Ukukumbusya Amalamulo 19 - IBAYIBOLO 2024

Utwaya utukulu nkani utwakuponelamo

¹ Bo u Mwene u Chala winyu akuzinangannya inko sona nukuzichimbizyamo muchisu chicho akubapa nukwikala mutwaya twabo na munyumba zyabo,

² mwipaghulile utwaya tutatu utukulu nkani utwakuponelamo muchisu chicho u Mwene u Chala winyu akubapa ukuti mwikalayemo.

³ Muchigabe patatu ichisu chicho u Mwene u Chala winyu akubapa ukuti ichigaba chosi chibanje nakaya akakulu akakuponelamo, sona mulimemo imisebo, umwakuti umuntu wesi yuyo amughogha uwamwabo angaponelamo.

⁴ Ulu lo lulaghilo ulwakunena nizya muntu yuyo amughogha uwamwabo, nukuchimbilila mulamula ukuti apone. Umuntu wesi yuyo amughogha uwamwabo umwakusita kumanya angachimbilila mulamula nukupona.

⁵ Umwakufwanikizya bulo, umuntu nu mupalamani wache abuka mumusitu pakudumula amakwi, po bo ali pakudumula, intemo yakuka nukumughogha uwamwabo yula. Umughoghi yula angachimbilila mukaya koka ukuti apone.

⁶ Loli nanti atakuchimbila, kokuti umukamu uwa muntu yuyo akaghoghiwa akulonda pakutanizya angamuchimbizya umughoghi yula nukumwagha nanti akaya akakuponelamo kala kali kubutali nkani, po angamulema nukumughogha umusita nongwa nayimo, napapo atabaghiye pakufwa pachifukwa ichakuti akamughogha umupalamani wache umwakusita lubengo.

⁷ Ichi cho chifukwa nkubalamula ukuti mwipaghulile utwaya tumo utukulu nkani tutatu.

⁸ U Mwene u Chala winyu akachikuzya ichisu chinyu, ukuyana namumo akabalayizizya abanyenya binyu, nukubapa ichisu chosi chicho akabalayizya.

⁹ Nanti mukughakonka amalamulo ghosi ghagho nkubabuzya ilelo, mumughanaye u Mwene u Chala winyu na moyo ghinyu ghosi nukubomba zizyo akubalamula. Po mwipaghulile utwaya utunji utukulu nkani tutatu.

¹⁰ Bombagha bunubu ukuti abantu abasita nongwa baleke pakufwa muchisu chinyu, chicho u Mwene u Chala winyu akubapa ukuti chibanje mpyana yinyu, sona nukuti mutakabe ninongwa iya bughoghi.

¹¹ Loli zingabombiwa ukuti umuntu amubengite umupalamani wache, sona akumuvwamilila nukumughogha madinko bulo, polelo akuchimbilila mukaya akakuponelamo.

¹² Po abasongo aba mukaya kache bamwitizye ukuti anyokele mukaya kache, nukumubika munyobe izya mukamu uwa muntu yuyo akaghoghiwa yula, yuyo akulonda pakutanizya ukuti amughoghe.

¹³ Mutakamupelelaye ichisa. Mumwefyemo mu Izilayeli umughoghi yuyo akumughogha umuntu umusita nongwa, umwakuti ivintu vyosi vibendelaye akiza.

Nizya mpaka

¹⁴ Mutakandulaye impaka izya bapalamani binyu zizyo abanyenya binyu bakazigaba muchisu chicho u Mwene u Chala winyu akubapa ukuti chibanje mpyana yinyu.

Nizya bakaboni

¹⁵ Mutakadumulaye ukuti umuntu ananga nanti pali bulo ukaboni weka, loli nanti pali abakaboni babili pamo batatu.

¹⁶ Nanti umuntu yumo akumutamantila uwamwabo ukuti ananga,

¹⁷ po bosi babili bala bizaghe pamaso pa Mwene, bimaye pamaso pa baputi na balongi, babo bali pambombo pakabalilo kalakala.

¹⁸ Abalongi bala babuzikizye akiza inongwa yila, sona nanti bazyaghannya ukuti ukaboni yula amutamantiye bulo uwamwabo,

¹⁹ po bamubombele wepe ichintu chicho alondagha ukuti amubombele uwamwabo yula. Bunubu mukwiza pakwefya ububibi pakasi papinyu.

²⁰ Umuntu wesi yuyo akwiza pakwivwa zinizi, akwiza pakuba nubogha, po nayumo atangachela pakubomba sona bunubu.

²¹ Mutakamupelelaye ichisa. Ulufundo lwache lubanje lwakuti ubumi bulipile ubumi, ilyiso lilipile ilyiso, ilyino lilipile ilyino, inyobe yilipile inyobe, sona ulwayo lulipile ulyayo.