Ukukumbusya Amalamulo 13 - IBAYIBOLO 2024

¹ Nanti umulaghuzi pamo unavilota iza pakasi papinyu nukunena ukuti akwiza pakupela ichika pamo ichiswigho,

² sona nanti ichilota pamo ichiswigho chila chakwanilisiwa naloli, sona nanti akuti, “Mwebaya, zagha tubiputaye abachala abanji, abachala babo amwe pamo abanyenya binyu mutabiputitepo nalumo, nukubabombela,”

³ amwe mutakabateghelezyanje. U Mwene u Chala winyu akubayela ukuti ennye nanti naloli mumughanite nu moyo winyu ghosi, sona nu muzimu winyu ghosi.

⁴ Mumukonke nukumunyila u Mwene u Chala winyu. Mughakonke amalamulo ghache nukumwivwila. Mumubombele yuyo mwene, sona mumukakatile.

⁵ Loli umulaghuzi pamo uwavilota yula aghoghiwanje pachifukwa ichakubabuzya ukuti mumusambukile u Mwene u Chala winyu, yuyo akabefyamo mu Ijiputi nukubapoka muchisu chicho mukaba mwe bazya. Umuntu yunuyu mubibi pakuti akulonda pakubasovya ukuti mutakazikonkaye zizyo u Mwene akabalamula. Mubwefyepo ububibi bunubu pakasi papinyu pakumughogha umuntu yunuyu.

⁶ Nanti uwamwinyu pamo umwana wako umulumendo pamo umulindu pamo umuchi wako umughaniwa pamo umumanyani wako uwa pamoyo akukuzimbula ukuti, “Wee zagha tubiputaye abachala abanji.” Abachala banaba bangaba bo babo awe pamo abanyenya bako mutabiputitepo nalumo,

⁷ abachala aba bantu babo bakuzyunguliye manyi bali papipi manyi bali kubutali ukwandila ko kumpaka yoka iya chisu mupaka ku yinji.

⁸ Loli utakadebiwanje pamo ukumwivwila, awe. Utakamupelele ichisa, sona utakamuleke bulo pamo ukumwimila.

⁹ Umuntu yunuyu naloli aghoghiwanje na mabwe. Ubanje wakwanda pakumusumba na mabwe, pisinda pache bope abantu bosi bamusumbe na mabwe.

¹⁰ Umusumbe na mabwe pachifukwa ichakukusovya ukuti wepepo pamaso pa Mwene u Chala wako, yuyo akakwefya mu Ijiputi, sona akakupoka muchisu chicho ukaba we muzya.

¹¹ Po aba Izilayeli bakwiza pakwivwa zizyo zyabombiwa nukuba nubogha, sona nayumoyumo umuntu uyunji pakasi papinyu akwiza pakuchela sona ukubomba ububibi bunubu.

¹² Bo mukwikala mutwaya twinyu tuto u Mwene u Chala winyu akubapa, lumo mukwiza pakwivwa

¹³ ukuti abantu ababibi biza pakasi papinyu, sona babasovya abantu mutwaya twabo ukuti, “Mwebaya zagha tubiputaye abachala abanji,”

¹⁴ po mubuzikizye akiza nkani ipangwi lilalila. Nanti zyanaloli sona chisimikiziwe ukuti ichintu ichinyazu chinichi chabombiwa naloli pakasi papinyu,

¹⁵ po mubaghoghe abantu bosi aba mukaya kalakala. Mukanangannye akaya kalakala, poka ni vitekwa vyosi.

¹⁶ Muvibungannye poka ivintu vyosi ivya bantu aba mukaya kala nukuvibika pamunalo. Po mukalungulizye akaya kala poka ni vintu vyosi ukuti chibanje chakwiyipa ichakocha kwa Mwene u Chala winyu. Akaya kala kabanje chisami bwila na bwila, po katakazengiwanje sona.

¹⁷ Mutakapalamasyanje nachimochimo ichintu icha vintu ivyamwiko vinivi umwakuti ubukali ubwa u Mwene butozoke. Po atakwiza pakubakalalila sona, akwiza pakubapelela ichisa nukubabalizya pakuba mwe binji nkani, ukuyana namumo akalapila kubanyenya binyu,

¹⁸ pachifukwa ichakuti mukughakonka amalamulo ghosi agha Mwene u Chala winyu, ghagho nabapa ilelo, nukubomba chicho chigholosu pamaso papache.