Ukukumbusya Amalamulo 21 - IBAYIBOLO 2024

Umughoghi umusita kumanyikwa

¹ Nanti umuntu aghiwa aghoghiwe kwisote muchisu chicho u Mwene u Chala winyu akubapa, sona umuntu yuyo amughoghite mutamumenye,

² abasongo na balongi binyu bakwiza pakubuka kulakula nukwennya ubutali bwache ubwakufuma papo pali umuvimba mupaka ku twaya utupalamani.

³ Po abasongo aba mukaya kako kapalamanite nkani na papo pakaghiwapo umuvimba, basalepo impampali yiyo yitavwalitepo nalumo ikoli.

⁴ Babuke ni mpampali yila kwikombe lilyo litalimiwepo nalumo, pamo litabyaliwepo nalumo, sona lilyo lili na kasoko kako kakwenda amizi. Kulakula bayipyole impampali yila isingo.

⁵ Abaputi, babo bana aba Levi bope babuke kulakula, pakuti u Mwene u Chala abasalite ukuti babombaye imbombo nukubasaya abantu mwitabwa ilya Mwene, sona nukuti balongaye inongwa izyakuvulazannya, ni zyakughoghana.

⁶ Po abasongo bosi aba mukaya kako kapalamanite nkani na papo pakaghiwa umuvimba, basukusule munyobe pa mpampali yiyo bakayipyola isingo mwikombe,

⁷ nukuti, te sweswe tukamughogha umuntu yunuyu, sona tutamwenizye nu muntu yuyo akabomba zinizi.

⁸ Wee Mwene, pokela ichakwiyipa ichakupepesezya imbibi izya bantu bako aba Izilayeli babo ukabapoka. Utuhobokele ukuti inongwa iyakughoghiwa ukwa muntu umusita nongwa yibanje pamitu iya bantu bako.

⁹ Po bunubu mukwiza pakwefyamo inongwa iyakughoghiwa ukwa muntu umusita nongwa pakasi papinyu, pakuti amwe mwabomba zizyo ngolosu pamaso pa Mwene.

Nizya bakolo abakulemiwa kubwite

¹⁰ Zingabombiwa ukuti mwabuka kubwite pakulwa na balwani binyu, sona nukuti u Mwene u Chala winyu ababika abalwani binyu munyobe zyinyu nukubalema abakayidi.

¹¹ Zingabombiwa ukuti pakasi pabantu babo babalemite wamwennyapo umukolo umwiza, yuyo wamughana nkani, angaba muchi wako.

¹² Bwelagha nawe kunyumba yako nukumumwa isisi zyache, sona umudumule izula zyache.

¹³ Avule amenda ghache ghagho akavwala pakabalilo kako ukamulemela. Po ikale munyumba yako, sona amulile uwise nu nyina umwezi ghosi. Pisinda pache angaba muchi wako.

¹⁴ Nanti utakumulonda, umuleke abukaye. Pakuti ukamulema bulo pamaka pakughona nawe sona utangamusenda pakuba muzya wako nukumughulizya.

Ichilingo icha mwana umulumendo ukatote

¹⁵ Buli nanti umuntu ali na bachi babili, sona nanti amughanite nkani weka ukumuchila uyunji. Nanti bosi babili bamupapila abana abalumendo, loli nanti umwana ukatote uwa muchi wache yuyo atamughanite,

¹⁶ bo akwinong'ona nizya kubagabila abana bache ichuma chache, atakamupanje ichuma ukatote wache yuyo akapapa nu muchi wache yuyo amughanite nkani, ukumuchila ukatote wache yuyo akapapa nu muchi wache yuyo atamughanite.

¹⁷ Amupe umwana wache ukatote pabukulupo, napapo mwana yuyo unyina wache uwakwanda atamughanite nkani. Umuntu abaghiye pakumwitika umwana wache uwakwanda nukumupa ichigaba chicho abaghiye pakupokela ukuyana ni nyiho.

Nizya mwana yuyo atakwivwila

¹⁸ Buli nanti umuntu ali nu mwana yuyo ali nu moyo umukafu nkani nu wamadinko, sona atakumwivwila uwise nu nyina napapo bakumufunda.

¹⁹ Bunubu abapapi bache bamuleme nukubuka nawe ku basongo aba mukaya kala pamulyango uwa kaya.

²⁰ Abapapi bache bababuzye abasongo bala ukuti, “Umwana witu uyu ali nu moyo umukafu nkani, sona wamadinko. Atakutwivwila nalumo, umwakuti mupafu, sona we ching'wela.”

²¹ Po abanavuli bosi aba mukaya mula bamughoghe na mabwe. Bunubu mukwiza pakwefya ububibi pakasi papinyu. Aba Izilayeli bosi bakwiza pakwivwa zinizi nukuba nubogha.

Amalamulo aghakulekanalekana

²² Nanti umuntu aghoghiwa pachifukwa ichakuti aghiwa ninongwa, sona nanti umuvimba wache ghupayikiwe pikwi,

²³ umuvimba ghula ghutakaghone pikwi lila pabusiku. Mwenelezye ukuti mwaghusyila pisiku lilalila, pakuti umuntu wesi yuyo apayikiwe pikwi, aghuniwe nu Chala. Mutakachinyazyanje ichisu chicho u Mwene u Chala winyu akubapa ukuti chibanje mpyana yinyu.