Ukukumbusya Amalamulo 23 - IBAYIBOLO 2024

Indaghilo nizya chiputo icha Mwene

¹ Umwanavuli yuyo apasiwe pamo inkule yache yidumuliwe, atakabanje palukomano ulwa bantu aba Mwene.

² Nayumoyumo umwana umusiwana, pamo weka uwa baluko lwache mupaka inkulilo iya 10, atakabanjepo palukomano ulwa Mwene.

³ Nayumoyumo umu Amoni pamo umu Mowabu, pamo uwa weka uwa baluko lwabo mupaka inkulilo iya 10, atakabanjepo palukomano ulwa bantu aba Mwene.

⁴ Pakuti abantu banaba batakabapa ivyakulya pamo amizi pabulendo bwinyu, bo mukwepamo mu Ijiputi. Bakamwitizya u Balamu, umwana uwa Bewoli uwamu Petoli muchisu icha Mesopotamiya ukuti abaghune.

⁵ Loli u Mwene u Chala winyu atakamuteghelezya u Balamu yula. Loli akachandula ichighune chila pakuba lusayo, pachifukwa ichakuti u Mwene u Chala winyu abaghanite.

⁶ Mubumi bwinyu bosi, mutakabombaye nachimochimo ichintu ukuti chibavwe abantu aba inko zinizi, umwakuti ivintu vyabo vibendelaye akiza.

⁷ Mutakabasamule aba Edomu, pachifukwa ichakuti bo bakamu binyu. Mutakabasamule aba Ijiputi pachifukwa ichakuti pakabalilo kamo mukaba mwe bayeni muchisu chabo.

⁸ Ukwandila inkulilo iyabutatu iya bana babo mupaka kuntazi, abaluko lwabo bangaba palukomano ulwa bantu aba Mwene.

Ukuswefya muvisakasa ivya bwite

⁹ Bo mukubuka pakulwa na balwani binyu, mwenelezye nkani ukuti mutakachipalamasye nachimochimo ichintu icha mwiko.

¹⁰ Nanti umuntu yumo inyazya mwene pachifukwa ichakulota pabusiku afumya ubwanavuli, epemo muvisakasa nukubuka kuzi.

¹¹ Loli pachamabwila oghe, pisinda pache anganyokela muvisakasa bo izuba likwinjila.

¹² Mubanje nu buzilo kuzi ukwa visakasa, kuko mungabuka pakwiyavwilizya.

¹³ Ivilwilo vivyo muli navyo, mwenelezye ukuti muli nacho ichibombelo chimo ichakukumbila, umwakuti nanti mwabuka pakwiyavwilizya mungakumba akaliba nukufukila ubunyazu bula.

¹⁴ Muvisakasa vyinyu mutabanje ubunyazu, pachifukwa ichakuti u Mwene u Chala winyu, akwendakwenda pakasi pa visakasa vyinyu, ukuti abapoke munyobe izya balwani binyu. Ivisakasa vyinyu vibanje viswepu, umwakuti atakabwennyemo nabumobumo ubunyazu, bubo bungamupela u Mwene ukuti epepo pakasi papinyu.

Amalamulo aghakulekanalekana

¹⁵ Nanti umuzya amuchimbila u mwene wache nukwiza pakwikala namwe, mutakamunyosezyanje kwa mwene wache.

¹⁶ Mumuleke ikalaye pakasi papinyu, sona angikala mukaya kosi kako umwenecho angighana. Mutakamuyivyanje awe.

¹⁷ Patakabepo nayumo umwanavuli pamo umukolo umu Izilayeli uwakuba we malaya mu Nyumba iya Chala.

¹⁸ Mutakize ni ndalama izya bwamalaya, manyi umalaya umwanavuli manyi umalaya umukolo mu Nyumba iya Mwene u Chala winyu, ukuti mukwanilisye ichilapo chinyu, pachifukwa ichakuti u Mwene avibengite vyosi vinivi.

¹⁹ Nanti wamukopezya umu Izilayeli uwamwinyu indalama, pamo ichakulya, pamo ichintu chimo, utakamulipisye ichakukabilapo.

²⁰ Umuyeni mwene weyuyo ungamulipisya ichakukabilapo, loli umu Izilayeli uwamwinyu, awe, umwakuti u Mwene u Chala winyu azisaye imbombo zyinyu zyosi muchisu chicho mukubuka pakwikalamo.

²¹ Nanti walapa ichintu chimo kwa Mwene, u Chala wako, utakazyelaye, pakuti u Mwene u Chala wako akwiza pakuchilonda ichintu chilachila, po ukwiza pakuba ninongwa nanti utakuchikwanilisya.

²² Loli nanti utakulapa, kokuti ute ninongwa.

²³ Po wenelezye ukuti wakwanilisya ichintu chosi chicho wanena, pakuti chicho ukulapa kwa Mwene, u Chala wako, ukuchilapila mubwighane bwako.

²⁴ Nanti ukudumusannya mumughunda uwa mampesya uwa mupalamani wako, ungalyako amampesya ukuyana namumo wighaniye, loli utakabikaye ghamo muchidudunga.

²⁵ Nanti ukudumusannya mumughunda uwa ngano uwa mupalamani wako, ungalyako ingano pakupulula ni nyobe, loli utakabole ni chikwakwa.