Ukukumbusya Amalamulo 17 - IBAYIBOLO 2024

¹ Mutakabikaye ing'ombe pamo ing'ozi yiyo yili ni chilema chimo ukuti chibanje chakwiyipa kwa Mwene u Chala winyu, pakuti ichintu chinichi chamwiko nkani kwa Mwene.

² Nanti umwanavuli pamo umukolo yumo aghiwa pakasi papinyu mutwaya tuto u Mwene u Chala winyu akubapa ukuti ananga pamaso pa Mwene u Chala pakulunangannya ulufingo,

³ nukubiputa abachala abanji nukubafughamilila, pamo akwiputa izuba pamo umwezi, pamo intondwa.

⁴ Nanti mwivwa ukuti ichintu chinichi chabombiwa, po mubuzikizye akiza nkani. Nanti zyanaloli sona chisimikiziwe ukuti ichintu ichamwiko chinichi chabombiwa mu Izilayeli,

⁵ po mumusendele umwanavuli pamo umukolo yulayula kumulyango uwa kaya akakulu nkani nukumughogha na mabwe.

⁶ Loli umuntu yula aghoghiwanje nanti pali abakaboni babili pamo batatu, sona atakaghoghiwanje nanti pate abakaboni babili pamo batatu.

⁷ Abakaboni bala bo babo bande pakumusumba na mabwe, po bope abantu bosi bamusumbe na mabwe. Bunubu mukwiza pakwefya ububibi pakasi papinyu.

⁸ Lumo pangabapo inongwa zimo impalapala nkani muchisu chinyu umwakuti amwe mutangazidumula, manyi nongwa izya kughoghana, manyi zyakuvulazannya, mwize nazyo kubuzilo bubo u Mwene u Chala winyu akwiza pakubusala.

⁹ Mubukaye ku baputi, babo ba Levi, sona na ku mulongi yuyo ali pambombo pakabalilo kalakala, po badumule inongwa yilayila.

¹⁰ Amwe mubombaye bulo namumo badumulila inongwa yilayila pabuzilo bubo u Mwene akwiza pakubusala. Mwenelezye nkani ukuti mukukonka zyosi zizyo bakubabuzya.

¹¹ Mubombaye bulo ukuyana ni ndaghilo zizyo bakubamanyisya, sona namumo badumulila. Mutakapaghukilaye kundilo pamo kumongo, loli konka bulo zizyo akubabuzya.

¹² Umuntu wesi yuyo akukana ubudumulilo ubwa mulongi pamo umuputi, yuyo akubomba imbombo pamaso pa Mwene, u Chala winyu, aghoghiwanje. Bunubu amwe mukwiza pakwefyamo ububibi mu Izilayeli.

¹³ Umuntu wesi yuyo akwiza pakwivwa zinizi, akwiza pakuba nubogha, po atangachela sona pakubomba bunubu.

Indaghilo zizyo zikunena nizya mwene

¹⁴ Bo mwinjila nukwikalana muchisu chicho u Mwene u Chala winyu akubapa, sona nanti mukuti, “Chikulondiwa ukuti tubanje nu mwene ukuyana namumo inko zyosi zizyo zituzyunguliye zibeleye,”

¹⁵ mwenelezye ukuti abanje we mwene yuyo u Mwene u Chala winyu amusalite. Abanje muntu uwa luko lwinyu, sona mutakamusalaye umuyeni yuyo ate mu Izilayeli uwamwinyu pakuba we mwene winyu.

¹⁶ U mwene atakabanje ni falasi izya bwite inyinji nkani, sona atakabatumaye abantu ku Ijiputi pakughula ifalasi zimo, pakuti u Mwene akababuzya akati, “Mutakanyokelayeko sona.”

¹⁷ Umwene atakabanje na bakolo abinji lumo angapaghukako kwa Mwene. Atakilundikilaye mwene ubukabi ubwa siliva nu golide.

¹⁸ Bo imikiwa pabumwene bwache, asimbe mwibuku ilyache ni lyache amalamulo ghanagha, ghagho ghali mwibuku ilya malamulo, lilyo lili munyobe izya baputi, babo bo ba Levi.

¹⁹ Alisungaye ibuku linili, sona alibelengaye amasiku ghosi agha bumi bwache, umwakuti amanyile pakumunyila u Mwene u Chala wache pakughakonka amalamulo ni ndaghilo zinizi.

²⁰ Chinichi chikwiza pakumwavwa ukuti atakipimaye mwene pakuba wapamwanya ukubachila abawamwabo nukupaghukila kundilo pamo kumongo. Po yuyo na baluko lwache bakwiza pakulaghila amaka aminji nkani mu Izilayeli.