Ukufuma 9 - IBAYIBOLO 2024

Ukufwa ukwa vitekwa

¹ U Mwene akamubuzya u Mozesi akati, “Bukagha kwa Falabo umubuzye uti, ‘U Chala uwa ba Hebeli akuti: “Ubitikizye abantu bane ukuti babukaye, umwakuti banganyiputa.”

² Nanti ukukana nukubakanizya zila ukuti babukaye,

³ Po u Mwene na maka ghache, akwiza pakubombezya ichiwaya ichakoghofya nkani nukuzifunda ing'ombe zyako ni falasi ni mpunda ni ngamila ni ng'ozi sona ni mbuzi zyako.

⁴ Loli nkwiza pakubika ukulekana pakasi pa ng'ombe izya ba Izilayeli nizya ba Ijiputi, umwakuti nachimochimo ichitekwa icha ba Izilayeli, chicho chikwiza pakufwapo.’ ”

⁵ U Mwene akabika akabalilo, sona akuti zinizi akwiza pakuzibomba indabi.

⁶ Indabi yache u Mwene akavibomba vivyo akanena. Ivitekwa vyosi ivya ba Ijiputi vikafwa. Loli chitakabapo nachimochimo ichitekwa icha ba Izilayeli chicho chikafwapo.

⁷ U Falabo akabuzikizya zizyo zikabombiwa, po akagha ukuti chitakabapo nachimochimo ichitekwa icha ba Izilayeli chicho chikafwapo. Loli pope bulo umoyo uwa Falabo ghukaba mukafu nkani, umwakuti atakabitikizya aba Izilayeli ukuti babukaye.

Ichiwaya icha mapumba

⁸ Po u Mwene akamulamula u Mozesi nu Aloni akati, “Tapa itoyi pamoto ni nyobe zyosi zibili. U Mozesi alinyafile itoyi lila mumwanya pamaso pa Falabo.

⁹ Itoyi lila likwiza pakusata ngati lufumbi ulutinye mu Ijiputi mosi, sona likwiza pakupela amapumba aghakupunta posi na posi, ghagho ghakwiza pakuba vilonda ivikulu pamabili agha bantu ni vinyamana.”

¹⁰ Po bakalitapa itoyi lila nukwimilila pamaso pa Falabo. U Mozesi akalinyafila mumwanya, po likapela amapumba aghakupunta, ghagho ghakaba vilonda ivikulu nkani pamabili agha bantu ni vinyamana.

¹¹ Abamayele bala bakapotwa pakwimilila pamaso pa Mozesi pachifukwa ichakuti bope bakaba na mapumba ngati ba Ijiputi abanji bosi.

¹² Loli u Mwene akaghupela umoyo uwa Falabo pakuba mukafu nkani, ukuyana namumo u Mwene akanenela, umwakuti atakamuteghelezya u Mozesi nu Aloni.

Ichiwaya icha vula iya mabwe

¹³ U Mwene akamubuzya u Mozesi akati, “Pandabindabi nkani kakomane nu Falabo, umulamule uti, ‘U Mwene u Chala uwa ba Hebeli akuti ubitikizye abantu bane ukuti babukaye, umwakuti banganyiputa.

¹⁴ Pakabalilo kanaka nkwiza pakukufunda awe, na makambala ghako, sona na bantu bako bulo, umwakuti umanye ukuti atalipo uyunji muchisu chosi ichapasi uwakuyana nane.

¹⁵ Pakuti ukufika pakabalilo aka ngali nakufunda kale na maka ghane amakulu, awe na bantu bako pakubombezya ichiwaya, sona ngali mwebosi mwamala.

¹⁶ Loli imbalekite bumi ukuti indanjizye amaka ghane amakulu, umwakuti itabwa lyane limanyikwe pachisu chosi ichapasi.

¹⁷ Loli pope bulo uchili ukwituvya nukukana pakubitikizya abantu bane ukuti babukaye.

¹⁸ Po indabi pakabalilo kanaka nkwiza pakupela ivula iya mabwe, yiyo yitatimitepo nalumolumo mu Ijiputi ukwandila pakabalilo kako ichisu icha Ijiputi chikapeliwanga.

¹⁹ Losi ulu lamula ukuti ivitekwa vyinyu vyosi vyinjile muvibagha, poka nu katundu winyu wesi. Ivula iya mabwe yikwiza pakutimila pa muntu wesi, na pachitekwa chosi chicho chisyalikiye kuzi, po vyosi vikwiza pakufwa.’ ”

²⁰ Amakambala ghamo agha Falabo bakanyila nkani pachifukwa icha mazyu ghagho u Mwene akanena, po bakabighalila abazya babo munyumba, sona vyope ni vitekwa akavyighalila.

²¹ Loli abantu abanji bakaghasula amazyu ghagho u Mwene akanena, po bakabaleka kuzi abazya babo, poka ni vitekwa vyabo.

²² U Mwene akamubuzya u Mozesi akati, “Gholosezya inyobe yako mumwanya ukuti ivula iya mabwe yitime mu Ijiputi pabantu napa vinyamana, sona napa vibyalwa ivya mumaghunda ghabo.”

²³ Bo u Mozesi ayisontezezya indisa yache mumwanya, u Mwene akatuma ivula iya mabwe nukupaya sona nukumesya ukukulu nkani pachisu. Po u Mwene akatuma ivula iya mabwe pachisu icha Ijiputi.

²⁴ Ivula iya mabwe yikatima, ukumesya kukendelela, yikaba vula imbibi nkani yiyo aba Ijiputi batayenizyepo nalumolumo ukwandila pakabalilo kako ichisu icha Ijiputi chikapeleliwanga.

²⁵ Ivula iya mabwe yila yikanangannya ivintu vyosi vivyo vikaba kuzi, poka na bantu, sona ni vinyamana bulo muchisu chosi icha Ijiputi. Yikanangannya amaghunda ghosi nukupyolannya amakwi ghosi.

²⁶ Loli ichigaba chene chicho ivula iya mabwe yila yitakatimako chikaba chigaba icha Gosheni, kuko aba Izilayeli bakikalagha.

²⁷ Po u Falabo akamwitizya u Mozesi nu Aloni nukubabuzya ukuti, “Naloli akabalilo aka nananga. U Mwene we mugholosu. Loli ane poka na bantu bane twe twananga.

²⁸ Iputa kwa Mwene ukuti ukupaya ni vula iya mabwe vileke, po nkwiza pakubitikizya ukuti mubukaye. Amwe mutabaghiye pakwikala sona kuno.”

²⁹ U Mozesi akamwamula akati, “Bo nepamo bulo mukaya akakulu nkani aka, nkwiza pakugholosezya inyobe zyane mumwanya nukwiputa kwa Mwene. Panapo na panapo ukupaya ni vula iya mabwe vikwiza pakuleka, umwakuti umanye ukuti ichisu chosi ichapasi cho cha Mwene.

³⁰ Loli pope bulo inzimenye ukuti awe na makambala ghako mutakumunyila u Mwene u Chala.”

³¹ Ubusapa na mapemba vikanangika pakuti amapemba ghakavumbata, ubusapa bope bukaba nu bwezya.

³² Loli ingano na malezi vitakananganika pachifukwa ichakuti bakakaba pakubyala.

³³ U Mozesi akepapo pamaso pa Falabo nukwepamo mukaya akakulu nkani kala. Akagholosezya inyobe zyache mumwanya nukwiputa kwa Mwene. Ukupaya ni vula iya mabwe yila vikaleka, po yitakatima sona pachisu ichapasi.

³⁴ Bo u Falabo ennya ukuti ivula iya mabwe nukupaya kula vyaleka, akananga sona. U Falabo na makambala ghache bakendelela pakuba nu moyo umukafu nkani.

³⁵ Po umoyo uwa Falabo ghukaba mukafu nkani, ukuyana namumo u Mwene akamubuzizya u Mozesi, umwakuti atakabitikizya aba Izilayeli ukuti babukaye.