Ukukumbusya Amalamulo 25 - IBAYIBOLO 2024

¹ Buli nanti abantu babili bakudalinkana, po bakubuka ku balongi, babo bakwiza pakudumula inongwa yila. Abalongi bala bakumunena ukuti weka ate ninongwa, nukumunena uyunji yula ukuti ali ninongwa.

² Nanti chikulondiwa ukuti umuntu yuyo aghiwa ninongwa asyempiwe, umulongi amulamule ukuti akupame pasi, asyempiwe ni vikoti vivyo apimiliwe ukuyana ninongwa yache.

³ Angasyempiwa mupaka ni vikoti 40, loli vitakachilaye 40. Nanti ivikoti vikuchila 40, kokuti chikwiza pakumukozya isoni uwamwinyu yula.

⁴ Mutakayipinyaye ing'ombe kumulomo, bo yikukoma amalezi.

⁵ Nanti abanamuntu bakwikala poka, po nanti weka afwa umusita abana abalumendo, umukolo umufwilwe yula atakasendiwanje nu muntu bulo, yuyo ate wa munyumba yila. Loli uwamwabo uwa muyazi yula umupyane umufwilwe yula ukuti endelele pakubomba imbombo yiyo uwamwabo akayileka.

⁶ Umwana umulumendo uwakwanda uwa mukolo umufwilwe yula asende itabwa ilya wise umuyazi, umwakuti itabwa lyache litakazimile mu Izilayeli.

⁷ Loli nanti uwamwabo uwa muyazi yula atakulonda pakumupyana umufwilwe yula, po umukolo umufwilwe yula abukaye ku basongo pamulyango uwa kaya nukuti, “Umukoyi wane atakulonda pakupyana itabwa ilya wamwabo mu Izilayeli. Akukana pakumpyana.”

⁸ Po abasongo aba mukaya kala bamwitizye nukunena nawe. Nanti akwendelela pakunena ukuti, “Ntakulonda pakumupyana umukoyi wane,”

⁹ umukolo umufwilwe yula abukaye ku mukoyi wache pamaso pabasongo nukumuvula inkwato ichinama choka, bo akumufwinila amati nukuti, “Umu momumo zikubombeliwanga nu muntu yuyo akukana pakumupyana umukoyi wache.”

¹⁰ Po abamunyumba iya muntu yula bakwiza pakwitiziwanga mu Izilayeli ni tabwa ilyakuti, “Abamunyumba iya muntu yuyo akavuliwa inkwato ichinama choka.”

Amalamulo aghanji

¹¹ Nanti abanavuli babili bakulwa, sona nanti umuchi uwa mwanavuli weka iza pakumupoka umulume wache, nukumulema umulwani wache kunkule,

¹² mutakamupelelaye ichisa umukolo yunuyu, mumudumule inyobe.

¹³ Mutakabanje ni vipimilo ivyakupimila ubung'wamu vibili munyambi zyinyu, choka iching'wamu, sona ichinji ichipepusu.

¹⁴ Mutakabanje ni vipimilo vibili ivyakulekana munyumba zyinyu, choka ichikulu, sona ichinji ichinandi.

¹⁵ Loli mubanje ni vipimilo ivyanaloli ni vyenecho, umwakuti mubanje nubumi ubutali muchisu chicho u Mwene u Chala winyu akubapa.

¹⁶ U Mwene, u Chala winyu ababengite abantu babo bakubazimbula abamwabo.

¹⁷ Mukumbukaye zizyo aba Amaleki bakababombela, bo mukwepamo mu Ijiputi.

¹⁸ Aba Amaleki bala batakamunyilagha u Chala. Bakalwa namwe ubwite, bo mulitite nkani nukubaghogha abamwinyu bosi babo bakasyalikila kwisinda.

¹⁹ Polelo bo u Mwene, u Chala winyu, abapoka munyobe izya balwani binyu bosi babo babazyunguliye nukwikala muchisu chicho akubapa ukuti chibanje mpyana yinyu, mubaghoghe aba Amaleki, umwakuti atakabepo nayumoyumo umuntu uwakubakumbuka sona muchisu ichapasi. Mutakaluvyanje zinizi.