Ukukumbusya Amalamulo 12 - IBAYIBOLO 2024

Ubuzilo boka ubwakwiputilapo

¹ Agha gho malamulo ni ndaghilo zizyo mubaghiye pakuzikonka akabalilo kosi kako mukwikala muchisu, chicho u Mwene u Chala uwa banyenya binyu abapiye.

² Bo mwachifyula ichisu chilachila, munangannye ubuzilo bosi ubwapamwanya ubwakwiputilapo ivifwani, bubo abantu babo mukuchifyula ichisu chabo bakubiputilapo abachala babo, bubo buli mumaghamba amatali, na mutumaghamba, sona na muntende mumakwi ghagho ghavwinkite akiza.

³ Mumongolannye ivighemo vyabo vyosi, sona mufwantannye impanda zyabo impaghuliwa izya mabwe. Mughochannye amakwi ghabo aghakwiputilapo u Ashela, sona muvinangannye ivifwani ivya bachala babo nukughazimya amatabwa ghabo mubuzilo bulabula.

⁴ Mutakamwiputaye u Mwene u Chala winyu ukuyana namumo abantu banaba pakubiputila abachala babo.

⁵ U Mwene u Chala winyu akwiza pakusala ubuzilo boka bulo pakasi pabaluko lwinyu, bubo abantu babaghiye pakwiza pakulichindika itabwa lyache. Kulakula ko kuko mubaghiye pakubukako.

⁶ Kulakula mubikaye ivyakwiyipa ivyakocha, sona ni vyabupi vyinyu, ni chigaba choka pavigaba teni, ni vyakwiyipa vyinyu ivipaghuliwa, vivyo mwamulayizya u Mwene, ni vyakwiyipa ivya bwighane, sona na bana abakwanda pakupapiwa aba ng'ombe naba ng'ozi.

⁷ Kulakula amwe poka na bamunyumba zyinyu mulyanje nukusekela pamaso pa Mwene u Chala winyu pachifukwa icha lusayo lulo abapiye.

⁸ Bo akabalilo kala kafika, mutakabombaye vivyo mwabombagha kuno ilelo, umwakuti umuntu wesi akubomba bulo ubwighane bwache

⁹ pachifukwa ichakuti muchili pakwinjila muchisu, chicho u Mwene u Chala winyu akubapa pakuba mpyana yinyu, mumo mukwiza pakwikalamo mumutende.

¹⁰ Bo mwaloboka ulusoko ulwa Yolodani, u Mwene u Chala winyu akwiza pakubitikizya pakwikala muchisu chicho u Mwene akubapa pakuba mpyana yinyu. Akwiza pakubasungilila kubalwani binyu, umwakuti mwikalaye umwakufwasa.

¹¹ U Mwene u Chala winyu akwiza pakubusala ubuzilo boka ubwakwiputilapo sona mulamula mubaghiye pakusenda vyosi vivyo nabalamula ngati ivyakwiyipa vyinyu ivyakocha sona ni vyakwiyipa vyinyu ivipaghuliwa ni chigaba choka pavigaba teni sona ni vyabupi vyinyu ivya palubazu vivyo mukumulayizya u Mwene winyu.

¹² Kulakula amwe poka na bana binyu abalumendo na balindu na bambombo binyu abalumendo na balindu sona naba Levi babo bakwikala mutwaya twinyu, babo bate ni chigaba pamo impyana iyabo ni yabo musekelaye pamaso pa Mwene u Chala winyu.

¹³ Mutakabikaye ivyakwiyipa ivyakocha pabuzilo bosi bubo mukubulonda.

¹⁴ Mubikaye ivyakwiyipa vyinyu pabuzilo boka bwene bubo u Mwene akwiza pakubusala pakasi pabaluko lwinyu. Palapala po papo mubikaye ivyakwiyipa vyinyu ivyakocha, sona mubombaye vyosi vivyo nkubalamula.

¹⁵ Loli mungabola ivinyamana vyinyu pabuzilo bosi mutwaya twinyu, sona mungalya nukwikuta ukuyana namumo mwighaniye ngati mumo mungalyela inyama iya mbabala pamo iya swela ukuyana namumo u Mwene u Chala winyu akubasayila. Mwebosi mungalya manyi muntu umuswepu manyi muntu umunyazu.

¹⁶ Mutakalyanje ibanda, loli mulikupulilaye pasi ngati mizi.

¹⁷ Mutwaya tosi tuto mukwikalamo, mutakalyanje choka pavigaba 10 ivya ngano ni vya vinyo umupya sona ni vya mafuta agha misyunguti pamo ivya mwana wesi uwakwanda pakupapiwa uwa ng'ombe nuwa ng'ozi pamo ichintu chosi chicho mukamulayizya u Mwene pamo ivyakwiyipa vyinyu ivya bwighane pamo ivyabupi ivinji ivipaghuliwa.

¹⁸ Loli amwe na bana binyu abalumendo na balindu poka na bambombo binyu abalumendo na balindu sona naba Levi babo bakwikala mutwaya twinyu, mulyanje ivyakwiyipa vinivi nukusekela pamaso pa Mwene u Chala winyu pabuzilo boka bubo u Mwene u Chala winyu abusalite, pachifukwa icha lusayo lulo abapiye.

¹⁹ Muchebaye nkani ukuti mutakabaluvyanje aba Levi akabalilo kosi kako mukwikala muchisu chinyu.

²⁰ Bo u Mwene u Chala winyu akuchonjelezya ichisu chinyu ukuyana namumo akabalayizizya, sona nanti mwaba nikwilu nukuti, “Mwebaya, indi nikwilu,” mungalya inyama nukwikuta ukuyana namumo mukulondela.

²¹ Nanti ubuzilo boka ubwakwiputilapo bubo u Mwene u Chala winyu abusalite buli kubutali nkani, po mungabola ing'ombe pamo ing'ozi zimo zizyo u Mwene abapiye, ukuyana namumo nababuzizya, sona mutwaya twinyu mulamula mungalya inyama nukwikuta ukuyana mumo mukulondela.

²² Mwebosi mungalya manyi muntu umuswepu manyi muntu umunyazu ukuyana namumo mungalyela inyama iya mbabala pamo iya swela.

²³ Loli muchebaye nkani ukuti mutakalyanje ibanda, pakuti ubumi buli mwibanda, po mutakalyanje ubumi poka ni nyama.

²⁴ Mutakalyanje ibanda, loli mulikupulilaye pasi ngati mizi.

²⁵ Mutakalyanje ibanda umwakuti amwe poka na baluko lwinyu ivintu vibendelaye akiza, pakuti bunubu mukwiza pakubombagha chicho chigholosu pamaso pa Mwene.

²⁶ Loli musende ivyabupi vyinyu ivipaghuliwa, sona na vyosi vivyo mwamulayizya u Mwene, nukubuka navyo kubuzilo boka ubwakwiputilapo bubo u Mwene akwiza pakubusala.

²⁷ Kulakula mubikaye ivyakwiyipa ivyakocha, kokuti inyama ni banda bulo pachighemo icha Mwene u Chala winyu. Mulikupule ibanda ilya chakwiyipa chila mulubazu ulwa chighemo icha Mwene u Chala winyu, loli inyama yache yo mungalya.

²⁸ Mwenelezye ukuti mukukonka amalamulo ghosi ghagho nkubapa, umwakuti ivintu vyosi vibendelaye akiza amwe poka na baluko lwinyu bwila na bwila, pakuti bunubu mukwiza pakubombagha chicho chigholosu pamaso pa Mwene u Chala winyu.

Ukubasoka babo bakwiputa ivifwani

²⁹ U Mwene u Chala winyu akwiza pakuzinangannya inko izinji pantazi papinyu, bo mukuvifyula ivyisu vyabo nukwikalamo. Loli bo mwabachimbizyamo nukwikala mulamula,

³⁰ sona bo u Mwene azinangannya inko izinji zyosi zila pantazi papinyu, muchebaye nkani ukuti mutakeghelelaye iviputo vyabo pakubuzikizya abachala babo ukuti, “Nkimba abantu banaba bakubiputagha bulibuli abachala babo? Aswe tukwiza pakubeghelela abantu banaba.”

³¹ Mutakamwiputaye u Mwene u Chala winyu ukuyana namumo abantu banaba bakubiputila abachala babo, pakuti nanti bakubiputa abachala babo bakubomba ivintu ivyamwiko vivyo u Mwene avibengite mupaka nukubocha numoto abana babo abalumendo na balindu ukuti chibanje chakwiyipa ku bachala babo.

³² Muchebaye nkani ukuti mukukonka vyosi vivyo nkubalamula. Mutakonjelezyanjepo nachimochimo ichintu, pamo ukwefyapo nachimochimo ichintu.