Ukukumbusya Amalamulo 24 - IBAYIBOLO 2024

Nizya kusoka nukusenda sona

¹ Buli nanti umwanavuli amusenda umukolo, loli pisinda pache umukolo yula atakumuhobosya sona, pachifukwa ichakuti amwagha nacho chimo ichakukozya isoni, po amusimbile ukalata uwasoka nukumupa umukolo yula. Po angamwefyamo munyumba yache.

² Loli nanti umukolo yula akusendiwa nu mwanavuli uyunji,

³ sona nanti wepe umwanavuli uyunji yula atakumulonda, nukusimba ukalata uwakusoka nukumupa umukolo yula. Nanti umukolo yula amwefyamo munyumba yache, pamo nanti umwanavuli afwa,

⁴ umulume wache uwakwanda yuyo akamusosya atangamusenda sona, amupime pakuba mukolo umunyazu. Nanti akumusenda sona, kokuti akubomba ichintu ichibibi nkani pamaso pa Mwene. Mutakabwinjizye ububibi muchisu chicho u Mwene u Chala winyu akubapa ukuti chibanje mpyana yinyu.

Amalamulo aghakulekanalekana

⁵ Nanti umwanavuli amusenda bulo umukolo, atakabukaye pakulwa ubwite pamo ukumusimba pambombo nayimoyimo. Ikalaye bulo panyumba umwaka ghoka umwakuti amuhobosyanje umuchi wache yuyo amusendite.

⁶ Nanti ukumwazimya umuntu ichintu chimo, utakamusendelaye ulwala lwache pakuba chikole, pachifukwa ichakuti pakubomba bunubu kokuti ukumufyula ichintu chicho chingamwavwa ukuti abanje nubumi.

⁷ Nanti umuntu yuyo akumwiba umu Izilayeli uwamwabo, pamo akumupima pakuba muzya, pamo akumughulizya, umuntu yulayula aghoghiwanje. Bunubu mukwiza pakwefyapo ububibi pakasi papinyu.

⁸ Nanti alipo umuntu uwamambombo, mwenelezye nkani ukuti mukukonka zyosi zizyo bakubabuzya abaputi, babo ba Levi. Mwenelezye ukuti mukukonka amalamulo ghosi ghagho nabapa.

⁹ Mukumbukaye zizyo u Mwene u Chala winyu akamubombela u Miliyamu, bo mukwepamo mu Ijiputi.

¹⁰ Nanti wamwazimya umupalamani wako ichintu chimo, utakinjilaye munyumba yache pakusenda umwenda wache, ghugho akulonda pakukupa pakuba chikole.

¹¹ Loli umulindilile kuzi mupaka umuntu yuyo ukumwazimya ize pakukupa ichikole chila.

¹² Nanti umuntu yula mupina, utakaghonaye nagho kunyumba yako umwenda wache, ghugho akupiye pakuba chikole.

¹³ Umunyosezye bo ni zuba lichili pakwinjila, umwakuti ivwinke pabusiku. Bunubu umuntu yula akwiza pakukupalizya, po u Mwene u Chala akwiza pakuhoboka nawe.

¹⁴ Nanti wamwinjizya pambombo umuntu umupotwe pamo umuzya, manyi mu Izilayeli uwamwinyu, manyi muyeni yuyo akwikala mutwaya twinyu, utakasendelepo ulusako ukuti we muzya.

¹⁵ Isiku lyosi, bo izuba lichili pakwinjila umulipilaye amalipilo ghache pachifukwa ichakuti mupina, sona ubumi bwache bweghamiye pamalipilo ghalaghala. Lumo angalilila kwa Mwene u Chala wako, po bunubu ukwiza pakuba ninongwa.

¹⁶ Abapapi batakaghoghiwanje pachifukwa icha mbibi izya bana babo, bope abana batakaghoghiwanje pachifukwa icha mbibi izya bapapi babo. Loli umuntu wesi aghoghiwanje pachifukwa icha mbibi izyache ni zyache.

¹⁷ Mubalongelaye mubwanaloli abayeni pamo abalanda, sona mutakamufyule umwenda umukolo umufwilwe pakuba chikole.

¹⁸ Mukumbuke ukuti namwe bulo mukaba mwe bazya mu Ijiputi, po u Mwene u Chala winyu akabapoka muchisu chila. Ichi cho chifukwa nkubapa ilamulo linili.

¹⁹ Bo ukwinula mumughunda wako, po nanti wapotwa pakuvinyamula vyosi vivyo winula utakanyokelaye sona pakuvisenda. Vinivi ubalekele abayeni na balanda sona na bakolo abafwilwe umwakuti u Mwene u Chala winyu azisaye imbombo zyinyu zyosi zizyo ukubomba.

²⁰ Bo ukuyaba imisyunguti, utakanyokelaye sona pakuyaba musamba zila. Vilavila ubalekele abayeni na balanda sona na bakolo abafwilwe.

²¹ Bo ukuyaba amampesya mumughunda wako, utakapyanizye pakuyaba sona amampesya aghakusyalikila. Vilavila ubalekele abayeni na balanda sona na bakolo abafwilwe.

²² Mukumbuke ukuti namwe bulo mukaba mwe bazya mu Ijiputi. Ichi cho chifukwa nkubapa ilamulo linili.