Ukukumbusya Amalamulo 20 - IBAYIBOLO 2024

Nizya bwite

¹ Nanti mukubuka pakulwa ubwite na balwani binyu, nukwennya ukuti abalwani binyu bali ni falasi ni ngolo izya bwite inyinji, sona abasilikali babo binji nkani ukubachila, mutakabanyilaye. Pakuti u Mwene u Chala winyu, yuyo akabefyamo mu Ijiputi, akwiza pakuba namwe.

² Bo muchili pakwanda ubwite, umuputi izaye pantazi nukunena na basilikali ukuti,

³ “Mwee ba Izilayeli, ivwa kuno! Ilelo mukubuka pakulwa ubwite na balwani binyu. Mutakawe amaka pamo ukubanyila. Mutakabe nubogha pamo ukutetema, bo mwabennya abalwani binyu.

⁴ Pakuti u Mwene u Chala winyu yuyo akubuka namwe, akwiza pakubalwila ubwite nukubapa ubupoti.”

⁵ Po abasongo bala babalalusye abasilikali ukuti, “Nkimba alipo yumo pano yuyo azenga bulo inyumba, loli atayipaghuliye kwa Chala? Nanti alipo abwelaye, lumo angaghoghiwa kubwite, po umuntu uyunji bulo akwiza pakuyipaghula inyumba yache.

⁶ Nkimba alipo yumo pano yuyo abyala bulo amampesya, loli atanditepo pakuyaba amampesya ghalaghala? Nanti alipo abwelaye, lumo angaghoghiwa kubwite, po umuntu uyunji bulo akwiza pakwilagha nu vinyo.

⁷ Nkimba alipo yumo pano yuyo azingiliye bulo umukolo loli achili pakumusenda? Nanti alipo abwelaye lumo angaghoghiwa kubwite, po umuntu uyunji bulo akwiza pakumusenda umukolo yula.”

⁸ Abasongo bala babalalusye abasilikali ukuti, “Nkimba alipo yumo pano yuyo mogha? Nanti alipo abwelaye lumo angabawisya amaka abawamwabo.”

⁹ Nanti abasongo bamala pakunena na basilikali bala, basale abalongozi ukuti babalongozye abasilikali bala.

¹⁰ Nanti mukubuka pakulwa ubwite nakaya, ichakwanda mubape abantu bala ulusako ulwakubikila pasi ivilwilo vyabo.

¹¹ Nanti bakwitika nukubighulila imilyango iya kaya kabo, po mubaleme abantu bosi ukuti babanje bazya binyu umwakuti bababombelaye imbombo izyakufyenga bulo.

¹² Loli nanti bakukana pakubika pasi ivilwilo vyabo, nukulonda pakulwa namwe ubwite, abasilikali binyu bakazyungulile akaya kabo kala.

¹³ Bo u Mwene u Chala winyu akabika akaya kabo kala munyobe zyinyu, mubaghoghe abanavuli bosi aba mulamula.

¹⁴ Loli abakolo na bana bo mubaleme bulo, poka ni vitekwa vyabo, sona musende ivintu vyosi mukaya vivyo mwavifyula pakuba vyinyu. Ivintu vyosi ivya balwani binyu vivyo mwavifyula mungavibombezya imbombo, pakuti u Mwene u Chala winyu abapiye.

¹⁵ Umu momumo mutubombelaye utwaya tosi utukulu nkani tuto tuli pabutali namwe, tuto tute twaya twa inko zizyo zili papipi namwe.

¹⁶ Loli nanti mwatufyula utwaya tuto u Mwene u Chala winyu akubapa pakuba mpyana yinyu, mumughoghe umuntu wesi uwakwikala mulamula.

¹⁷ Mubanangannye abantu bosi kokuti aba Hiti naba Amoli naba Kenani naba Pelezi naba Hivi sona naba Yebusi ukuyana namumo u Mwene u Chala winyu akabalamulila.

¹⁸ Mubaghoghe bosi lumo bangabamanyisya ukuti mubombe ivintu ivyamwiko pakubiputa abachala babo. Po bunubu mukwiza pakumunangila u Mwene u Chala winyu.

¹⁹ Bo mukukazyungulila akaya akakulu nkani akabalilo akatali, mutakadumulaye amakwi agha vikomwa pachifukwa ichakuti mungalyako ivikomwa vyache. Mutakadumulaye amakwi pakuti abantu te makwi.

²⁰ Loli mungadumula amakwi ghagho te gha vikomwa nukughabombezya pakuzengela amakwelelo aghakukwelela ulupaso mupaka mukapote akaya akakulu nkani kako mukulwa nako ubwite.