Ukukumbusya Amalamulo 28 - IBAYIBOLO 2024

Ulusayo pachifukwa ichakwivwila

¹ Nanti mukumwivwila u Mwene u Chala winyu, nukughakonka amalamulo ghache ghosi ghagho nkubapa ilelo, u Mwene u Chala winyu, akwiza pakubakwezya ukuzichila inko zyosi izya muchisu ichapasi.

² Nanti mukumwivwila u Mwene u Chala winyu, amwe mukwiza pakuba mwe basayiwa nkani.

³ U Mwene akwiza pakutusaya nkani utwaya twinyu utukulu nkani, sona na maghunda ghinyu.

⁴ U Mwene abasaye na bana abinji nkani, ni nyinulo iya mumaghunda ghinyu, sona abape ing'ombe ni ng'ozi inyinji nkani.

⁵ U Mwene azisaye intamba zyinyu, sona ni sonta zyinyu izyakupiyila.

⁶ U Mwene abasaye kosi kuko mukubuka, sona bo mukubwelako.

⁷ U Mwene abavwe umwakuti mukwiza pakubapota abalwani binyu babo bakulwa namwe ubwite. Bo bakwiza pakulwa namwe ubwite, bakwiza pakwenda izila yoka, loli bakwiza pakubachimbila pakwenda izila seveni.

⁸ U Mwene, u Chala winyu akwiza pakuzisaya imbombo zyinyu zyosi, nukwizuzya intamba zyinyu. U Mwene u Chala winyu akwiza pakubasaya muchisu chicho akubapa.

⁹ Nanti mukumwivwila u Mwene u Chala winyu nukughakonka amalamulo ghache ghosi, akwiza pakubapela ukuti mubanje mwe bantu abache abazelu ukuyana namumo akalapila.

¹⁰ Po inko zyosi izya muchisu ichapasi bakwiza pakuzimanya ukuti u Mwene u Chala winyu abasalite ukuti mubanje mwe bantu abache na bache, sona bakwiza pakubanyila.

¹¹ U Mwene akwiza pakubasaya ni vintu ivyiza nkani muchisu chicho akabalayizya abanyenya binyu pakubapa abana abinji nkani, ni vitekwa ivyinji, sona ni nyinulo inyinji nkani.

¹² U Mwene u Chala winyu akwiza pakubapa ivula pakabalilo kache ukufuma kumwanya kuko akuyisunga, sona akwiza pakuzisaya imbombo zyinyu zyosi, umwakuti mukwiza pakuzikopezya inko izinji, loli amwe mutakwiza pakukopa nalumolumo.

¹³ U Mwene, u Chala winyu, akwiza pakubapela ukuti mubanje mwe balongozi pakasi pa inko izinji, sona mutakwiza pakukonka kwisinda bulo. Nanti mukukonka amalamulo ghache ghagho nkubapa ilelo, mukwiza pakuba mwe bapamwanya akabalilo kosi, sona mutakwiza pakuba mwe bapasi, awe.

¹⁴ Polelo mutakapaghukayeko ku mazyu ghagho nkubalamula ilelo manyi ko kunyobe indilo manyi ko kunyobe iyamongo pakubiputa abachala abanji nukubabombela.

Ichighune pachifukwa ichakusita ukwivwila

¹⁵ Loli nanti mutakumwivwila u Mwene u Chala winyu, sona nanti mutakughakonka amalamulo ni ndaghilo zizyo nkubapa ilelo, ivighune vyosi vinivi vikwiza pakubawila.

¹⁶ U Mwene atughune utwaya twinyu utukulu nkani, sona na maghunda ghinyu.

¹⁷ U Mwene azighune intamba zyinyu, sona ni sonta zyinyu izyakupiyila.

¹⁸ U Mwene abaghunaye pakubapa abana abanandi bulo, ni nyinulo inandi, sona ing'ombe ni ng'ozi zyinyu zikwiza pakuba nandi.

¹⁹ U Mwene abaghunaye kosi kuko mukubuka, sona bo mukubwelako.

²⁰ Nanti mukunanga pakumukana u Mwene, akwiza pakubawisizya ichighune nukuvulungana, sona nintamyo pambombo zyinyu zyosi, mupaka mwebosi munanganike nukufwa pakabalilo akapimpa bulo.

²¹ U Mwene akwiza pakubawisizya iviwaya mupaka abanangannye mwebosi muchisu chicho mukwinjila pakwikalamo.

²² U Mwene akwiza pakubafunda nu bubine ubwakukombezannya na mapumba ni zegema. Akwiza pakubawisizya ubupye ubukulu nkani nu lulanga ni mpepo, sona ni chuku mupaka mwebosi muzimile.

²³ Kumwanya kutakwiza pakubatimikizya ivula nayimoyimo, po ichisu chikwiza pakuba chumizu ngati cho chela.

²⁴ U Mwene akwiza pakubawisizya impepo iya lufumbi niya musesenga mubuzilo ubwa vula mupaka mwebosi munanganike.

²⁵ U Mwene akwiza pakubitikizya abalwani binyu ukuti babapote. Bo mukwiza pakulwa nabo ubwite mukwiza pakwenda izila yoka, loli mukwiza pakubachimbila pakwenda izila seveni. Po abamwene bosi aba muchisu ichapasi bakwiza pakuba nubogha bo bakwennya zizyo zyabawila.

²⁶ Iviyuni ni vinyamana vikwiza pakuyilya imivimba yinyu, sona atakwiza pakubapo nayumoyumo umuntu uwakuvichimbizya.

²⁷ U Mwene akwiza pakubapelela amapumba agha bantu aba mu Ijiputi. Akwiza pakubapelela ivitufya, ni mpele, sona nukunyeghela umwakuti mutakwiza pakupola.

²⁸ U Mwene akwiza pakubapennya, nukubapela pakuba mwe bafwamaso nukubavulungannya.

²⁹ Na pamusanya bulo, amwe mukwiza pakupapasyapapasya bulo ngati muntu umufwamaso, sona ivintu vitakwiza pakubendelagha akiza. Isiku ni siku abantu bakwiza pakubakanyilila nukubibila, sona atakwiza pakubapo nayumoyumo uwakubapoka.

³⁰ Ukwiza pakumuzingilila umukolo, loli umuntu uyunji bulo weyuyo akwiza pakumusenda. Ukwiza pakuyizenga inyumba, loli utakwiza pakwikalamo. Ukwiza pakubyala amampesya, loli utakwiza pakuyabamo naghamoghamo.

³¹ Abantu bakwiza pakuyibola ing'ombe yako, bo ukwennya na maso ghako, loli utakwiza pakuyilyapo inyama yache. Bakwiza pakuyifyula impunda yako, bo ukwennya na maso ghako, loli utakwiza pakuyifyula sona. Abalwani bako bakwiza pakuzisenda ing'ozi zyako, po atakwiza pakubapo nayumoyumo uwakuzipoka.

³² Abayeni bakwiza pakubalema abana bako abalumendo na balindu pakuba bazya, bo ukwennya na maso ghako. Isiku ni siku amaso ghako ghakwiza pakubanga kuzila, bo ukulindilila ukuti pamo abana bako bakwiza pakunyokela, loli utakwiza pakubombapo nachimochimo.

³³ Abantu babo utabamenye bakwiza pakukufyula vyosi ivya mumaghunda ghako, vivyo ukiyula pakulima, sona bakwiza pakukukanyilila nukukuyivya akabalilo kosi.

³⁴ Ivintu vivyo ukuvyennya na maso ghako vikwiza pakukupennya.

³⁵ U Mwene akwiza pakukupelela amapumba aghakubaba nkani, ghagho ghate na malembo muvinama na muvimpevu vyako, ukwandila ko kunyayo mupaka kumutu.

³⁶ U Mwene akwiza pakubachimbizizya amwe poka nu mwene winyu kuchisu ichiyeni, chicho amwe pamo abanyenya binyu mutachimenyepo nalumolumo. Kulakula mukwiza pakubiputa abachala abanji, babo bapangiwe na makwi, sona na mabwe.

³⁷ Abantu aba inko zyosi zizyo u Mwene akwiza pakubanyampanikizyako bakwiza pakuba nubogha. Bakwiza pakubaseka nukubobezya.

³⁸ Amwe mukwiza pakubyala imbeyu inyinji nkani, loli mukwiza pakwinula nandi bulo, pachifukwa ichakuti umakanta akwiza pakuzinangannya.

³⁹ Amwe mukwiza pakubyala amampesya nukughalimilila akiza nkani, loli mutakwiza pakuyabamo, pamo ukung'wela uvinyo wache nalumolumo, pachifukwa ichakuti isomi zikwiza pakughalya amampesya ghala

⁴⁰ Amwe mukwiza pakubyala amakwi agha misyunguti muchisu chinyu chosi, loli mutakwiza pakwenga amafuta ghache, pachifukwa ichakuti ivikomwa vikwiza pakulaghala vyene.

⁴¹ Amwe mukwiza pakupapa abana abalumendo na balindu, loli batakwiza pakuba binyu pachifukwa ichakuti bakwiza pakulemiwa pakuba bazya.

⁴² Umakanta akwiza pakughanangannya amakwi ghinyu, sona ni mbeyu zyinyu zyosi izya mumaghunda ghinyu.

⁴³ Abayeni babo bakwikala muchisu chinyu bo babo bakwiza pakuba na maka nkani ukubachila, loli amwe mukwiza pakuba mwe badedebazu.

⁴⁴ Bakwiza pakubakopezya indalama, loli amwe mutakwiza pakubakopezya. Pabumalilo bakwiza pakuba balongozi binyu, po amwe mukwiza pakukonkagha bulo kwisinda.

⁴⁵ Nanti mutakumwivwila u Mwene u Chala winyu, nukuzikonka indaghilo na malamulo ghagho nkubapa, kokuti ivighune vyosi vinivi vikwiza pakubawila.

⁴⁶ Ivighune vinivi vikwiza pakuba chimanyilo, sona ichakubasoka amwe na baluko lwinyu bwila na bwila.

⁴⁷ U Mwene u Chala winyu akabasaya amwe muvintu vyosi, pope bulo amwe mutakamubombela na moyo amahobosu na masangalusu.

⁴⁸ Polelo mukwiza pakubabombela abalwani binyu, babo u Mwene akwiza pakubatumila. Mukwiza pakuba nizala ni nyota sona abapina nkani. U Mwene akwiza pakubayivya nkani mupaka abanangannye mwebosi.

⁴⁹ U Mwene akwiza pakulwitizya uluko ulwakufuma kumpaka iya chisu ichapasi, uluko lulo ineno yabo mutayimenye. Uluko lunulu lukwiza pakubizila ngati lyo lizwanga.

⁵⁰ Uluko lunulu lukwiza pakuba lwakoghofya nkani, lulo lutakwiza pakumupelela ichisa nayumoyumo umuntu, manyi mwana, manyi muntu umughosi.

⁵¹ Bakwiza pakubalyela ing'ombe zyinyu, sona ni vya mumaghunda ghinyu mupaka mufwe nizala. Batakwiza pakubalekela nachimochimo ichintu manyi ngano, manyi we vinyo umupya, manyi mafuta agha misyunguti manyi ng'ombe manyi ng'ozi mupaka mufwe mwebosi.

⁵² Bakwiza pakutuzyungulila utwaya twinyu tosi utukulu nkani muchisu chinyu mupaka amalinga amatalitali ghinyu ghagho mukughasubila ghamongoke ghosi. Bakwiza pakutuzyungulila utwaya twinyu tosi utukulu nkani muchisu chicho u Mwene u Chala winyu akubapa.

⁵³ Pachifukwa icha mayimba ghagho abalwani binyu bakwiza pakubapelela, bo bakutuzyungulila utwaya twinyu, amwe mukwiza pakuyimba nkani nizala, umwakuti mukwiza pakulya abana binyu abalumendo na balindu, babo u Mwene u Chala winyu abapiye.

⁵⁴ Nayumoyumo umuntu pakasi papinyu, manyi muntu umumanyikwe manyi wamahala yuyo akwiza pakumupelela ichisa uwamwabo pamo umuchi wache yuyo umughanite pamo abana bache babo basyalapo,

⁵⁵ umwakuti atakwiza pakumupako nayumoyumo umwana wache yuyo akumulya pachifukwa ichakuti atakwiza pakuba ni chakulya nachimochimo pakabalilo kako abalwani binyu bakutuzyungulila utwaya twinyu.

⁵⁶ Napapo angaba mukolo umumanyikwe, manyi wakuboneka akiza nkani umwakuti atangakanya na pasi, akwiza pakumwima umulume wache, yuyo umughanite, na bana bache bosi

⁵⁷ ichipapilo chicho chafuma mulwanda lwache sona nabana babo akupapa. Pakuti vinivi vyo vivyo akwiza pakulyanga kubusyefu, pachifukwa ichakuti ate ni chakulya, pakabalilo kako abalwani binyu bakutuzyungulila utwaya twinyu utukulu nkani.

⁵⁸ Nanti mutakughakonka amalamulo ghosi ghagho ghasimbiwe mwibuku linili, sona nanti mutakumunyila u Mwene u Chala winyu, nukulichindika itabwa lyache ilyakuswighisya u Mwene u Chala winyu ni lyabuchindamu,

⁵⁹ po u Mwene akwiza pakubawisizya amwe na baluko lwinyu, iviwaya ivipalapala, nintamyo zizyo zitakumala, sona nu bubine bubo bute namalembo naghamoghamo.

⁶⁰ Akwiza pakubawisizya ububine ubupalapala nkani, bubo mukabwennya mu Ijiputi, bubo bute na malembo naghamoghamo.

⁶¹ U Mwene akwiza pakubawisizya sona ububine ubwakulekanalekana, poka ni viwaya vivyo vitasimbiwemo Mwibuku ilya Malamulo mupaka mwebosi munanganike.

⁶² Napapo mwe binji nkani ngati zyo ntondwa, amwe mukwiza pakusyala banandi bulo, pachifukwa ichakuti mutakamwivwila u Mwene u Chala winyu.

⁶³ Ukuyana namumo chikamuhobosezya u Mwene pakubapela ukuti ivintu vibendelaye akiza, sona nukuti mubanje mwe binji nkani, po chikwiza pakumuhobosya u Mwene pakubanangannya nukubazimizya. Akwiza pakubanyunkulamo muchisu chicho mukubuka pakwikalamo.

⁶⁴ Pisinda pache u Mwene akwiza pakubanyampanikizya pakasi pa inko zyosi, ukwandila ko kumpaka iya chisu ichapasi mupaka iyinji. Kulakula mukwiza pakubiputa abachala abanji, babo bapangiwe na makwi, sona na mabwe, abachala babo amwe pamo abanyenya binyu mutabamenyepo nalumo.

⁶⁵ Mutakwiza pakuwagha naghumoghumo umutende pakasi pa inko izinji, pamo ubuzilo ubwakutuzyapo ubwinyu nu bwinyu. U Mwene akwiza pakughapela amoyo ghinyu pakuba mumwanyamwanya bulo, na bafwamaso, sona na basulumannye.

⁶⁶ Amwe mukwiza pakwikalagha mukwilamwa akabalilo kosi. Pamusanya na pabusiku mukwiza pakuba nubogha, sona mutakwiza pakuchimanya na chicho chikwiza pakubawila.

⁶⁷ Amoyo ghinyu ghakwiza pakuba nubogha, umwakuti pandabindabi mukwiza pakunenagha ukuti, “Nalondagha ukuti ngali pabanga po pachamabwila,” sona pachamabwila mukwiza pakunenagha ukuti, “Nalondagha ukuti ngali pabanga po ndabindabi,” pachifukwa icha vivyo mukwiza pakuvyennya na maso ghinyu.

⁶⁸ U Mwene akwiza pakubanyosezya ku Ijiputi mumabwato amakulu nkani, napapo akababuzya ukuti mutakwiza pakunyokelako sona. Kulakula mukwiza pakwighulizya mwebene pakuba mwe bazya aba balwani binyu, loli atalipo nayumoyumo yuyo akwiza pakubaghula.