Ukukumbusya Amalamulo 26 - IBAYIBOLO 2024

Ivyakwiyipa ivya nyinulo

¹ Bo mwinjila nukwikalana muchisu chicho u Mwene, u Chala winyu, akubapa ukuti chibanje mpyana yinyu,

² mubikaye muvidudunga ivikomwa ivyakwanda pakutona ivya nyinulo yinyu yosi yiyo mwinuye mumaghunda ghinyu muchisu chicho u Mwene u Chala winyu akubapa. Po mubukaye navyo pabuzilo ubwakwiputilapo bubo u Mwene u Chala winyu akwiza pakubusala,

³ nukumubuzya umuputi yuyo ali pambombo pakabalilo kalakala ukuti, “Ilelo tuzimenye ukuti u Mwene, u Chala witu, atwinjizya muchisu chicho akabalayizya abanyenya bitu ukuti akwiza pakutupa aswe.”

⁴ Umuputi yula asenda ividudunga vila munyobe zyinyu nukuvibika pantazi pachighemo icha Mwene, u Chala winyu.

⁵ Po munenaye pamaso pa Mwene, u Chala winyu mutinji, “Umunyenya witu akaba mu Alamu uwakwendakwenda, yuyo akabuka ku Ijiputi na bamunyumba yache, babo bakaba banandi nkani nukwikala kulakula. Pisinda pache lukaba luko lukulu nu lwamaka, sona bakaba binji nkani.

⁶ Loli aba Ijiputi bakatuyivya nkani pakutubombezya imbombo iya buzya.

⁷ Po tukamulilila u Mwene, u Chala uwa banyenya bitu. U Mwene akatwivwa, nukwennya amayimba ghitu, nintamyo zyitu, ni mbombo inkafu zizyo tukabombagha, sona namumo bakatukanyililagha.

⁸ Po u Mwene akatwefyamo mu Ijiputi na maka ghache amakulu pakubomba ivintu ivikulu, sona akapela ivyika ni viswigho ivyakoghofya nkani.

⁹ Pabumalilo akatufisya kuno nukutupa ichisu icha mboto chinichi.

¹⁰ Polelo tukumusendela u Mwene, ivikomwa ivyakwanda pakutona ivya nyinulo izyakufuma muchisu chicho atupiye.” Palapala mutule ividudunga vila pamaso pa Mwene u Chala winyu nukumwiputa.

¹¹ Po amwe naba Levi poka na bayeni babo bakwikala pakasi papinyu musekelaye pachifukwa icha ivintu ivyiza vyosi vivyo u Mwene u Chala winyu abapiye amwe na bamunyumba zyinyu.

¹² Umwaka ghosi uwabutatu, mubapanje aba Levi, na bayeni, na balanda, na bakolo abafwilwe ichagaba choka pavigaba vyosi 10 ivya nyinulo yinyu, umwakuti bangalya nukwikuta mutwaya twinyu.

¹³ Po unenaye pamaso pa Mwene u Chala wako utinji, “Chitalipo nachimo ichigaba choka pavigaba vyosi 10 chicho chasyala munyumba yane. Vyosi vinivi nabapa aba Levi, na bayeni, na balanda, na bakolo abafwilwe ukuyana namumo ukadumulila. Ntakaghasulannyapo pamo ukughaluvyapo nalumolumo amalamulo ghako.

¹⁴ Ntaliyepo nachimochimo ichigaba ichipaghuliwa pakabalilo kako nkaba pachililo, pamo ukwefyepo chimo, pakabalilo kako nkaba muntu umunyazu, pamo ukubikapo chimo ichigaba ku bantu abafwe. Namwivwila u Mwene, u Chala wane, nukubomba zizyo akandamulila.

¹⁵ Bo uli kumwanya kubuzilo bwako ubuzelu, wennye pachisu ichapasi, nukubasaya abantu bako aba Izilayeli. Uchisaye sona ni chisu icha mboto chicho utupiye, ukuyana namumo ukabalapila kubanyenya bitu.”

Abantu bache aba Mwene

¹⁶ Ilelo u Mwene u Chala winyu akubalamula ukuti muzikonkaye indaghilo zyache na malamulo ghache ghosi. Mwenelezye nkani ukuti mukughakonka nu moyo winyu ghosi, sona nu muzimu winyu ghosi.

¹⁷ Ilelo mwitika ukuti u Mwene we Chala winyu, sona nukuti mukwiza pakuzikonka indaghilo zyache na malamulo ghache ghosi, nukubomba zyosi zizyo akubalamula.

¹⁸ Ilelo u Mwene itika ukuti amwe mwe bantu abache na bache, ukuyana namumo akabalayizizya, nanti mukughakonka amalamulo ghache.

¹⁹ U Mwene u Chala winyu akwiza pakubapela pakuba mwe luko ulukulu nkani ukuzichila inko zyosi zizyo akazipela, umwakuti amwe mukwiza pakumupalagha nukumuchindika. Amwe mukwiza pakuba mwe bantu bache ukuyana namumo akabalayizizya.