Ukukumbusya Amalamulo 16 - IBAYIBOLO 2024

Ulusekelo ulwa Pasa

¹ Mumuchindikaye u Mwene u Chala winyu pakuba nu Lusekelo ulwa Pasa mumwezi uwa Abibu, pakuti ghukaba mwezi uwa Abibu ghugho akabefyamo mu Ijiputi pabusiku.

² Bukagha kubuzilo bubo u Mwene akwiza pakubusala ukuti bubanje buzilo bwache ubwakwikalamo nukubika zimo ing'ozi pamo ing'ombe pakuba Lusekelo ulwa Pasa ulwa Mwene u Chala winyu.

³ Mutakayilyelaye poka ni chibama icha chilungo, loli mulyanje ichibama chicho chite ni chilungo amasiku seveni, chicho chibama icha mayimba, pachifukwa ichakuti mukepamo mu Ijiputi umwalubilolubilo, umwakuti mubumi bwinyu bosi mukakumbukaye akabalilo kako mukepelaghamo mu Ijiputi.

⁴ Pa masiku seveni atakabepo nayumoyumo umuntu uwakwaghiwa ni chilungo munyumba yache muchisu chinyu chosi. Inyama yiyo mukwiyipa pachamabwila pisiku ilyakwanda mutakayisungaye mupaka indabi yache.

⁵ Mutakabikaye ichakwiyipa icha Pasa pabuzilo ubunji muchisu chicho u Mwene u Chala winyu akubapa.

⁶ Loli pabuzilo bwene bubo u Mwene u Chala winyu akwiza pakubusala pakuba buzilo bwache ubwakwikalamo. Kulakula ko kuko mubikaye ichakwiyipa icha Pasa pachamabwila, bo izuba likwinjila, pisiku lilyo mukusekela akabalilo kako mukepelaghamo mu Ijiputi.

⁷ Muyipiyaghe inyama yila nukuyilyela pabuzilo bubo u Mwene u Chala winyu akwiza pakubusala. Po pandabindabi munyokelaye kuvisakasa vyinyu.

⁸ Mulyanje ichibama chicho chite ni chilungo amasiku sikisi, sona pisiku ilyaseveni mubanje nulukomano ulwa chiputo icha Mwene u Chala winyu. Po mutakabombaye nayimoyimo imbombo pisiku lilalila.

Ulusekelo ulwa Nyinulo

⁹ Mubelenge abasabata seveni ukwandila pakabalilo kako mukwandila pakwinula ingano.

¹⁰ Po mubanje nu Lusekelo ulwa Nyinulo pakumwiputa u Mwene u Chala winyu. Mumupanje ivyakwiyipa ivya bwighane ukuyana namumo u Mwene u Chala winyu abasayiye.

¹¹ Po amwe poka na bana binyu abalumendo na balindu na bambombo binyu abalumendo na balindu naba Levi na bayeni na balanda sona na bakolo abafwilwe babo bakwikala mutwaya twinyu musekelaye pamaso pa Mwene u Chala winyu pabuzilo bwache ubwakwikalamo bubo akwiza pakubusala.

¹² Mwenelezye ukuti mukuzikonka indaghilo zinizi sona mutakaluvyanje ukuti namwe bulo mukaba mwe bazya mu Ijiputi.

Ulusekelo lwa Visakasa

¹³ Bo mwamala pakwinula ingano yinyu, sona bo mwamala pakukanya amampesya ghinyu mubanje nu Lusekelo ulwa Visakasa amasiku seveni.

¹⁴ Amwe poka na bana binyu abalumendo na balindu na bambombo binyu abalumendo na balindu naba Levi na bayeni na balanda sona na bakolo abafwilwe babo bakwikala mutwaya twinyu musekelaye ulusekelo lulalula.

¹⁵ Mubanje nu lusekelo ulwa Mwene u Chala winyu amasiku seveni pabuzilo bubo u Mwene akwiza pakubusala. Pakuti u Mwene u Chala winyu akwiza pakuyisaya inyinulo yinyu, sona ni mbombo zyinyu zyosi, po mukwiza pakuhoboka nkani.

¹⁶ Abanavuli bosi abaluko lwinyu bizaghe katatu pamwaka pamaso pa Mwene u Chala winyu pabuzilo bubo akwiza pakubusala, bo mukuba nu Lusekelo ulwa Chibama chicho chite ni chilungo nu Lusekelo ulwa Nyinulo, sona nu Lusekelo ulwa Visakasa. Patakabepo nayumoyumo umwanavuli uwakwiza nyobe zyene pamaso pa Mwene.

¹⁷ Bo bakwiza pamaso pa Mwene, umuntu wesi izaye ni chabupi ukuyana namumo u Mwene u Chala winyu abasayiye.

Ukulongela mubwanaloli

¹⁸ Muluko losi musalemo abalongi na balongozi mutwaya tosi tuto u Mwene u Chala winyu akubapa. Abantu banaba bakwiza pakulongela mubwanaloli inongwa izya bantu.

¹⁹ Mutakabunyongannye ubugholosu pamo ukulonga inongwa pakwennya icheni icha muntu. Mutakapokelaye amabeko pakuti amabeko ghakubighalila amaso abantu abamahala, sona ghakunyongannya ubwanaloli.

²⁰ Mukonkaye bulo ubwanaloli bwene, umwakuti mupokele nukwikala muchisu chicho u Mwene u Chala winyu akubapa.

²¹ Mutakasimikaye amakwi aghakwiputilapo u Ashela, bo mukumuzengela ichighemo u Mwene u Chala winyu.

²² Mutakimikaye amabwe aghakwiputilapo abachala abanji, pakuti u Mwene u Chala winyu avibengite nkani vinivi.