Ukukumbusya Amalamulo 15 - IBAYIBOLO 2024

Umwaka uwaseveni

¹ Kubumalilo ubwa mwaka ghosi uwaseveni, mubahobokelaye bosi babo bali ni nkongole namwe.

² Umu momumo mubombelaye: Umuntu wesi yuyo akamukopezya indalama umu Izilayeli uwamwabo, azimye inkongole zila. Atakamfyengaye umu Izilayeli uwamwabo ukuti amunyosezye inkongole, pakuti akabalilo kakwana akakuti u Mwene azimye inkongole.

³ Mungamfyenga umuyeni ukuti anyosye inkongole, loli muzimye inkongole zyosi zizyo mukabakopezya abamwinyu.

⁴ Patakabepo nayumoyumo umupina pakasi papinyu, pakuti u Mwene u Chala winyu akwiza pakubasaya nkani muchisu chicho akubapa ukuti chibanje mpyana yinyu,

⁵ nanti bulo mukumwivwila u Mwene u Chala winyu, sona nanti mukughakonka amalamulo ghache ghagho nkubapa ilelo.

⁶ U Mwene u Chala winyu akwiza pakubasaya ukuyana namumo akabalayizizya, umwakuti mukwiza pakuzikopezya inko izinji, loli amwe mutakwiza pakukopako nalumolumo. Amwe mukwiza pakuzilaghila inko izinji, loli nalumolumo uluko lulo lukwiza pakubalaghila.

⁷ Loli nanti alimo yumo umupina mutwaya twinyu muchisu chicho u Mwene u Chala winyu akubapa, mutakabanje na moyo amakafu pamo kukana pakumwavwa umu Izilayeli uwamwinyu.

⁸ Loli mubanje mwe bachisa nukumukopezya ukuyana nukusobelwa kwache.

⁹ Muchebaye nkani ukuti mutakabe ni nyinong'ono imbibi mumoyo ghinyu nukuti, “Umwaka uwaseveni, ghugho mwaka uwakuzimya inkongole ghuli papipi,” umwakuti mutakamupelelaye ichisa uwamwinyu umupotwe pakusita ukumupa ichintu nachimochimo. Uwamwinyu yula akwiza pakumulilila u Mwene, po inongwa yikwiza pakuba pamitu yinyu.

¹⁰ Mumupanje mubwabuke sona umwakusita nkwini, po u Mwene u Chala winyu akwiza pakubasaya amwe muvyosi vivyo mukubomba.

¹¹ Akabalilo kosi kukwiza pakuba aba Izilayeli bamo babo bapina, sona bapotwe muchisu chinyu, po ane nkubalamula ukuti mubapelele ichisa abantu banaba.

Namumo mungikalila na bazya

¹² Nanti aba Izilayeli abamwinyu manyi banavuli, manyi bakolo bakwighulizya bene kukwako pakuba bazya ukuti babanje bazya binyu, mubasatulaye babo bababombela amaka sikisi nukubabuzya ukuti babukaye mumwaka uwaseveni.

¹³ Bo mukubasatula, batakabwelaye nyobe zyene.

¹⁴ Mubapanje bulo mubwabuke vimo ivintu vivyo u Mwene u Chala winyu abasayite navyo ngati ivi: Ing'ozi ni ngano sona nu vinyo.

¹⁵ Mukumbukaye ukuti namwe bulo mukaba mwe bazya mu Ijiputi, sona u Mwene u Chala winyu akabapoka. Ichi cho chifukwa ilelo nkubapa ilamulo linili.

¹⁶ Loli nanti umuzya yula akukubuzya akuti, “Ane ntakulonda pakubwela,” pachifukwa ichakuti akughanite awe na bamunyumba yako, sona nanti akwikala nawe akiza nkani,

¹⁷ Kulakula ize nawe palwiyi pamo mulubazu ulwa mulyango nukumudobola ikutu lyache ni chakudobolela mupaka chinjile mulwiyi. Po akwiza pakuba muzya wache mubumi bwache bosi. Umubombele bunubu uwambombo wako umulindu.

¹⁸ Chitakabanje ngati po chintu chipala bo ukumusatula umuzya wako yula, pachifukwa ichakuti amaka sikisi, ghagho akakubombela ghakuchila kabili imbombo iya waganyu. Po u Mwene u Chala wako akwiza pakukusaya muvyosi vivyo ukubomba.

Utwana utwanavuli utwakwanda pakupapiwa utwa vitekwa

¹⁹ Mumupaghulile u Mwene u Chala winyu utwana tosi utwanavuli utwakwanda pakupapiwa utwa ng'ombe nu twa ng'ozi. Mutakatubombezyanje imbombo utwana utwa ng'ombe tunutu, sona mutakatumwanje ameya utwana utwa ng'ozi tunutu.

²⁰ Umwaka nu mwaka, amwe na bamunyumba zyinyu mutulyelaye pamaso pa Mwene u Chala winyu pabuzilo ubwakwiputilapo bubo akwiza pakubusala.

²¹ Loli nanti ichitekwa chila chilemaye pamo chifwamaso, mutakiyipanje kwa Mwene u Chala winyu.

²² Amwe muyilyele mutwaya twinyu. Mwebosi mungalya, manyi we muswepu, manyi we munyazu ukuyana namumo mungalyela inyama iya swela pamo iya mbabala.

²³ Mutakalyanje ibanda, loli mulikupulilaye pasi ngati mizi.