Ukukumbusya Amalamulo 2 - IBAYIBOLO 2024

Amaka aghakwendakwenda munkolongo

¹ Po tukapaghuka nukubuka munkolongo pakwendela izila iyakubukila ku Nyanja Inchesamu ngati mumo u Mwene akandamulila, nukuzyungulila muchisu icha mumaghamba icha Seyili amasiku aminji nkani.

² Po u Mwene akambuzya akati,

³ “Mwendendekagha nkani muchisu icha mumaghamba ichi akabalilo akatali nkani, po losi ulu bukagha kumitu.

⁴ Ubape abantu amalamulo aghakuti: Amwe muli papipi pakuchidumusannya ichisu icha bakamu binyu abaluko ulwa Esabu, babo bakwikala mu Seyili. Abantu banaba bakwiza pakubanyila nkani, loli amwe muchebaye nkani.

⁵ Amwe mutakalwanje nabo ubwite, pachifukwa ntakwiza pakubapa nachimochimo ichigaba icha chisu chabo, napapo imita lyoka, pakuti nabapa abaluko ulwa Esabu ichisu icha mumaghamba icha Seyili ukuti chibanje chabo.

⁶ Amwe mungaghula ichakulya chabo na mizi ghabo.”

⁷ U Mwene u Chala winyu abasaya amwe pambombo zyosi zizyo mwabomba. Abasungilila akiza pabulendo bwinyu munkolongo inkulu yila. U Mwene u Chala winyu abanga namwe amaka 40 ghosi ghanagha, sona mutakasobelwapo ichintu nachimochimo.

⁸ Po tukendelela nu bulendo bwitu nukudumusannya muchisu icha bakamu bitu abaluko ulwa Esabu, babo bakikalagha mu Seyili. Tukaghuleka umusebo uwaku Alaba, ghugho ghukaba umusebo waku Elati nu Eziyoni Gebeli, nukwenda mulubazu ulwa musebo uwa munkolongo iya Mowabu.

⁹ U Mwene akambuzya akati, “Mutakabatamyanje aba Mowabu, pamo ukulwa nabo ubwite, pakuti ntakwiza pakubapa nachimochimo ichigaba icha chisu chabo. Ane nabapa abaluko ulwa Loti akaya akakulu nkani aka Ali ukuti kabanje kabo.”

¹⁰ Uluko lwaba Emimu lukikalagha mulamula. Abantu banaba bakaba bamaka, sona bakaba binji nkani, umwakuti bakaba batalibatali bene ngati bo ba Anaki.

¹¹ Aba Anaki banaba poka naba Emimu bakitiziwanga ukuti ba Lefayimu. Loli aba Mowabu bakabitizyanga ukuti bo ba Emimu.

¹² Pakwanda aba Holi bo babo bakikalagha ku Seyili, loli abaluko ulwa Esabu bakabachimbizyamo nukuluzimizya uluko lwabo losi. Po abaluko ulwa Esabu bakikala mulamula ukuyana namumo aba Izilayeli bakabombela muchisu chicho u Mwene akabapa ukuti chibanje chabo.

¹³ U Mwene akati, “Losi ulu nyamuka nukuloboka ikombe ilya Zeledi.” Po tukaloboka ikombe lila.

¹⁴ Amaka 38 ghakaba ukuti ghachilapo ukwandila pakabalilo kako tukepelako ku Kadeshi Balineya mupaka papo tukalobokela ikombe ilya Zeledi. Pakabalilo kalakala kukaba ukuti inkulilo iya banavuli bosi babo bakalwanga ubwite yikazimila yosi ukuyana namumo u Mwene akalapila.

¹⁵ U Mwene akabanangannya bosi mupaka akabazimizya bosi muvisakasa.

¹⁶ Bo abanavuli bosi babo bakalwanga ubwite bakafwa,

¹⁷ u Mwene akambuzya akati,

¹⁸ “Ilelo mukudumusannya muchigaba icha ba Mowabu pakwendela izila iya ku Ali.

¹⁹ Bo mwapalamila ni chisu icha ba Amoni, mutakabatamyanje, pamo ukulwa nabo ubwite, pakuti ntakwiza pakubapa ichisu icha ba Mowabu ukuti chibanje chinyu. Ane nabapa abaluko ulwa Loti ichisu chilachila ukuti chibanje chabo.”

²⁰ Ichisu chilachila chope chikitiziwanga ukuti chisu icha aba Lefayimu, babo bope bakikalagha mulamula. Loli aba Amoni bakabitizya ukuti bo ba Zamuzami.

²¹ Abantu banaba bakaba bamaka, sona bakaba binji nkani, umwakuti bakaba batalibatali bene ngati bo ba Anaki. Pope bulo u Mwene akabanangannya, sona aba Amoni bakachifyula ichisu chabo nukwikala mulamula.

²² Umwakuyana bulo u Mwene akabanangannya aba Holi nukubachimbizya abaluko ulwa Esabu babo bakikalagha mu Seyili. Abaluko ulwa Esabu bakwikala mulamula mupaka nilelo bulo.

²³ Ichintu ngati chinichi chikabombiwa pakabalilo kako aba Kafitoli aba mu Kileti babo bakachifyula ichisu chabo nukubanangannya aba Avimu, babo bakikalagha mutwaya tosi utukulu utupalamani utwa Gaza.

²⁴ U Mwene akatubuzya sona akati, “Losi ulu nyamuka nukuloboka ulusoko ulwa Alinoni. Ane namubika munyobe zyinyu u Sihoni umu Amoli, u mwene uwa Heshiboni poka ni chisu chache. Lwanga nawe ubwite nukuchifyula ichisu chache.

²⁵ Ukwanda ilelo mupaka muntazi, nkwiza pakubapelela ubogha umwakuti abantu aba inko zyosi izya muchisu ichapasi babanyilaye. Nanti umuntu wesi ivwa bulo nizya mbili yinyu, akwiza pakutetema nubogha.”

Aba Izilayeli bakumupota u mwene u Sihoni

²⁶ Bo tuchili tuli munkolongo iya Kedemoti nkamutumila intumi u mwene u Sihoni uwamu Heshiboni na mazyu aghamutende aghakuti,

²⁷ “Utwitikizye ukuti tudumusannyemo muchisu chako. Tukwiza pakwenda bulo mumusebo umukulu.

²⁸ Tukwiza pakughula ichakulya na mizi ghinyu. Chicho tukulonda ko kudumusannya bulo muchisu chinyu

²⁹ mupaka tuloboke ulusoko ulwa Yolodani nukwinjila muchisu, chicho u Mwene u Chala witu akutupa ukuyana namumo bakabombela abaluko ulwa Esabu, babo bakwikala mu Seyili, sona naba Mowabu babo bakikala mu Ali pakutwitikizya ukudumusannya muchisu chabo.”

³⁰ Loli u Sihoni atakatwitikizya ukuti tudumusannye muchisu chache. U Mwene u Chala winyu akaghupela umoyo wache pakuba mukafu, umwakuti amubike munyobe zyinyu ngati mumo zibeleye pakabalilo aka.

³¹ Po u Mwene akambuzya akati, “Ennya, nandite kale pakumubika u Sihoni poka ni chisu chache munyobe zyako. Losi ulu anda pakuchifyula ichisu chache nukwikala mulamula.”

³² U Sihoni akababungannya abantu bache pakulwa naswe ubwite mukaya akakulu aka Yahazi.

³³ Loli u Mwene u Chala witu akamubika munyobe zyitu, po tukamughogha yuyo, na bana bache, poka na bantu bache bosi.

³⁴ Pakabalilo kalakala tukatufyula utwaya twache utukulu nukutunangannya tosi. Tukabaghogha abanavuli na bakolo, sona na bana. Tutakamulekapo nayumoyumo umuntu uwakupona.

³⁵ Loli tukavisenda ivitekwa poka ni vintu vyosi vivyo tukavifyula mutwaya tulatula.

³⁶ U Mwene u Chala witu akatwitikizya ukuti tufyule utwaya tosi utukulu ukwandila ku Aloyeli, mulubazu ulwa ulusoko ulwa Alinoni, mupaka ku Giliyadi. Katakabapo nakamokamo akaya akakulu aka malinga aghamaka nkani kako kakatupota.

³⁷ Loli ukuyana namumo u Mwene, u Chala witu akatulamulila, tutakabuka papipi ni chisu icha ba Amoni, mulubazu ulwa ulusoko ulwa Yaboki, pamo utwaya utukulu utwa mumaghamba.