Ukukumbusya Amalamulo 22 - IBAYIBOLO 2024

¹ Nanti ukuyennya ing'ombe pamo ing'ozi iya mu Izilayeli uwamwinyu yikupulumpa, utakayileke bulo, loli uyisokolele kumwenecho.

² Loli nanti umwenecho akwikala kubutali nkani, pamo nanti utamumenye, po uyisokolele kunyumba yako nukuyisunga. Nanti umwenecho iza pakuyilonda, umupe.

³ Nanti wayagha impunda pamo umwenda uwa mupalamani wako pamo ichintu chosi chicho asobezya utakachileke bulo.

⁴ Nanti ing'ombe pamo impunda iya mupalamani wako yipunula nukuwa pasi mumusebo utakayileke bulo loli uyinyamusye.

⁵ Abakolo batakavwalaye amenda agha banavuli, sona bope abanavuli batakavwalaye amenda agha bakolo, pakuti u Mwene u Chala winyu ababengite nkani abantu babo bakubomba ivyamwiko.

⁶ Nanti wachagha ichivulumbo icha chiyuni mwikwi, pamo pasi bulo, bo unyina ubatiye amafumbi pamo chili nu twana twache, utakamusende unyina poka nu twana twache.

⁷ Ungatusenda utwana tula, loli umuleke unyina abukaye, umwakuti ivintu vyosi vibendelaye akiza, sona nukuti mwikalaye nubumi ubutali.

⁸ Bo ukuzenga inyumba, wenelezye ukuti wazenga ulupaso ukuzyungulila mulubazu ulwa chisonje. Po utakwiza pakuba ninongwa nanti umuntu yumo awila pasi nukufwa.

⁹ Mutakabyalaye imbeyu zibili mumughunda ghoka uwa mampesya. Nanti mwabomba bunubu, kokuti amampesya, pamo imbeyu zinyu zikwiza pakuba nyazu.

¹⁰ Utakayipinye ing'ombe poka ni mpunda bo ukulima mumughunda.

¹¹ Mutakavwale umwenda ghugho ghusoniwe na meya poka numutonte.

¹² Usone amabuzi amatalimatali munkuto zyosi folo izya menda ghinyu.

Indaghilo nizya sendwa

¹³ Buli nanti umwanavuli amusenda umulindu, yuyo atamumenyemo nalumo umwanavuli nukughonana nawe, po pisinda pache atakumulonda sona,

¹⁴ nukwanda pakumuyeba nukumukozya isoni nukuti, “Umukolo uyu atakaba mulindu pakabalilo kako nkamusendela.

¹⁵ Nanti umwanavuli abomba bunubu, abapapi aba mulindu yula bize nu bwakaboni pamaso pa basongo aba mukaya kala pamulyango uwa kaya, ubwakusimikizya ukuti umulindu yula atakamumanya nalumolumo umwanavuli.

¹⁶ Uwise akwiza pakubabuzya abasongo bala ukuti, ‘Nkamwitikizya umwanavuli uyu ukuti amusende umwana wane umulindu, loli ilelo atakumulonda sona.’

¹⁷ Losi ulu akumuyeba pakunena ukuti, ‘Umwana wako uyu atakaba mulindu.’ Loli ubu bo bwakaboni bwane ubwakuti umwana wane akaba mulindu yuyo atamumenyemo nalumo umwanavuli.” Po abapapi bakwiza pakubalanjizya abasongo aba kaya kala umwenda uwa mulindu yula.

¹⁸ Po abasongo bala bamufunde pakumusyempa umwanavuli yula.

¹⁹ Pisinda pache amuposole amashekeli ama siliva 100 uwise uwa mulindu yula, pachifukwa ichakuti amukozya isoni umulindu umu Izilayeli yula. Po endelele pakuba muchi wache, sona atangamusosya nalumo mubumi bwache bosi.

²⁰ Loli nanti zizyo akunena umwanavuli yula zyanaloli, sona ubwakaboni butalipo ubwakusimikizya ukuti umukolo yula atakaba mulindu yuyo atamumenyemo nalumo umwanavuli,

²¹ po bamusendele umulindu yula pamulyango uwa nyumba iya wise. Abanavuli aba mukaya kala bamughoghe na mabwe. Umulindu yunuyu abomba ichintu ichamusamu pakasi paba Izilayeli pakulowa, bo achili ali munyumba iya wise. Bunubu mukwiza pakwefya ububibi pakasi papinyu.

²² Nanti umwanavuli bamulema nu muchi uwa muntu, bosi babili baghoghiwanje. Bunubu mukwiza pakwefya ububibi pakasi papinyu.

²³ Buli nanti umwanavuli bamulema nu mulindu mukaya yuyo atamumenyemo nalumo umwanavuli, sona yuyo azingililiwe nu muntu uyunji,

²⁴ mubasendele bosi babili kuzi ukwa kaya akakulu nukubaghogha pakubasumba na mabwe. Umulindu yula aghoghiwanje pachifukwa ichakuti atakakolomoka ukuti abantu bamwavwe. Umwanavuli aghoghiwanje pachifukwa ichakuti alowa nu muchi uwa muntu. Bunubu mukwiza pakwefya ububibi pakasi papinyu.

²⁵ Nanti umwanavuli amulema pamaka kwisote umulindu yuyo azingililiwe nu mwanavuli uyunji nukughonana nawe, umwanavuli mwene we aghoghiwanje.

²⁶ Mutakamubombelaye nachimochimo umulindu yula pachifukwa ichakuti atabombite nayimoyimo imbibi yiyo angaghoghiwa nayo. Inongwa yiniyi yiyanite ninongwa iya muntu yuyo amuvwamiliye bulo umupalamani wache nukumughogha.

²⁷ Umwanavuli yula akamulema bulo pamaka kwisote umulindu, yuyo azingililiwe nu muntu uyunji nukughonana nawe, napapo umulindu yula akayezya pakukolomoka, loli atakabapo nayumoyumo umuntu uwakumupoka.

²⁸ Buli nanti umwanavuli bamulema nu mulindu yuyo atamumenyemo nalumo umwanavuli, sona yuyo atazingililiwe nu muntu uyunji nukughonana nawe pamaka.

²⁹ Umwanavuli yula amuposole uwise uwa mulindu yula indalama isalabazya amashekeli 50. Pisinda pache amusende umulindu yula pakuba muchi wache pachifukwa ichakuti akalowa nawe, sona atakamusosye mubumi bwache bosi.

³⁰ Umuntu atakalowanje nu muchi uwa wise, sona atakachinyazyanje ichitala icha wise.