Ukukumbusya Amalamulo 27 - IBAYIBOLO 2024

Amalamulo agha Chala amasimbe pamabwe

¹ Po u Mozesi, poka na basongo aba ba Izilayeli bakababuzya abantu bakati, “Mughakonkaye amalamulo ghosi ghagho nkubapa ilelo.

² Bo mwaloboka ulusoko ulwa Yolodani nukwinjila muchisu icha mboto chicho u Mwene, u Chala winyu akubapa, mwimike amabwe ghamo amatali nukughasingula.

³ Po musimbemo amazyu agha malamulo ghosi ghanagha, bo mwaloboka nukwinjila muchisu icha mboto chicho u Mwene, u Chala winyu akubapa, ukuyana namumo u Mwene, u Chala winyu akabalayizizya abanyenya binyu.

⁴ Bo mwaloboka ulusoko ulwa Yolodani, mughimike amabwe ghanagha pighamba ilya Ebala, ukuyana namumo nkubalamulila ilelo, nukughasingula.

⁵ Palapala mumuzengele u Mwene, u Chala winyu ichighemo icha mabwe ghagho ghatabiziwepo ni chela nachimochimo.

⁶ Mumuzengele u Mwene u Chala winyu ichighemo chicho chitabiziwepo nalumolumo. Mubikayepo ivyakwiyipa ivyakocha kwa Mwene, u Chala winyu.

⁷ Pisinda pache mubikayepo nukulyelapo ivyakwiyipa ichabupoka nukusekela pamaso pa Mwene, u Chala winyu.

⁸ Musimbepo umwakuboneka akiza nkani pamabwe ghalaghala amalamulo ghosi ghanagha.”

⁹ Po u Mozesi poka na baputi, babo ba Levi bababuzye aba Izilayeli ukuti, “Mwee ba Izilayeli, banga myee, sona ivwa kuno! Ilelo mwaba mwe bantu aba Mwene u Chala winyu.

¹⁰ Po mumwivwilaye u Mwene u Chala winyu nukuzikonka indaghilo zyache, sona na malamulo ghache ghosi ghagho nkubapa ilelo.”

Ichighune pachifukwa ichakusita ukwivwila

¹¹ Po pisiku lilalila u Mozesi akabalamula aba Izilayeli akati:

¹² Bo mwaloboka ulusoko ulwa Yolodani, uluko ulwa Simiyoni nulwa Levi nulwa Yuda nulwa Isakala nulwa Yosefu sona nulwa Benjamini lubasaye abantu, bo abene bali pighamba ilya Gelizimu.

¹³ Loli uluko ulwa Lubeni nulwa Gadi nulwa Asheli nulwa Zebuloni nulwa Dani sona nulwa Nafutali lubaghune abantu, bo abene bali pighamba ilya Ebala.

¹⁴ Aba Levi bakolomokaye nkani na mazyu aghakuti:

¹⁵ “Aghuniwanje ufundi wesi yuyo akubiza, pamo akumata ichifwani ichamwiko nukuchichindika kubusyefu, pakuti u Mwene avibengite ivintu vivyo vipangiwe ni nyobe izya bantu.” Po abantu bosi bamule batinji, “Ameni.”

¹⁶ “Aghuniwanje umuntu wesi yuyo akumusamula uwise nu nyina.” Po abantu bosi bamule batinji, “Ameni!”

¹⁷ “Aghuniwanje umuntu wesi yuyo akwandula impaka iya mupalamani wache.” Po abantu bosi bamule batinji, “Ameni!”

¹⁸ “Aghuniwanje umuntu wesi yuyo akumusobezya umufwamaso.” Po abantu bosi bamule batinji, “Ameni!”

¹⁹ “Aghuniwanje umuntu wesi yuyo akusendelapo ulusako pa bayeni, na balanda sona na bakolo abafwilwe.” Po abantu bosi bamule batinji, “Ameni!”

²⁰ “Aghuniwanje umuntu wesi yuyo akughona nu muchi uwa wise, pakuti bunubu akumukozya isoni uwise.” Po abantu bosi bamule batinji, “Ameni!”

²¹ “Aghuniwanje umuntu wesi yuyo akughona ni chinyamana.” Po abantu bosi bamule batinji, “Ameni!”

²² “Aghuniwanje umuntu wesi yuyo akughona nu muyemba wache, pamo umuyemba uwa mwa wise uyunji, pamo umuyemba wache uwa mwa nyina uyunji.” Po abantu bosi bamule batinji, “Ameni!”

²³ “Aghuniwanje umuntu wesi yuyo akughona nu nyinavyala.” Po abantu bosi bamule batinji, “Ameni!”

²⁴ “Aghuniwanje umuntu wesi yuyo akumughogha umuntu uwamwabo kubusyefu.” Po abantu bosi bamule batinji, “Ameni!”

²⁵ “Aghuniwanje umuntu wesi yuyo akupokela amabeko ukuti amughoghe umuntu umusita nongwa.” Po abantu bosi bamule batinji, “Ameni!”

²⁶ “Aghuniwanje umuntu wesi yuyo atakughakonka amalamulo ghanagha.” Po abantu bosi bamule batinji, “Ameni!”