalila ichisu chinichi, umwakuti akachiwisizya ivighune vyosi vivyo visimbiwe Mwibuku ilya Malamulo linili.

²⁸ U Mwene akakalala nkani, umwakuti akabanyunkulamo muchisu chinichi nukubasumbila kuchisu ichiyeni, ukuyana namumo zibeleye nilelo.”

²⁹ Vilipo ivyakubusyefu vimo vivyo u Mwene u Chala witu atatuvumbuliye, loli atuvumbuliye aswe na bana bitu amalamulo ghache, umwakuti tughakonkaye amalamulo ghanagha bwila na bwila.