Ukukumbusya Amalamulo 18 - IBAYIBOLO 2024

Ichigaba icha baputi

¹ Aba Levi, babo bo baputi, kokuti uluko losi lwaba Levi batakapokelaye ichigaba mu Izilayeli ukuti chibanje mpyana yabo. Loli balyanje ivyakwiyipa ivyakocha vivyo abantu bakuvibika kwa Mwene, pakuti yo mpyana yabo.

² Batakabanje ni mpyana pakasi pa bakamu babo. Impyana yabo we Mwene, ukuyana namumo akabalayizizya.

³ Ichi cho chigaba icha baputi icha vyakwiyipa ivya ng'ombe pamo ing'ozi vivyo abantu bakubika: Ichipunko ni njegho sona nu lufu.

⁴ Abaputi bapokelaye sona ivikomwa ivyakwanda pakutona ivya ngano nivya vinyo umupya na mafuta agha misyunguti sona na meya aghakwanda agha ng'ozi.

⁵ Pakuti u Mwene u Chala winyu akasala uluko ulwa Levi na baluko lwabo pakasi pa inko zyinyu zyosi ukuti bamubombelaye u Mwene bwila na bwila.

⁶ Umu Levi wesi yuyo akwikala mukaya kosi akakulu aka mu Izilayeli, nanti akulonda angiza kubuzilo bubo u Mwene abusalite.

⁷ Po angamubombela imbombo iya buputi u Mwene u Chala wache ukuyana namumo bakubombela aba Levi abanji, babo bakubomba pamaso pa Mwene.

⁸ Apokelaye ichakulya umwakuyana bulo na baputi abanji, napapo apokela indalama izyakufuma pakatundu uwa bamunyumba yache.

Inyiho imbibi izya bantu abakuzi

⁹ Bo mwinjila muchisu chicho u Mwene u Chala winyu akubapa, mutakeghelelaye inkalo inyazu izya bantu babo bakwikala mulamula.

¹⁰ Patakabepo nayumoyumo umuntu pakasi papinyu uwakumocha pamoto umwana wache umulumendo pamo umulindu ukuti chibanje chakwiyipa. Patakabepo nayumoyumo umuntu uwakulaghula pamo uwamayele nu wakunena ni mizimu iya bafwe pamo umulozi

¹¹ pamo abapela mukosi pamo abakunenezannya ni mizimu pamo abavimbuza pamo uwakubuzikizya ku mizimu iya bafwe.

¹² U Mwene amubengite umuntu wesi yuyo akubomba ivintu ivyamwiko vinivi, sona u Mwene u Chala winyu akwiza pakuzichimbizyamo inko izinji pamaso papinyu pachifukwa ichakubomba ivintu vinivi.

¹³ Amwe mubanje mwe basubiliwa umwakufikapo kwa Mwene u Chala winyu.

U Chala akubalayizya pakubatumila umulaghuzi

¹⁴ Abantu babo mukubuka pakubachimbizyamo muchisu chabo nukwikalamo, bo bantu abamayele na bakulaghula. Loli amwe, u Mwene u Chala winyu atakubitikizya ukuti mubombe bunubu.

¹⁵ Loli u Mwene u Chala winyu akwiza pakubatumila umulaghuzi ngati nene uwakufuma pakasi pabantu binyu. Po amwe mumwivwilaye.

¹⁶ Pisiku lilyo mukabungana pighamba ilya Sinayi mukalaba ukuti, “Tutakulonda pakwivwa sona izyu ilya Mwene u Chala witu pamo ukwennya sona umoto umukulu ghunughu lumo tungafwa.”

¹⁷ Po u Mwene akambuzya akati, “Zyosi zizyo abantu bakunena nyiza bulo.

¹⁸ Nkwiza pakubatumila umulaghuzi uwakuyana nawe uwakufuma pakasi pabantu babo. Ane nkwiza pakumubuzya amazyu aghakuti anene, po akwiza pakubabuzya abantu zyosi zizyo nkumulamula.

¹⁹ Nanti umuntu yumo atakughivwila amazyu ghane ghagho umulaghuzi yunuyu akunenela mwitabwa lyane, ane nkwiza pakumufunda umuntu yulayula.

²⁰ Loli nanti umulaghuzi yumo akunenela mwitabwa lyane, bo ane ntamulamuyepo pamo umulaghuzi yumo akunenela mwitabwa ilya bachala abanji, aghoghiwanje.”

²¹ Lumo mungilalusya mwebene ukuti, “Nkimba tungaghamanya bulibuli ukuti amazyu agha mulaghuzi yunuyu ghate gha Mwene?”

²² Nanti zizyo umulaghuzi akunenela mwitabwa ilya Mwene zitakukwanilisiwa, kokuti amazyu ghalaghala ghate gha Mwene. Umulaghuzi yulayula anena bulo ivyache, po mutakamunyilaye.