Ukukumbusya Amalamulo 10 - IBAYIBOLO 2024

U Mozesi akupokela sona Amalamulo

¹ Pakabalilo kalakala u Mwene akambuzya akati, “Biza amabwe amapapate mabili aghakuyana naghakwanda ghala, upange sona ibokosi ilya makwi, sona wize kukwane pighamba pano.

² Ane nkwiza pakusimbapo pamabwe ghanagha amazyu ghagho nkasimba pamabwe ghagho ukamenyula. Po ughabike mu bokosi mulamula.”

³ Po nkapanga ibokosi ilya makwi agha mungwina, sona nkabiza amabwe amapapate mabili ngati aghakwanda ghala, po nkaghasenda nukukwela nagho pighamba.

⁴ Po u Mwene akasimba pamabwe amapapate ghala amazyu ghalaghala aghakwanda, Amalamulo Teni, ghagho akabapa bo akunena namwe, bo ali mumoto pisiku lilyo mukabungana pighamba. U Mwene akampa amabwe amapapate ghala.

⁵ Po nkika pighamba pala nukughabika amabwe amapapate ghala mu bokosi, lilyo nkapanga ukuyana namumo u Mwene akandamulila, sona ghachili ghalimo mulamula mupaka nilelo bulo.

⁶ Aba Izilayeli bakanyamuka ubulendo bwabo pa viziba vivyo vikaba vya Bene Yakani nukubuka ku Mosela. U Aloni akafwa nukusyiliwa kulakula, po umwana wache u Eleyazala akamupyana pakuba muputi.

⁷ Bakepako kulakula nukubuka ku Gudigoda, sona na ku Jotibata, ichisu icha isoko izya mizi.

⁸ Pakabalilo kalakala u Mwene akalupaghula uluko ulwa Levi ukuti lunyamulaye Ibokosi ilya Lufingo ulwa Mwene nukwimilila pamaso papache pakumubombela imbombo iya buputi, sona nukubasaya abantu mwitabwa lyache. Iyi yo mbombo yabo yiyo bakuyibomba mupaka nilelo bulo.

⁹ Ichi cho chifukwa uluko ulwa Levi lute nachimochimo ichigaba pamo impyana pakasi pa bakamu babo. U Mwene we mpyana yabo, ukuyana namumo u Mwene u Chala winyu akababuzizya.

¹⁰ Ane nkikala pighamba palapala amasiku 40, umusanya nu busiku ukuyana namumo nkabombela pakwanda pala. U Mwene akanteghelezya sona pakabalilo kanaka, po akitika ukuti atakwiza pakubanangannya.

¹¹ Po u Mwene akambuzya akati, “Bukagha ubalongolele abantu umwakuti bakuchifyula nukwikala muchisu chicho akabalayizya abanyenya babo pakubapa.”

Zizyo u Mwene akulonda

¹² Ilelo mwe ba Izilayeli, zizyo u Mwene u Chala winyu akulonda zyakuti mumunyilaye u Mwene u Chala winyu, mumughanaye, sona mumubombelaye u Mwene u Chala winyu nu moyo winyu ghosi nu muzimu winyu ghosi

¹³ sona muzikonkaye indaghilo na malamulo ghache ghosi ghagho nkubapa ilelo umwakuti ivintu vibendelaye akiza.

¹⁴ Kumwanya na vyosi vivyo vili kuko sona ni chisu ichapasi na vyosi vivyo vili mumo, vya Mwene u Chala winyu.

¹⁵ Loli u Mwene akabaghana nkani abanyenya binyu, sona akabasala amwe mwe baluko lwabo pakasi pa inko zyosi ukuyana namumo vibeleye nilelo bulo.

¹⁶ Polelo mwefyemo imbibi mumoyo ghinyu, sona mutakaghakazyanje amoyo ghinyu.

¹⁷ Pakuti u Mwene, u Chala winyu ali pamwanya pa bachala bosi, sona we Mwene uwa bamwene, we Chala umukulu nu wamaka, sona wakoghofya nkani. Atakwennya icheni icha muntu sona atangabekiwa.

¹⁸ Akubalwila abana abalanda na bakolo abafwilwe. Akubaghana abayeni babo bakwikala pakasi papinyu, sona akubapa ichakulya na menda.

¹⁹ Po mubaghanaye abayeni, pakuti namwe bulo mukaba mwe bayeni mu Ijiputi.

²⁰ Mumunyilaye u Mwene u Chala winyu nukumwiputa yuyo mwene. Mubanje mwe basubiliwa kukwache. Mulapilaye mwitabwa lyache lyene.

²¹ Mumupalaye pakuti we Chala winyu, yuyo akababombela ivintu ivikulu ni viswigho ivyakoghofya vivyo mukavyennya na maso ghinyu.

²² Bo abanyenya binyu babuka ku Ijiputi, bosi bakabapo 70. Loli ilelo u Mwene u Chala winyu abapela amwe pakuba mwe binji ngati zyo ntondwa izya kumwanya.