Ukukumbusya Amalamulo 11 - IBAYIBOLO 2024

Ubukulu ubwa Mwene

¹ Mumughanaye u Mwene u Chala winyu, sona akabalilo kosi muzikonkaye indaghilo zyache na malamulo ghache ghosi.

² Mukumbukaye ilelo ukuti batakaba bana binyu babo bakennya ubukulu ubwa Mwene u Chala winyu. Loli amwe mukabwennya na maso ghinyu ubumwene bwache, sona na maka ghache amakulu,

³ ni vyika, ni viswigho vivyo akapela mu Ijiputi pakumubombela u Falabo u mwene uwamu Ijiputi poka ni chisu chache chosi.

⁴ Amwe mukennya namumo u Mwene akabananganizizya abasilikali aba ba Ijiputi, poka ni falasi zyabo, sona ni ngolo zyabo, pakubadwibika mu Nyanja Inchesamu, bo bakubakonka.

⁵ Amwe mukazyennya zyosi zizyo u Mwene akababombela munkolongo mupaka mukafika kuno.

⁶ Mukazyennya zizyo akamubombela u Datani nu Abilamu, abana aba Eliyabu uwa luko ulwa Lubeni. Pamaso paba Izilayeli bosi ichisu chikasama nukubamila, poka na bamunyumba zyabo, ni visakasa vyabo, sona na vyosi vivyo akaba navyo.

⁷ Naloli, mwavyennya na maso ghinyu ivintu vyosi ivikulu vivyo u Mwene abomba.

Ulusayo muchisu icha layizyo

⁸ Muzikonkaye zyosi zizyo nkubalamula ilelo, umwakuti mubanje na maka pakuloboka ulusoko nukuchifyula ichisu chicho mukubuka pakwikalamo kwisila ukwa Yolodani.

⁹ Mukwiza pakuba nubumi ubutali muchisu icha mboto chicho u Mwene akabalayizya abanyenya binyu na baluko lwabo.

¹⁰ Pakuti ichisu chicho mukubuka pakwikalamo chitayanite ni chisu icha Ijiputi kuko mukikalaghako, awe. Kulakula mukabyalagha imbeyu zyinyu nukuzisembelela ngati mumo bantu bakusembelela mumakombe.

¹¹ Loli ichisu chicho mukubuka pakwinjilamo kwisila ukwa Yolodani cho chisu icha maghamba ni icha makombe, muchisu chicho ivula yikuchitimila.

¹² U Mwene u Chala winyu weyuyo akuchilindilila ichisu chinichi nukuchisungilila umwaka ghosi.

¹³ Polelo nanti mukughakonka amalamulo ghagho nkubapa ilelo pakumughana u Mwene u Chala winyu nu nukumubombela nu moyo winyu ghosi, sona nu muzimu winyu ghosi,

¹⁴ po ane nkwiza pakubatumila ivula muchisu chinyu pakabalilo aka lupepo na pachisiku, umwakuti mwinule ingano, nukuba nu vinyo umupya, na mafuta agha misyunguti aminji nkani.

¹⁵ Nkwiza pakumezya isote ilyakuti ing'ombe zyinyu zilyanje, sona amwe mukwiza pakulya nukwikuta.

¹⁶ Muchebaye nkani ukuti mutakamulekaye u Mwene pakubiputa abachala abanji nukubabombela.

¹⁷ Nanti mwabomba bunubu, u Mwene akwiza pakubakalalila nkani, po akwiza pakwighalila kumwanya umwakuti ivula yitakatimaye. Ichisu chitakwiza pakumezya imbeyu, sona mukwiza pakuzimila lubilolubilo muchisu ichiza chicho u Mwene akubapa.

¹⁸ Mughakumbukaye amalamulo ghanagha mumoyo ghinyu. Mughapinyililaye panyobe zyinyu, sona mughavwalaye pavyeni vyinyu pakuba chimanyilo.

¹⁹ Mubamanyisyanje abana binyu. Mughanenaye bo mukwikala pasi munyumba zyinyu, pamo bo mukwenda mumusebo, pamo bo mukughona pabusiku, sona bo mukulamusya pandabindabi.

²⁰ Mughasimbaye pamilyango iya nyumba zyinyu, na pamilyango iya impaso zyinyu,

²¹ umwakuti amwe poka na bana binyu mubanje nubumi ubutali muchisu chicho u Mwene u Chala winyu akalapa pakubapa abanyenya binyu. Mukwiza pakwikalagha muchisu chilachila bwila na bwila.

²² Mughakonkaye nu moyo winyu ghosi amalamulo ghosi ghagho nkubapa. Mumughanaye u Mwene u Chala winyu pakubomba vyosi vivyo akubalamula, sona mubanje mwe basubiliwa kukwache.

²³ Po bo mukubuka, akwiza pakuzichimbizyamo inko zyosi zinizi, sona mukwiza pakuvifyula ivyisu ivya inko izinji zizyo nkulu, sona zyamaka ukubachila.

²⁴ Ichisu chosi chicho mukwiza pakukanyamo chikwiza pakuba chinyu. Impaka yinyu yikwiza pakwandila ko kuntende kunkolongo mupaka kumitu kumaghamba agha Lebanoni, sona ukwandila ko kulusoko ulwa Yufuleti kubufumilo bwizuba mupaka ku Nyanja iya Medeteleniya.

²⁵ Atalipo nayumoyumo yuyo akwiza pakubakanizya. U Mwene u Chala winyu akwiza pakubapelela abantu banaba ubogha umwakuti bakwiza pakubanyila muchisu chinichi kosi kuko mukubukako, ukuyana namumo akabalayizizya.

²⁶ Ilelo nkubapa ulusalo ulwakuti musalepo choka, ulusayo pamo ichighune.

²⁷ Nanti mukughakonka amalamulo agha Mwene u Chala winyu, mukwiza pakupokela ulusayo lulo nkubapa amwe ilelo.

²⁸ Loli mukwiza pakupokela ichighune nanti mutakughakonka amalamulo agha Mwene u Chala winyu, sona nanti mutakuvibomba vivyo nkubalamula ilelo nukubiputa abachala abanji, babo mutakabiputapo nalumo.

²⁹ Bo u Mwene u Chala abinjizya muchisu chicho mukubuka pakwikalamo, mufumusyanje ulusayo bo muli pighamba ilya Gelizimu, sona ichighune bo muli pighamba ilya Ebala.

³⁰ Amaghamba mabili ghanagha ghali kubwinjililo bwizuba ukwa lusoko ulwa Yolodani muchigaba icha aba Kenani, babo bakwikala mwikombe ilya Yolodani, umwakwenannya nakaya aka Giligali papipi na makwi agha mupandapanda agha mu Mole.

³¹ Amwe muli papipi pakuloboka ulusoko ulwa Yolodani nukwikala muchisu chicho u Mwene u Chala winyu akubapa. Bo mwachifyula nukwikalamo,

³² mwenelezye ukuti mukuzikonka indaghilo zyosi na malamulo ghosi ghagho nkubapa ilelo.