Ukukumbusya Amalamulo 14 - IBAYIBOLO 2024

Inyiho izya mwiko pachililo

¹ Amwe mwe bantu aba Mwene u Chala winyu. Po nanti muli pachililo, mutakibolannyanje pamo ukumwa isisi,

² pakuti amwe mwe bantu abazelu aba Mwene u Chala winyu. U Mwene abasalite amwe pakasi pabantu aba inko izinji zyosi izya muchisu ichapasi ukuti mubanje bache na bache.

Ivinyamana iviswepu nivinyazu

³ Mutakalyanje nachimochimo ichintu ichinyazu.

⁴ Ivi vyo vinyamana vivyo mungalya: Ing'ombe ni ng'ozi ni mbuzi

⁵ nu mpombo ni ntandala ni mbabala nu tungwa ni mbogho sona nu swela.

⁶ Mungalya ichinyamana chosi chicho inyayo zyache zigabinkanite pabili sona chitakubukula.

⁷ Loli mutakalyanje ivinyamana vivyo vikubukula sona na vivyo inyayo zyabo zigabinkanite pabili ngati ivi: Ingamila nu kalulu, pamo upelemende. Napapo vikubukula, loli inyayo zyabo zitagabinkanite pabili. Ivi vyo vinyamana ivinyazu.

⁸ Ingulube cho chinyamana ichinyazu, napapo inyayo zyache zigabinkanite pabili, loli chitakubukula. Mutakalyanje inyama yache, pamo ukuyipalamasya bulo nanti yifuye.

⁹ Amwe mungalya iswi zyosi zizyo zili nu mupepe, sona nu tupapa.

¹⁰ Loli mutakalyanje vyosi vivyo vite nu mupepe, sona nu tupapa, pakuti vyo vinyamana ivinyazu.

¹¹ Amwe mungalya iviyuni vyosi vivyo viswepu.

¹² Loli mutakalyanje iviyuni ivi: Amakubi na mazwanga ni sisimusi

¹³ na mabimba ni njela izyakulekanalekana na bachigobe abakulekanalekana ni bututu na bampughulu ni nyangenyange na bakapula abakulekanalekana

¹⁴ nu chigobe nuluko losi

¹⁵ na masisimusi ni ntibatiba ni nkitwa ni nyangenyange nu kapula

¹⁶ na mazwanga aba mpughulu ni nombo sona na mabimbi aghakulekanalekana na mazwanga aghakulekanalekana nu chipungu ni nyangenyange na basele abakulekanalekana sona nu kasyusyu

¹⁷ ni sekwa nu mpughulu sona ni nombo

¹⁸ ni nyangenyange na basele abakulekanalekana sona nu kasyusyu.

¹⁹ Utwakubuluka tosi tuto tuli ni vipapande tunyazu po mutakalyanje vinivi.

²⁰ Loli mungalya utwakubuluka tosi tuto tuswepu.

²¹ Mutakalyanje inyama iya chinyamana chosi chicho chifuye chene. Mubape inyama yilayila abayeni babo bakwikala pakasi papinyu ukuti balyanje, pamo mungabaghulizizya abendazila. Loli amwe mwe bantu abazelu aba Mwene u Chala winyu. Mutakapiyaghe umwana uwa ng'ozi pamo uwa mbuzi mulukama ulwa nyina.

Indaghilo izya chigaba choka pavigaba teni

²² Muchipaghulaye ichigaba choka pavigaba 10 ivya mumaghunda ghinyu umwaka nu mwaka.

²³ Po bukagha kubuzilo boka ubwakwiputilapo bubo u Mwene u Chala winyu abusalite sona kulakula mulyanje ichigaba choka pavigaba 10 icha ngano ni cha vinyo ni icha mafuta agha misyunguti ni cha ng'ombe sona ni icha ng'ozi umwakuti mungamanyila pakumunyila u Mwene u Chala winyu akabalilo kosi.

²⁴ Loli nanti ubuzilo bula buli kubutali nkani, sona nanti u Mwene u Chala winyu abasaya ni nyinulo inyinji nkani umwakuti amwe mungapotwa pakunyamula ichigaba choka pavigaba vyinyu teni, pachifukwa ichakuti ubuzilo boka ubwakwiputilapo bubo u Mwene akwiza pakubusala buli kubutali nkani,

²⁵ po mughulizye ichigaba choka pavigaba vyinyu 10 vila. Musende indalama zila mubuke nazyo kubuzilo ubwakwiputilapo bubo u Mwene u Chala winyu abusalite.

²⁶ Indalama zilazila mughulile ivintu vyosi vivyo mukulonda ngati ing'ombe ni ng'ozi nu vinyo pamo chicho umuntu angakolwa nacho. Po amwe na bamunyumba zyinyu mulyanje nukusekela palapala pamaso pa Mwene u Chala winyu.

²⁷ Mutakabaluvyanje aba Levi babo bakwikala mutwaya twinyu, pakuti bate ni chigaba pamo ichilingo ichabo ni chabo.

²⁸ Kubumalilo bosi ubwa mwaka wabutatu mwizaye ni chigaba choka pavigaba 10 icha nyinulo yinyu yosi iya mwaka ghulaghula nukuchisunga mutwaya twinyu,

²⁹ umwakuti aba Levi, babo bate ni chigaba pamo ichilingo ichabo ni chabo, sona na bayeni, na balanda, na bakolo abafwilwe, babo bakwikala mutwaya twinyu bangalya vilavila nukwikuta. Po u Mwene u Chala winyu akwiza pakubasaya muvyosi vivyo mukubomba.